Ótken beisenbidegi berekeli istiń biri taldy qalanyń tórindegi Til saraiynda ótken ruhani shara boldy. Ata basylymda on bes jylǵa juyq eńbek etip kele jatqan áriptesimiz Qajet Andas áke amanatyn oryndap, artynda qalǵan múrasyn jinap, kádege jarar kitapqa ainaldyrdy.
El basyna eki talai kún tuǵanda atajúrttan alystap qalǵan Andas áuleti táuelsizdiktiń araily tańy atqanda táuekel etip, arǵy betten qarǵyp ótken otbasynyń biri. Otaǵasy Andas Omaraqyn qytai elinde jas kezinen últynyń úly qúndylyqtaryn, tarihy men salt-dástúrin dáripteudi perzenttik boryshyna ainaldyrsa kerek. Biraq ol elde de bai balasy, últshyl degen jeleumen oqudan shettetilip, qalamgerlikpen ainalysuǵa múrsha bermeidi. Tipti, 1966 jylǵy mádeni tóńkeriste barlyq qoljazbalary qoldy bolyp, otqa tastalyp, úzaq jylǵy eńbegi zaya ketedi. Últyn súigen úl araǵa jyldar salyp, qaitadan qalamyn qolyna alyp, tarihtyń qatpar betterin aqtaryp, qaǵaz betine qattai bastaidy. Ózi ómir súrgen Ile qazaq oblysynyń Kúnes audanyndaǵy qazaqtardyń tarih tanymyna tereń boilap, qúndy múralaryn kitapqa túsiredi. Andas qariya zerek bolyp óskendikten kieli sóz ónerin janyna serik etip, qiyndyǵy mol qalamgerlik jolda ayanbai eńbek etipti. Ol kisi qara óleńge ǵana olja salmaǵan. Tarihshy, shejireshi, aitysker aqyn da bolǵan.
Artyndaǵy úl-qyzdary ákeniń asyl múrasyn jinaqtap, ayauly jary Áueshan apanyń kóńilin shattandyryp, óshkeni janǵandai kúige jetkizdi. «Ofset» baspahanasynan shyqqan «Tarih talǵarynda», «Doda», «Jyldar izi» atty úsh tomnan túratyn kitaptyń tanystyrylymyna ardagerler alqasy, tanymal aqyn-jazushylar, qoǵam qairatkerleri men juranlister qauymy qatysyp, aqjarma tilegin aityp, áke amanatyn oryndaǵan úrpaǵyna rizashylyq tanytty. Qyzai ruyna arnalǵan tarihi zertteuler men Andas aqynnyń aitystary jáne sol dáuirde ómir súrip, sóz saiysyn qyzdyrǵan aqyndardyń aitystary, shejireler men óleńder jinaǵy úsh tom bolyp oqyrmanǵa jol tarty. Ákege qarap ósken úl Qajet Andastyń perzenttik boryshynyń bir parasyn ótegen osynau igi bastamasy kópke úlgi bolmaq.
“JETISU-AQPARAT”











