تالدىقورعان قالاسىنىڭ مانساپ ورتالىعى فيليالىندا الەۋمەتتىك كاسىپكەرلەرمەن ماڭىزدى كەزدەسۋ ءوتتى. وندا كەلەسى جىلعا جوسپارلانعان سۋبسيديالاناتىن جۇمىس ورىندارىن ۇيىمداستىرۋعا قاتىستى تالاپتار مەن مىندەتتەردى ءتۇسىندىرۋ، سونداي-اق، ەڭبەك نارىعىنداعى وزەكتى ماسەلەلەر تالقىلاندى. كەزدەسۋگە قالاداعى 20-دان استام الەۋمەتتىك كاسىپكەر قاتىسىپ، مەملەكەتتىك باعدارلامالاردى ىسكە اسىرۋ بارىسىنداعى جاڭاشىلدىقتار مەن وزگەرىستەر جونىندە جان-جاقتى اقپارات الدى.
جيىنعا «جەتىسۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى» مەملەكەتتىك مەكەمەسىنىڭ «جەتىسۋ وبلىسى بويىنشا ەڭبەك موبيلدىلىگى ورتالىعى» كوممۋنالدىق مەملەكەتتىك مەكەمەسى ديرەكتورىنىڭ ورىنباسارى كامشات جانتەكەەۆا جانە تالدىقورعان قالاسى مانساپ ورتالىعىنىڭ ديرەكتورى ازامات بولاتۇلى قاتىستى.
قاتىسۋشىلارعا سۋبسيديالاناتىن جۇمىس ورىندارىن قۇرۋ ءتارتىبى، جۇمىس بەرۋشىلەردىڭ جاۋاپكەرشىلىگى، قاتىسۋشىلارعا قويىلاتىن تالاپتار، جۇمىس ورىندارىنىڭ ساقتالۋىن قامتاماسىز ەتۋ جانە بولىنگەن بيۋدجەت قاراجاتىن ءتيىمدى پايدالانۋ ماسەلەلەرى كەڭىنەن ءتۇسىندىرىلدى. سونىمەن قاتار، جاستار پراكتيكاسى، قوعامدىق جۇمىستار، الەۋمەتتىك جۇمىس ورىندارى جانە «كۇمىس جاس» جوباسى اياسىنداعى مۇمكىندىكتەر تۋرالى تولىققاندى اقپارات بەرىلدى.
كامشات جانتەكەەۆا وڭىردەگى جۇمىسپەن قامتۋ باعدارلامالارىن ساپالى جۇزەگە اسىرۋدىڭ ماڭىزدىلىعىنا توقتالىپ، جۇمىس بەرۋشىلەردىڭ مەملەكەتتىك قولداۋ شارالارىن ءتيىمدى پايدالانۋ ارقىلى تۇرعىنداردى تۇراقتى جۇمىسپەن قامتۋعا ۇلەس قوسۋى قاجەتتىگىن اتاپ ءوتتى. ال ازامات بالتابەكوۆ الەۋمەتتىك كاسىپكەرلەردى حالىقتى جۇمىسپەن قامتۋ باعىتىنداعى مەملەكەتتىك باستامالارعا بەلسەندى قاتىسۋعا شاقىردى.
كەزدەسۋدە پيلوتتىق رەجيمدە ىسكە اسىرىلىپ جاتقان جاڭاشىلدىقتاردىڭ ءبىرى رەتىندە جۇمىسسىزدىق مارتەبەسىن بەرۋ تارتىبىندەگى وزگەرىستەر دە تانىستىرىلدى. مامانداردىڭ ايتۋىنشا، بۇعان دەيىن 3 جۇمىس كۇنى ىشىندە بەرىلەتىن جۇمىسسىزدىق مارتەبەسى ەندى 13 كۇندىك كەزەڭ ارقىلى ايقىندالماق. بۇل ازاماتتاردى تۇراقتى جۇمىس ورىندارىنا ورنالاستىرۋ مۇمكىندىگىن ارتتىرۋعا جانە ەڭبەك نارىعىنداعى ناقتى جاعدايدى انىقتاۋعا باعىتتالعان.
سوڭىندا كاسىپكەرلەر تولعاندىرعان جۇرگەن سۇراقتارعا تۇسىندىرۋلەر مەن ناقتى جاۋاپتار الدى. اشىق فورماتتا وتكەن جيىن قاتىسۋشىلار اراسىندا ءوزارا تاجىريبە الماسۋعا مۇمكىندىك بەرىپ، مەملەكەت پەن جۇمىس بەرۋشىلەر اراسىنداعى ارىپتەستىكتى ودان ءارى نىعايتۋعا ىقپال ەتتى.
ءاليا يمانجانوۆا،
تالدىقورعان قالاسى
مانساپ ورتالىعى فيليالى
جۇمىسپەن قامتۋ ءبولىمىنىڭ
سەكتور باسشىسى.











