سارقان اۋداندىق كىتاپحاناسىندا «كىتاپ وقيتىن ۇلت» جوباسىنىڭ ماقساتىنا ۇندەس ولكەتانۋ ءىس-شاراسى ءوتتى. كەزدەسۋدە جەتىسۋ ءوڭىرىنىڭ تاريحى مەن مادەني مۇراسىن تانىتاتىن كىتاپتار، ەلەكتروندى كىتاپ قورى جانە «Q-Andas» اقپارات اگەنتتىگىنىڭ رەسمي سايتى تانىستىرىلدى.
Посмотреть эту публикацию в Instagram
ءىس-شارا قوناقتاردى قارسى الىپ، كورمەمەن تانىستىرۋدان باستالدى. اشىلۋ بولىمىنەن كەيىن «جەتىسۋ» ولكەتانۋشىلار ورتالىعى قوعامدىق بىرلەستىگىنىڭ ديرەكتورى، ولكەتانۋشى-جۋرناليست قاجەت انداس ءسوز سويلەدى. سونداي-اق قاتىسۋشىلارعا بىرلەستىكتىڭ ماقساتى، مىندەتتەرى مەن اتقارعان جۇمىستارى تۋرالى بەينەتانىستىرىلىم كورسەتىلدى.
كەزدەسۋ بارىسىندا قاجەت انداس ورتالىق ولكەتانۋشىلارى باسپادان شىعارعان جانە ەلەكتروندى كىتاپ قورىنا ەنگىزىلگەن 37 كىتاپتى تانىستىردى. ودان كەيىن «Q-Andas» اقپارات اگەنتتىگىنىڭ رەسمي سايتى تۋرالى باياندادى. ءىس-شارا باعدارلاماسى ءان شاشۋمەن جالعاستى.
جارىسسوزدە قاتىسۋشىلار ولكەتانۋ ەڭبەكتەرىنىڭ ءوڭىر تاريحىن تانىتۋداعى ورنى جونىندە پىكىر الماستى. جومارت يگىمان تۋعان جەر تۋرالى دەرەكتەردى جيناقتاپ، كەيىنگى ۇرپاققا جەتكىزۋدىڭ ماڭىزىن اتاپ ءوتتى. ايسۇلۋ سەيپولدينا كىتاپحانا مەن ولكەتانۋشىلار اراسىنداعى بايلانىستى نىعايتۋعا توقتالدى. لاۋرا قۇلىمبەتوۆا جەرگىلىكتى اۆتورلاردىڭ ەڭبەكتەرىن وقىرمانعا كەڭىنەن تانىستىرۋ تۋرالى ايتتى. ۇلجان نۇرعالىمقى جاستاردىڭ ولكە تاريحىنا قىزىعۋشىلىعىن ارتتىرۋ جايىن قوزعادى. بايجان سەيىتقۇل ولكەتانۋ ماتەريالدارىن ساقتاپ، كوپشىلىككە قولجەتىمدى ەتۋدىڭ قاجەتتىگىن جەتكىزدى.
«كىتاپ سىيلا!» اكتسياسى اياسىندا اۋداندىق كىتاپحاناعا كىتاپتار تابىستالىپ، ولكەتانۋشىلارعا كۋالىكتەر بەرىلدى. قورىتىندى ءسوز سويلەگەن سارقان اۋداندىق كىتاپحاناسىنىڭ ديرەكتورى گۇلنار مۇحامەتقاليەۆا كەزدەسۋدىڭ كىتاپ پەن وقىرمان اراسىنداعى بايلانىستى نىعايتۋداعى مانىنە توقتالدى. ءىس-شارا قاتىسۋشىلاردىڭ توپتىق سۋرەتكە تۇسۋىمەن اياقتالدى.
ولكەتانۋ كىتاپتارىن تانىستىرۋ، ولاردى كىتاپحانا قورىنا ۇسىنۋ جانە ەلەكتروندى تۇردە قولجەتىمدى ەتۋ وقىرماننىڭ تۋعان ولكە تاريحىن تەرەڭىرەك تانۋىنا مۇمكىندىك بەرەدى. بۇل باعىتتاعى جۇمىس «كىتاپ وقيتىن ۇلت» جوباسىنىڭ وقۋ مادەنيەتىن دامىتۋ ماقساتىنا ساي كەلەدى.











