Баспасөз мәслихаты барысында өңірдегі цифрлық трансформацияның негізгі бағыттары, жүзеге асырылып жатқан жобалар, цифрлық инфрақұрылымды жетілдіру мәселелері және алдағы жоспарлар таныстырылды. Басқарма басшысы цифрландырудың негізгі мақсаты жаңа технологияларды енгізумен ғана шектелмей, тұрғындарға нақты пайдасын тигізіп, мемлекеттік қызметтерді алу үдерісін жеңілдету екенін атап өтті. Қазіргі таңда мемлекеттік қызметтердің басым бөлігін онлайн форматта көрсетуге, азаматтардың қажетті ақпарат пен қызметтерге жедел қол жеткізуіне және қолданыстағы ақпараттық жүйелердің жұмысын жетілдіруге ерекше назар аударылып отыр. Бұл тұрғындардың уақытын үнемдеп, мемлекеттік мекемелерге тікелей бару қажеттілігін азайтып, қызмет көрсету сапасын арттыруға мүмкіндік береді. Сонымен қатар цифрлық технологияларды дамыту облыс орталығы мен қалаларда ғана емес, аудандық және ауылдық елді мекендерде де жүзеге асырылуда. Цифрлық қызметтердің қолжетімділігі азаматтың тұрғылықты жеріне байланысты болмауы тиіс. Осыған байланысты елді мекендердегі интернет сапасын жақсарту, цифрлық инфрақұрылымды дамыту және тұрғындардың заманауи сервистерді пайдалану мүмкіндіктерін кеңейтуге басымдық берілуде. Айдын Жангелдіұлының айтуынша, жаңа сервистер мен ақпараттық жүйелер тұрғындардың нақты қажеттіліктеріне сай болуы қажет. Азамат мемлекеттік қызметті жылдам алып, қажетті ақпаратқа оңай қол жеткізіп, бірқатар мәселені қашықтан шеше алса, бұл цифрлық жобалардың тиімділігін көрсетеді. Жиында халықтың цифрлық сауаттылығын арттыру мәселесіне де назар аударылды. Әсіресе егде жастағы азаматтарға, ауыл тұрғындарына және цифрлық технологияларды пайдалану тәжірибесі аз адамдарға түсіндіру жұмыстарын жүргізудің маңызы атап өтілді.
Өңірде қолға алынған цифрлық бастамалар мемлекеттік органдардың жұмысын оңтайландырып, тұрғындар мен билік арасындағы байланысты жеңілдетуге, қызметтердің ашықтығы мен жеделдігін арттыруға бағытталған. Осылайша цифрландыру Жетісу облысының әлеуметтік-экономикалық дамуына ықпал ететін маңызды бағыттардың біріне айналып отыр.
Айдана Аманжолқызы
“Q-Andas” ақпарат агентігінің тілшісі.
Видео түсірген Жансая Жанарбекқызы.











