ونەر مەن مادەنيەتكە عۇمىرىن ارناعان دينا نۇرعاليەۆانىڭ ءومىر جولى «بەكزات ءومىر» اتتى كىتاپقا ارقاۋ بولدى. زامزاگۇل امىرعاليەۆا مەن قاجەت انداس بىرلەسىپ جازعان عۇمىرنامالىق ەڭبەكتە كەيىپكەردىڭ ەڭبەك بەلەستەرى، قوعامدىق قىزمەتى، وتباسىلىق ءومىرى جانە زامانداستارىنىڭ ەستەلىكتەرى قامتىلعان.
Посмотреть эту публикацию в Instagram
ءبىر ادامنىڭ ءومىر جولى ارقىلى تۇتاس ءبىر كەزەڭنىڭ تىنىسىن تانىتۋعا بولادى. اسىرەسە، ءوڭىر مادەنيەتىنىڭ قالىپتاسۋىنا اتسالىسقان تۇلعالار تۋرالى ەستەلىكتەر ەل تاريحىن تولىقتىرا تۇسەدى. «بەكزات ءومىر» – وسىنداي ماقساتتان تۋعان، ونەرگە ادالدىق پەن ادامدىق قاسيەتتى قاتار دارىپتەيتىن ەڭبەك.
كىتاپ اۆتورلارىنىڭ ءبىرى، «جەتىسۋ ولكەتانۋشىلار ورتالىعى» قوعامدىق بىرلەستىگىنىڭ ديرەكتورى قاجەت انداس ەڭبەكتىڭ ماقساتىن انالار ونەگەسىن ۇرپاققا جەتكىزۋمەن بايلانىستىرادى.
– باستى ماقساتىمىز – انالارىمىزدىڭ ءومىر جولىن، اقىل-پاراساتىن، ەلگە سىڭىرگەن ەڭبەگىن تانىتۋ. بۇل ەڭبەك ءبىر ادامنىڭ نەمەسە ءبىر اۋلەتتىڭ تاريحىمەن عانا شەكتەلمەيدى. دينا اپامىزدىڭ تاعدىرى ارقىلى جەتىسۋ انالارىنىڭ ۇرپاق تاربيەسىنە، ەلدىڭ مادەني جانە رۋحاني ومىرىنە قوسقان ۇلەسىن كورسەتۋگە ۇمتىلدىق، – دەيدى ول.
دينا نۇرعاليقىزى 1940 جىلى كوكسۋ اۋدانىنىڭ ەڭبەكشى اۋىلىندا دۇنيەگە كەلگەن. 1956 جىلى ورتا مەكتەپتى بىتىرگەننەن كەيىن اباي اتىنداعى مەملەكەتتىك اكادەميالىق وپەرا جانە بالەت تەاترى جانىنداعى ۆوكال-حور ستۋدياسىنا وقۋعا تۇسەدى. انشىلىككە دەگەن ىقىلاسى ونى مادەنيەت سالاسىمەن بايلانىستىرىپ، كەيىن ۇيىمداستىرۋشىلىق جانە باسشىلىق قىزمەتتەرگە الىپ كەلەدى.
كوكسۋ اۋداندىق مادەنيەت ءۇيىن باسقارعان جىلدارى جەرگىلىكتى ونەردىڭ دامۋىنا اتسالىسىپ، 1972 جىلى اۋداندا العاشقى مۋزىكا مەكتەبىن اشادى. 1975–1981 جىلدارى ءىلياس جانسۇگىروۆ اتىنداعى مادەنيەت سارايىنىڭ، 1981–1986 جىلدارى تالدىقورعان وبلىستىق قازاق دراما تەاترىنىڭ ديرەكتورى قىزمەتتەرىن اتقارادى. بۇل كەزەڭدەردە ونەر ۇجىمدارىنىڭ جۇمىسىن ۇيىمداستىرىپ، ونەرپازداردىڭ شىعارماشىلىق ىزدەنىسىنە قولداۋ كورسەتەدى.
