Жазғы демалыс және шомылу маусымының басталуына байланысты Талдықорған – Алакөл бағытындағы көлік қозғалысының қарқындылығы орташа көрсеткіштен жоғарылаған. Бұл бағыттағы республикалық маңызы бар автомобиль жолдарының бойынан тәулігіне 5 тоннадан астам тұрмыстық қалдық пен түрлі қоқыс жиналып, арнайы техникалардың көмегімен шығарылуда.
Жол жиегіне тасталған қалдықтар табиғат көркін бұзып, қоршаған ортаға зиян келтірумен қатар, жол қозғалысының қауіпсіздігіне де кері әсер етуі мүмкін. Әсіресе, демалыс маусымында көлік ағыны артқан кезде жол бойының тазалығын сақтау әрбір жолаушының ортақ міндетіне айналады.
Осыған байланысты «ҚазАвтоЖол» ҰК» АҚ облыстық филиалы барлық жол пайдаланушыларын жол бойына қоқыс тастамауға, белгіленген санитарлық талаптарды сақтауға және табиғатқа жауапкершілікпен қарауға шақырады.
Қоршаған ортаны қорғау мен демалыс орындарына апарар жолдың тазалығы тек арнайы қызметтердің жұмысы емес, әрбір азаматтың мәдениеті мен жауапкершілігіне байланысты.
«Q-Andas» ақпарат агенттігі.











