ءباسپاسوز ءماسليحاتى بارىسىندا وڭىردەگى تسيفرلىق ترانسفورماتسيانىڭ نەگىزگى باعىتتارى، جۇزەگە اسىرىلىپ جاتقان جوبالار، تسيفرلىق ينفراقۇرىلىمدى جەتىلدىرۋ ماسەلەلەرى جانە الداعى جوسپارلار تانىستىرىلدى. باسقارما باسشىسى تسيفرلاندىرۋدىڭ نەگىزگى ماقساتى جاڭا تەحنولوگيالاردى ەنگىزۋمەن عانا شەكتەلمەي، تۇرعىندارعا ناقتى پايداسىن تيگىزىپ، مەملەكەتتىك قىزمەتتەردى الۋ ۇدەرىسىن جەڭىلدەتۋ ەكەنىن اتاپ ءوتتى. قازىرگى تاڭدا مەملەكەتتىك قىزمەتتەردىڭ باسىم بولىگىن ونلاين فورماتتا كورسەتۋگە، ازاماتتاردىڭ قاجەتتى اقپارات پەن قىزمەتتەرگە جەدەل قول جەتكىزۋىنە جانە قولدانىستاعى اقپاراتتىق جۇيەلەردىڭ جۇمىسىن جەتىلدىرۋگە ەرەكشە نازار اۋدارىلىپ وتىر. بۇل تۇرعىنداردىڭ ۋاقىتىن ۇنەمدەپ، مەملەكەتتىك مەكەمەلەرگە تىكەلەي بارۋ قاجەتتىلىگىن ازايتىپ، قىزمەت كورسەتۋ ساپاسىن ارتتىرۋعا مۇمكىندىك بەرەدى. سونىمەن قاتار تسيفرلىق تەحنولوگيالاردى دامىتۋ وبلىس ورتالىعى مەن قالالاردا عانا ەمەس، اۋداندىق جانە اۋىلدىق ەلدى مەكەندەردە دە جۇزەگە اسىرىلۋدا. تسيفرلىق قىزمەتتەردىڭ قولجەتىمدىلىگى ازاماتتىڭ تۇرعىلىقتى جەرىنە بايلانىستى بولماۋى ءتيىس. وسىعان بايلانىستى ەلدى مەكەندەردەگى ينتەرنەت ساپاسىن جاقسارتۋ، تسيفرلىق ينفراقۇرىلىمدى دامىتۋ جانە تۇرعىنداردىڭ زاماناۋي سەرۆيستەردى پايدالانۋ مۇمكىندىكتەرىن كەڭەيتۋگە باسىمدىق بەرىلۋدە. ايدىن جانگەلدىۇلىنىڭ ايتۋىنشا، جاڭا سەرۆيستەر مەن اقپاراتتىق جۇيەلەر تۇرعىنداردىڭ ناقتى قاجەتتىلىكتەرىنە ساي بولۋى قاجەت. ازامات مەملەكەتتىك قىزمەتتى جىلدام الىپ، قاجەتتى اقپاراتقا وڭاي قول جەتكىزىپ، بىرقاتار ماسەلەنى قاشىقتان شەشە السا، بۇل تسيفرلىق جوبالاردىڭ تيىمدىلىگىن كورسەتەدى. جيىندا حالىقتىڭ تسيفرلىق ساۋاتتىلىعىن ارتتىرۋ ماسەلەسىنە دە نازار اۋدارىلدى. اسىرەسە ەگدە جاستاعى ازاماتتارعا، اۋىل تۇرعىندارىنا جانە تسيفرلىق تەحنولوگيالاردى پايدالانۋ تاجىريبەسى از ادامدارعا ءتۇسىندىرۋ جۇمىستارىن جۇرگىزۋدىڭ ماڭىزى اتاپ ءوتىلدى.
وڭىردە قولعا الىنعان تسيفرلىق باستامالار مەملەكەتتىك ورگانداردىڭ جۇمىسىن وڭتايلاندىرىپ، تۇرعىندار مەن بيلىك اراسىنداعى بايلانىستى جەڭىلدەتۋگە، قىزمەتتەردىڭ اشىقتىعى مەن جەدەلدىگىن ارتتىرۋعا باعىتتالعان. وسىلايشا تسيفرلاندىرۋ جەتىسۋ وبلىسىنىڭ الەۋمەتتىك-ەكونوميكالىق دامۋىنا ىقپال ەتەتىن ماڭىزدى باعىتتاردىڭ بىرىنە اينالىپ وتىر.
ايدانا امانجولقىزى
“Q-Andas” اقپارات اگەنتىگىنىڭ ءتىلشىسى.
ۆيدەو تۇسىرگەن جانسايا جاناربەكقىزى.











