Ótkenimizde ózekti órter ókinish mol. Oiǵa tejeu, tilge túsau salǵan qatal tártiptiń saldarynan últym, elim degen qairatkerlerdi «halyq jauy» etken kezeńder boldy, azamattarymyzdy boraǵan oqtyń ótine de attandyrdyq, «Qańǵyp kelgen shúregei elge pana bolmaitynyn bilsek te» ata qonys biligin basqaǵa berip, óz úlymyzdy ózekke teptik, bosyp ta kettik; qara kóz, qolań shash qyzdarymyzdyń búrymy kesilip, kúń bolǵanyna da kóndik, «Úndistershe qańǵytamyn» degenderdiń tepkisine de kóndik. Dese de, últ bolyp saqtalyp qaldyq. Úlan-baitaq dalaǵa, atamekenge qorǵan bola aldyq.
Hakim Abai qara sózderiniń birinde: «Biri – ishsem, jesem, qam-qaiǵysyz ótsem deitin ómir. Al endi biri, naǵyz ómir», – dep adam balasynyń tirshilik jolyn ekige jikteidi. Múndaǵy naǵyz ómir degeni, jalpy adamzattyń qymbat qúndylyqtaryn, azamattyq, kisilik qasietterin baǵalauǵa qaratylsa kerek. Qazaq – zerek, elgezek, tapqyr, batyl halyq. Alaida, otarshyldyqtyń sanamyzǵa sińirgen jat qylyqtarynan áli de aryla almai kele jatqanymyz, «Barǵa qanaǵat, joqqa salauat etetin» qanaǵatshyldyǵymyz, «Aǵaiynnyń aty ozǵansha, auyldastyń taiy ozsyn» deitin jeke múddeshildigimiz, úige kelgen qonaqqa jalǵyz laǵyn soya salatyn jomarttyǵymyz, taǵy basqa qazirgi jahandanudyń jalynyna tótep bere almaityn oǵash qylyqtarymyz kóp júmysqa kedergi bolyp kele jatqany jasyryn emes.
Barlap qarasaq, búgingi kún keshegi dáuirden ózgeshe. Biz geosayasi álemde ómir súrip jatyrmyz, onyń ústine, táuelsiz qazaq eliniń qúraushysy bolyp otyrmyz. Alaida, osynshama jeri bar qazaqtyń kedeilikten aryla almauy, kiiz úidi jasaǵan halyq úrpaǵynyń kirpish kúiyp, ony qalai almaityny, qymyz ben shúbat ashytqan últtyń sudan susyn shyǵara almauy zamanǵa úilespei, namysty órtep, jigerdi kúm etip jatqany da shyndyq. Sonyń saldarynan ruh solǵyn tartty: salǵyrttyq, sayasi tar óristilik, ózimizge senimsizdik, jaltaqtyq, jaqynyn jatkóru, jaǵympazdyq, taǵy basqa jat qylyqtar jaulap barady.
Qazaqstannyń jetken jetistigine qyzǵanyshtyń «qyzyl itin» júgirtip jatqandar da joq emes. Onyń ústine, qazaq dalasy búkil álemdik ekonomika men yntymaqtyń kindigine ainalyp otyr. Sondyqtan árbir qazaq balasy jolbarystai júrekti, arystandai aibatty, «Segiz qyrly, bir syrly» boluy tiis. Óitpese, jahandanudyń jalynyna jútylyp ketuimiz anyq.
Úmit te joq emes. Qazirgi ósip kele jatqan jastarǵa senuge bolady. Alaida, olarǵa ótken ómirdi tyqpalai bermei, «Eńbek etseń emesiń» degen qaǵidany úiretip, el ruhyn kóteretin ózindik bailamyna jol beretin de kez jetken siyaqty. Óitkeni olar – jigeri janshylmaǵan úrpaq jáne tarihtaǵy qandy qyrǵynnyń túiini bolǵan dinderdiń basy toqailasqan dalanyń endigi qojaiyndary. Iá, bizde bári bar, tek qazaqtyń jaujúrek ruhy ǵana kemshin bolyp otyr. Ár últtyń ózindik qalyptasu, kemeldenu barysy bolatyny anyq. Dese de, biz álemdik sayasi ólshemderge sai keletin qazaqy qúndylyqtardy negiz etken memleket qúryp jatqanymyzdy eskersek, qazirgi jastardyń jan-dúniesine tereń úńilip, onyń jigeri men senimin úshtau kerek. Ol seniń de, meniń de, sizdiń de mindetimiz.
Qajet Andas
«Q-andas» aqparattyq agenttigi.