كىتاپتىڭ بىرلەسكەن اۆتورى زامزاگۇل امىرعاليەۆا دينا اپانىڭ ادامدىق بولمىسى مەن اينالاسىنا كورسەتكەن ونەگەسىن ەرەكشە باعالايدى.
– ول كىسى ءجۇرىس-تۇرىسىمەن دە، سويلەگەن سوزىمەن دە كوپكە ۇلگى بولعان جان. «بالام دا وسى اپامداي كەڭ پەيىلدى، اقىلدى، پاراساتتى ادام بولىپ وسسە ەكەن» دەگەن تىلەك بولدى. اپامىزدىڭ بويىنداعى جاقسى قاسيەتتەر كەيىنگى ۇرپاققا جۇعىستى بولسا ەكەن دەيمىن، – دەيدى زامزاگۇل امىرعاليەۆا.
دينا نۇرعاليقىزىنىڭ ەڭبەك جولى مادەنيەت مەكەمەلەرىمەن عانا شەكتەلمەيدى. 1987–1995 جىلدارى تالدىقورعان اككۋمۋلياتور زاۋىتىنا قاراستى بالالار باقشاسىنىڭ مەڭگەرۋشىسى بولىپ قىزمەت اتقارادى. زەينەتكە شىققاننان كەيىن دە قوعامدىق ومىردەن قول ۇزبەي، ۇلتتىق سالت-ءداستۇردى ناسيحاتتاۋعا ارالاسادى. 2003 جىلى «ارداگەر اجەلەر» ءانسامبلىن قۇرۋعا اتسالىسىپ، اعا بۋىننىڭ ونەر ارقىلى باس قوسۋىنا ۇلەس قوسادى.
ومىردەن كورگەنى مەن كوڭىلگە تۇيگەنىن كىتاپقا اينالدىرۋعا بالالارى مەن تۋىستارىنىڭ ۇسىنىسى تۇرتكى بولعان. دينا نۇرعاليەۆا بۇل تۋرالى بىلاي ەسكە الادى:
– بالالارىم مەن تۋىستارىم: «اپا، ومىردەن جيناعان تاجىريبەڭىز مول. بىزگە دە، ەلگە دە ايتار ءسوزىڭىز بار. ەستەلىك بولىپ قالاتىن ءبىر كىتاپ شىعارايىق»، – دەدى. بۇل ويدى جاقىندارىم قولداپ، كىتاپتى جارىققا شىعاردىق. ارينە، ومىردەگى بارلىق وقيعانى تۇگەل جازا المادىق. بىراق نەگىزگى ويلارىم، ەڭبەك جولىم مەن ءوسۋ بەلەستەرىم وسى كىتاپتا قامتىلعان.
«بەكزات ومىردە» كەيىپكەر تۋرالى زامانداستارىنىڭ پىكىرلەرى مەن ەستەلىكتەرىنە دە ورىن بەرىلگەن. وتباسىلىق جانە قىزمەتتىك فوتوسۋرەتتەر، باسپاسوزدە جاريالانعان ماتەريالدار ونىڭ ءومىر سۇرگەن ورتاسىن، ەڭبەك ەتكەن ۇجىمدارىن، ونەرگە قوسقان ۇلەسىن تانىتا تۇسەدى.
كىتاپتا باسشىلىق قىزمەتتىڭ بەلەستەرىمەن بىرگە ادامعا دەگەن قۇرمەت، وتباسىنداعى تاربيە، ونەرگە سۇيىسپەنشىلىك سەكىلدى قۇندىلىقتار كورىنىس تاپقان. دينا نۇرعاليەۆانىڭ ءومىر جولىن كەيىنگى بۋىنعا جەتكىزۋدى كوزدەگەن بۇل ەڭبەك ءوڭىردىڭ مادەني تاريحىنا قاتىستى ەستەلىكتەردى ساقتاۋعا دا قىزمەت ەتەدى.
ايسۇلۋ تولەۋحان،
ولكەتانۋشى-جۋرناليست.
سۋرەتتەر مەن بەينەفيلمدى تۇسىرگەن
ءامينا اقىلبەك.
«Q-Andas» اقپارات اگەنتىگىنىڭ تىلشىلەرى.











