Ońdasyn birde Syiqymbai degen baidyń úiine qonady. Baidyń báibishesi ony qúrt qatqan kójemen jatqyzady. Dastarqan jiylarda Ońdasyn:
Tań atumen kesh batqan,
Kespe kóje qúrt qatqan.
Syiqymbaidyń úiinde,
Ońdasyn bir tún ash jatqan.
Toqtynyń teńi kórmedi,
Súramai qasqar jep jatqan.
Al, ońdasyn otyrma,
Búl aradan tez attan, Allahuakpar, – dep bata berip, túra bergende bai qatty úyalyp, búl sózdiń el auzyna taralyp ketuinen qorqyp, Ońdasyndy taǵy bir qondyryp, malyn soidyryp, shapan kigizip attandyrypty.
Ońdasyn qúrdasy Medeuge:
Qańǵyryp, tentirep kelesiń,
Jaudan jua teresiń.
Qashan aittyń deme sen,
Óstip júrip, ólesiń.
Osy júlǵan shóbińniń,
Kóresisin kóresiń.
Jaǵańnan alsa baqida,
Qaityp jauap beresiń.
Emshimin dep esirip,
Orynsyz keude keresiń.
Áieliń aitsa ol kónbe,
Qúrdasyń aitsa ol kónbe,
Endi kimge kónesiń?, – degende qúrdasy, «Oi, aita beredi ekensiń» dep júre jónelipti.
Sonda Ońdasyn taǵy da:
Qashan bolsa osyny,
Aita berem kózińe.
Qúlaq salmai kettiń sen,
Keńes aitqan sózime.
Ziyandasań shópti endi,
Biz súǵamyn bezińe, – depti.
Otyn ákele jatqan Ońdasynǵa Oralbai degen kisi:
Ei, Ońdasyn, Ońdasyn,
Áulie, pirler qoldasyn.
Kóbirek al otyndy,
Qatyn, balań tońbasyn, – deidi. Sonda Ońdasyn Oralbaidyń jetpisterge kelgen Altynbek degen aǵasyn sózge qosyp:
Ai, Oralbai, Oralbai,
Altynbegiń dobaldai.
Óz teńdesi ketkende,
Naǵyp júr kózi joǵalmai.
Táńir bárin alǵanda,
Seni júr Qúdai almai, – depti. Sodan bylai Oralbai endigi jerde óleńmen sóz aitqandy qoiypty.
Ońdasyn qúrdasy Medeu qaitys bolǵanda bet kórgeli baryp áieline kórisip:
Medeu baiǵús qaramai,
Keshe ketti Mekkege.
Jylaǵan zarlap dauysyń,
Qúlaǵyna jete me.
Aiyryldyq pa tókirden,
Ótti me aman kópirden.
Páni dúnie baqiǵa,
Ákete aldyma ókilden, – dep jylaudyń artyn kúlkige ainaldyryp jiberipti.
Qazynaly qarttardan jazyp alyp, saqtaǵan Andas OMARAQYNÚLY
Derekkóz: Doda: (Aitystar men tarihi-etnografiyalyq jyrlary) / A. Omaraqyn ; [qúrastyrǵan: Á. Majai [j. b.] .- Taldyqorǵan : [b. j.]. https://kazneb.kz/kk/catalogue/view/1657687
“Q-Andas” aqparattyq agenttigi











