Ár kezeńniń óz shejiresi, ár úrpaqtyń úmytpaityn amanaty bar. Ekinshi dúniejúzilik soǵys jyldaryndaǵy maidangerlerdiń erligi men tyl eńbekkerleriniń qajyrly eńbegi – sol amanattyń bir bóligi. «Qajet kitap» jobasynyń kezekti shyǵarylymy osy tarihi kezeń men onyń taǵylymyn qamtyǵan «Erliktiń dańqy, eldiktiń narqy» jinaǵyna arnalǵan.
Jeńistiń 75 jyldyǵyna orai qúrastyrylǵan kitap 2020 jyly Taldyqorǵan qalasyndaǵy «Ofset» baspahanasynda jaryq kórgen. Qúrastyrushylary – Qajet Andas, Raihan Serǵazinova jáne Gauhar Esjanova. Jinaqta Almaty oblystyq ardagerler úiymynyń tarihy men qyzmeti, jetisulyq jauyngerlerdiń maidandaǵy erligi, tyl eńbekkerleriniń Jeńiske qosqan úlesi jáne beibit kezeńde óńirdiń damuyna eńbek sińirgen azamattar turaly derekter toptastyrylǵan.
Posmotretь etu publikatsiyu v Instagram
Kitap avtory Qajet Andastyń aituynsha, búl eńbek Úly Jeńistiń 75 jyldyǵyna orai, 2020 jyly sol kezdegi Almaty oblystyq ardagerler úiymynyń tapsyrysy boiynsha daiyndalǵan.
– Kitapta Úly Otan soǵysy ardagerleriniń erlik joly, olardyń taǵdyry men elge sińirgen eńbegi keńinen qamtyldy. Jinaqtyń úshinshi bólimine Jeńistiń 75 jyldyǵy qarsańynda jáne oǵan deiingi jyldary jaryq kórgen ardagerler turaly materialdar engizildi. Al kitaptyń eń mańyzdy ári qúndy bóligi – tórtinshi bólim dep esepteimin. Óitkeni sol kezeńde Almaty oblysynda Úly Otan soǵysynyń kózi tiri 66 ardageri bar edi. Biz oblystyń 20 audany men qalasyn aralap, osy 66 maidangermen júzbe-júz kezdestik. Olardyń ómir jolyn zerdelep, soǵystaǵy erlikterin, beibit ómirdegi eńbekterin, el damuyna qosqan úlesterin jáne keiingi úrpaqqa aitar ósiet-ónegelerin jinaqtadyq. Osylaisha, ár ardagerdiń taǵdyryn jeke-jeke qamtyp, olardyń estelikterin kitap betinde saqtap qaluǵa tyrystyq. Búl eńbektiń basty qúndylyǵy da osynda. Óitkeni biz tek tarihi derekterdi jinap qana qoiǵan joqpyz, súrapyl soǵysty bastan ótkergen maidangerlerdiń óz auzynan estigen estelikterin keler úrpaqqa jetkizudi maqsat ettik, – deidi kitap avtory Qajet Andas.
Kitaptaǵy ómirbayandar men fotosuretter soǵys jyldarynyń auyrtpalyǵyn jekelegen adamdardyń taǵdyry arqyly tanytady. Olardyń qatarynda maidannan elge oralǵan jauyngerler de, Otanyn qorǵau jolynda qaza tapqan bozdaqtar da bar. Árqaisysynyń ómir joly el basyna túsken syn kezeńniń shejiresin tolyqtyrady.
Jinaqta tyl eńbekkerleriniń eńbegine de nazar audarylǵan. Maidandaǵy jauyngerler qan men ottyń ortasynda shaiqassa, tyldaǵy júrt qajyrly eńbegimen eldiń tirshiligin saqtap, Jeńisti jaqyndatuǵa úles qosty. Osy túrǵydan alǵanda, kitap atauy maidan men tyldyń ortaq múratyn aiqyndaidy: jauyngerler erliktiń dańqyn asyrsa, eńbekkerler eldiktiń narqyn kórsetti. Búl sabaqtastyq jinaqtaǵy soǵystan keiingi beibit eńbek turaly derekterde de jalǵasady.
Eńbektiń mańyzdy bóliginiń biri – Jeńistiń 75 jyldyǵyna aman-esen jetken 66 jetisulyq soǵys ardageriniń ómirbayany men erlik isteri. Olardyń qatarynda Aqsu, Balqash, Eskeldi, Jambyl, Ile, Qaratal, Kerbúlaq, Eńbekshiqazaq, Panfilov, Raiymbek, Sarqan, Talǵar, Kóksu, Úiǵyr audandary men Taldyqorǵan jáne sol kezdegi Qapshaǵai qalasynyń maidangerleri bar. Ardagerlerdiń maidandaǵy jolymen birge, Jeńisten keiingi beibit ómirdegi eńbegi de keiingi úrpaqqa ónege retinde berilgen.
«Erliktiń dańqy, eldiktiń narqy» – ótkenniń ónegesin búginmen sabaqtastyrǵan tarihi-tanymdyq jinaq. Ol qazirgi Almaty jáne Jetisu oblystarynyń túrǵyndaryna jerlesteriniń erligi men eńbegin tereńirek tanuǵa múmkindik beredi. Sondai-aq ólke tarihyn zertteushilerge, soǵys jáne tyl taqyrybynda ǵylymi joba daiyndaityn mektep oqushylaryna qosymsha derekkóz bola alady.
Maidangerler men tyl eńbekkerleriniń esimin, ómir jolyn saqtau – tarihi jadty jańǵyrtudyń mańyzdy bóligi. Osy múratqa qyzmet etetin qúndy eńbekterdi «Qajet kitap» jobasy oqyrmanǵa tanystyrudy jalǵastyrady.
ÁOJ 355/359
KBJ 68.4
ISBN 978-601-7610-84-5
© «7Su-Company» baspasy, 2020 j.
https://kazneb.kz/kk/catalogue/view/1607545
Aisúlu Tóleuhan,
Ólketanushy-jurnalist.
Suretter men beinefilьmdi túsirgen
Ámina Aqylbek.
«Q-Andas» aqparat agentiginiń tilshileri.











