Júmyskerlerdiń eńbek qauipsizdigin qamtamasyz etu máselesine arnalǵan baspasóz máslihaty ótip, osy baǵyttaǵy ózekti máseleler sóz boldy. Búl turaly jetisu oblysy boiynsha memelekettik eńbek inspektsiyasy departamenti basshysynyń orynbasary Erkin Dáuletúly aqparat berdi. Jiynda óndiristik jaraqattanudyń aldyn alu, eńbek qauipsizdigi talaptaryn saqtau jáne júmys berushilerdiń jauapkershiligine qatysty atqarylyp jatqan júmys jaily aityldy.
Óndiristegi jazataiym oqiǵalardyń aldyn aluda eń aldymen qauipsizdik talaptaryn saqtau mańyzdy. Júmysqa kirispes búryn qyzmetker tiisti núsqamadan ótip, júmys ornyndaǵy yqtimal qauiptermen tanysuy qajet. Ásirese, óndiriste elektr togy, qozǵalatyn mehanizmder, auyr jabdyqtar, joǵary temperatura nemese himiyalyq zattar siyaqty faktor qosymsha saqtyqty talap etedi. Múndai jaǵdaida jeke qorǵanys qúraldaryn paidalanu da úlken ról atqarady. Arnaiy kiim, kaska, qolǵap, qorǵanys kózildirigi jáne arnaiy ayaq kiim qyzmetkerdi túrli qauipten qorǵauǵa arnalǵan. Sonymen birge júmys ornyndaǵy tazalyq pen tártipti saqtau, aqauly qúral-jabdyqty paidalanbau jáne qauipsizdik belgisine nazar audaru qajet.
Jazataiym oqiǵalardyń bir bóligi qauipsizdik erejelerin saqtamaudan tuyndasa, endi biri júmysty dúrys úiymdastyrmau, qyzmetkerlerdi jetkilikti oqytpau, tehnikalyq aqaular nemese eńbek tártibin búzumen bailanysty. Sondyqtan eńbek qauipsizdigi tek júmyskerdiń ǵana emes, júmys berushiniń de ortaq jauapkershiligi. Júmys berushi qyzmetkerler úshin qauipsiz eńbek jaǵdaiyn qamtamasyz etip, qajetti qorǵanys qúraldarymen qamtuy jáne eńbek qauipsizdigi boiynsha oqytu men núsqamany túraqty júrgizui tiis. Al júmysker belgilengen talaptardy oryndap, ózine jáne áriptesterine qauip tóndiretin jaǵdailardy der kezinde habarlauy qajet.
Eńbek qauipsizdigine jauapkershilikpen qarau óndiristegi jazataiym oqiǵalardyń aldyn aludyń negizgi joldarynyń biri. Qauipsizdik talaptary kúndelikti júmystyń ajyramas bóligine ainalǵanda ǵana qyzmetkerlerdiń ómiri men densaulyǵyn qorǵauǵa múmkindik molayady.
Aisúlu Bauyrjanqyzy
“Q-Andas” aqparat agentiginiń tilshisi,
Dinara Narymbai
“Q-Andas” aqparat agentiginiń beineoperatory.











