Memleket basshysy Atyrauda ótken Últtyq qúryltaida: «Últtyq biregeiligimizdi nyǵaitumen qatar, el qorǵaǵan erlerdiń esimin jadymyzda jańǵyrtu da mańyzdy», – dep atap ótken edi. Egemendiktiń qadir-qasieti – jerdiń tútastyǵy men eldiń tynyshtyǵyna bailanysty.
Osy túrǵydan kelgende tuǵan jerdiń shebin kúzetip, tútastyqty saqtau – árbir azamattyń qasterli paryzy. Taldyqorǵan qalalyq qorǵanys isteri jónindegi basqarmasynyń úiymdastyruymen ótken «Erliktiń dańqy óshpeidi» atty oblystyq áskeri-patriottyq konferentsiyada osy máseleler sóz boldy..
SHara barysynda Taldyqorǵan qalasy qorǵanys isteri jónindegi basqarmasynyń qyzmettik ister bóliminiń bastyǵy Núrsúlu Músabaeva bilim beru úiymdarynda oqushylardyń áskeri oqu ornyna túsuine úgit-nasihat júmysy jáne Erlik sabaqtary túraqty júrgizilip túratynyn aita kelip, 7 mamyr – Otan qorǵaushylar kúni ayasynda «Jastar saraiynda» jasóspirimder arasynda «Men sarbaz bolǵym keledi» atty kezdesu, 9 mamyr – Jeńis kúnine arnalǵan sharalar oblystyq deńgeide úiymdastyrylǵanyn tilge tiek etti. Úly Otan soǵysynyń batyrlary Saǵadat Núrmaǵambetov jáne Raqymjan Qoshqarbaevtyń 100 jyldyǵyna arnalǵan erlik sabaqtary da joǵary deńgeide ótken.
Kelesi kezekte konferentsiyaǵa qatysqan zertteushiler men ólketanushylar Jetisu óńirindegi úly shaiqastar men erlik ister jaily bayandady. Árine, qazaq tarihynyń ár kezeńdegi tarihi oqiǵalarymen enshilesetin Jetisu jeri el qorǵau jolyndaǵy erlik istermen órnektelgen úly shaiqastardyń da mekeni. Arysyn aitsaq, qazaq-jońǵar arasynda oryn alǵan «Orbúlaq» shaiqasynan qazaq jerin basqynshylardan tolyq azat etken Toqta tauyndaǵy Sońǵy shaiqasqa deiingi talai taitalasqan kúrester osy óńirde óristedi. Sondyqtan konferentsiya mazmúny HVII-HIH ǵasyrlarda ómir súrgen qazaq batyrlarynyń úrpaq tárbiesindegi alatyn ornyn aishyqtauǵa baǵyttaldy.
Panfilov audany «Jauyngerlik dańq» muzeiiniń direktory, ólketanushy Qali Ibraiymjanov «Orbúlaq shaiqasy» – erliktiń asyl úlgisi», ólketanushy-jurnalist Qajet Andas «Qyzyljar shaiqasyndaǵy 100 batyrdyń erlik ruhy», geografiya ǵylymdarynyń kandidaty, I. Jansúgirov atyndaǵy Jetisu universitetiniń jaratylystanu joǵary mektebiniń qauymdastyrylǵan prfessory (dotsenti) Erkin Toqpanov «Sońǵy shaiqas oryn alǵan tarihi oryn», áskeri tarihshy Qairat Qaramandaev «Qabanbai batyrdyń soǵys tásilderi» degen taqyryptarda bayandama oqyp, batyrlardyń jaujúrek ruhyn barynsha ashyp kórsetuge tyrysty. Sonymen qatar, jaryssózge shyqqandar qazaq qyzdarynyń da el qorǵau jolyndaǵy erjúrektigin eske aldy. Ólketanushy-kásipker Imash Abdyrahman Qyzyljar shaiqasyndaǵy 100 batyrdyń qatarynda qaza bolǵan Gúlaiym Qúdainazarqyzy turaly aityp, búrymdy batyrdyń esimin mektep oqulyqtaryna engizu turaly úsynys kóterdi. Al Ermyrza batyrdyń úrpaǵy Ánuar Ermyrzaev Alakól óńirinde ótken batyrlar múrasyn túgendep, Alash polkiniń sholǵynshy jasaǵyn basqarǵan Qalen batyrdy nasihattauǵa qatysty oiymen bólisti. Ekinshi dúniejúzilik soǵys pen Auǵan soǵysyna qatysty tyń aqparattar aitqan áskeri tarihshy Qairat Qaramandaevtyń Resei, Qazaqstan, Tájikstan arhivterin aqtaryp júrip, qúrastyrǵan «Bahadúrler» atty kitaby tanystyryldy. Búl eńbekte Ekinshi dúniejúzilik soǵys kezinde Keńes odaǵynyń batyry ataǵyna úsynylǵanmen ala almaǵan 161 adamnyń deregi arhiv qújattary boiynsha jinaqtalǵan. Búl eńbekte jetisulyq 10 batyr turaly da derek bar.
Qorytyndy sóz sóilegen 54380 áskeri bólimi komandiriniń orynbasary Ashat Ospanov konferentsiyanyń joǵary deńgeide ótkenin aita kelip, múndai kezdesudi jiynjailarda ǵana emes, sarbazdardyń arasynda, áskeri bólimshelerde úiymdastyrudyń qajettiligine toqtaldy.
Sońynda birqatar ólketanushy QR Qorǵanys ministriniń jáne Taldyqorǵan qalasy qorǵanys isteri jónindegi basqarmasynyń Alǵys hatymen marapattaldy.
“Jetisu-Aqparat”











