Elimizde júmys izdep júrgen azamattarǵa qoldau kórsetu jáne subsidiyalanatyn júmys oryndaryn úiymdastyru tártibi jańaryp jatyr. Ózgerister júmyssyz mártebesin beruge deiingi júmys izdeu merzimin, mansap ortalyqtarynyń qyzmetin jáne júmys berushilerge qoiylatyn talaptardy qamtidy. Azamattar úshin negizgi másele – qandai kómek kórsetiletini, al júmys berushiler úshin baǵdarlamaǵa qandai shartpen qatysuǵa bolatyny.
Eńbek jáne halyqty áleumettik qorǵau ministrligi 1 qazannan bastap júmys izdeushilerge qyzmet kórsetu tásilderin jetildiruge arnalǵan pilottyq jobany iske asyra bastady. Onyń negizgi maqsaty – kómekti ár azamattyń tájiribesi men qajettiligine qarai úiymdastyryp, naqty júmysqa ornalasuyna baǵyttau.
Basty ózgeristiń biri – azamatqa júmyssyz mártebesi berilgenge deiin laiyqty júmys izdeu merziminiń 2 kúnnen 13 kúnge deiin úzartyluy. Osy uaqyt ishinde mansap ortalyǵynyń mamandary júmys izdeushiniń eńbek tájiribesin, kásibi daǵdylary men qajettilikterin anyqtap, oǵan sáikes bos júmys oryndaryn irikteidi jáne júmys berushilermen bailanys ornatady.
Búl kezeń azamatqa jeke keńes aluǵa, úsynylǵan júmys oryndarymen tanysuǵa, qajetti rásimderden ótuge jáne biliktiligi men kásibi josparyna sai júmys tańdauǵa múmkindik beredi. Mansap ortalyǵyna júginu azamatty júmysqa ornalasqanǵa deiin súiemeldeudi qamtityn úderis retinde qarastyrylady. Sondyqtan pilottyq joba barysynda mamandardyń júmys izdeushiniń kásibi beiinin dúrys anyqtauyna, laiyqty júmys úsynuyna jáne atqarylǵan júmysty aqparattyq júielerde naqty kórsetuine erekshe mán beriledi.
Júmysynan aiyryluyna bailanysty áleumettik tólemge qatysty eki merzimdi ajyrata bilu qajet. Pilottyq joba kezinde tólem qoldanystaǵy tártippen júrgiziledi. Ony aluǵa qúqyǵy bar azamattar zańnamada belgilengen talaptarǵa sáikes tólem alu múmkindigin saqtaidy.
Byltyr 11 mausymda bekitilgen zańǵa sáikes, biyl 1 qańtardan bastap júmysynan aiyryluyna bailanysty áleumettik tólemniń eń úzaq merzimi úsh aiǵa deiin bolady. Demek, júmys izdeu merziminiń úzaruy men áleumettik tólem merziminiń ózgerui ártúrli uaqytta engiziledi.
Júmyspen qamtu salasyndaǵy ekinshi ózgeris subsidiyalanatyn júmys oryndaryn úiymdastyruǵa qatysty. Múndai oryndardy mansap ortalyqtary júmys berushilerdiń ótinishi negizinde ashady. Baǵdarlamaǵa kommertsiyalyq zańdy túlǵalar, jeke kásipkerler, sharua jáne fermer qojalyqtary, áleumettik kásipkerler, memlekettik mekemeler, olardyń vedomstvolary men baǵynyshty úiymdary qatysa alady. Úkimettik emes úiymdar, olardyń filialdary men ókildikteri de ótinish beruge qúqyly.
Barlyq júmys berushige ortaq talaptar bar. Olar keminde 12 aidan beri júmys istep kele jatqan boluy, bankrottyq rásiminde bolmauy, ekstremizmge qarsy is-qimyl salasyndaǵy zań talaptaryn saqtauy jáne júmyspen qamtuǵa járdemdesu sharalary boiynsha búryn jasalǵan sharttardy tiisinshe oryndauy qajet. Sonymen qatar bir júmys ornynyń nemese bir shyǵynnyń memlekettik byudjetten birneshe baǵdarlama arqyly qaitalap qarjylandyryluyna jol berilmeuge tiis.
Subsidiyalanatyn oryndardyń sany júmys berushiniń sanatyna qarai belgilenedi. Úkimettik emes úiymdar respublikalyq mańyzy bar qalalarda 1-den 10-ǵa deiin, al óńirlerde 1-den 5-ke deiin júmys ornyn úiymdastyra alady. Ol úshin úiym Úkimettik emes úiymdardyń resmi derekqorynda tirkelgen boluy kerek.
Kommertsiyalyq úiymdar, jeke kásipkerler, sharua nemese fermer qojalyqtary jáne áleumettik kásipkerler úshin 1-den 5-ke deiin oryn qarastyrylǵan. Búl sanattaǵy júmys berushilerdiń jalaqy boiynsha bereshegi bolmauy, sońǵy 12 aida áleumettik tólemderdi túraqty audaruy jáne baǵdarlamanyń aldyńǵy kezeńderine qatysqan azamattardy túraqty júmysqa qabyldauy qajet.
Memlekettik organdar men kvazimemlekettik sektor subъektileri úshin de 1-den 5-ke deiin subsidiyalanatyn oryn kózdelgen. Al auyldyq ákimdikter men kommunaldyq kásiporyndarǵa bólek tártip qoldanylady: júmys oryndarynyń sany auyl túrǵyndarynyń jalpy sanynyń 2–5 paiyzy aralyǵynda belgilenui múmkin.
Negizgi rásimder Elektrondyq eńbek birjasy arqyly júrgiziledi. Júmys berushilerdi irikteu, azamattardy ashylǵan oryndarǵa joldau jáne qajetti qújattardy tekseru elektrondy formatqa kóshiriledi. Búl qaǵaz qújat ainalymyn azaityp, ótinishterdi qaraudy jedeldetuge, rásimderdiń ashyqtyǵyn arttyruǵa jáne sheshim qabyldaudaǵy adami faktordy shekteuge baǵyttalǵan.
Osylaisha, jańartylǵan tártiptiń ózeginde naqty júmysqa ornalasuǵa kómektesu mindeti túr. Búl júmys izdeushi úshin tájiribesi men daǵdysyna sai úsynys alu, óz sanatyna belgilengen talaptar boiynsha ótinish beru múmkindigi. Al qoldaudyń nátijesi azamattyń laiyqty júmysqa ornalasuymen jáne byudjet qarajatynyń maqsatty júmsaluymen bailanysty bolmaq.
Ainúr KESIKBAEVA,
Taldyqorǵan qalasy
mansap ortalyǵy
filialynyń mamany.












[…] Júmyspen qamtu tártibinde ne ózgerdi? […]
[…] Júmyspen qamtu tártibinde ne ózgerdi? […]
[…] Júmyspen qamtu tártibinde ne ózgerdi? […]