Jyl basynan beri Jetisu júrty Iliyas Jansúgirovtiń 125 jyldyq mereitoiyna qyzu kirisip ketti. Kúni keshe Taldyqorǵan qalasynda aqyn úrpaqtary, shyǵarmashylyq qauym ókilderi jinalyp, úlken as berildi. Sol igilikti isterdiń jalǵasyndai, ótken aptada Aqsu audandyq Molyqbai atyndaǵy Mádeniet úiinde mektep oqushylary arasyndaǵy HII respublikalyq Iliyas oqulary óte joǵary deńgeide ótip, júrttyń yqylasyna bólendi.
Atalmysh básekege 13 oblys pen qaladan 24 úmitker qatysty. Olar aldymen Iliyas ósken ortanyń kórkem tabiǵatyn tamashalap, kóńilderine kóp oi túidi. SHaranyń ashylu saltanaty Aqsu audanynyń ákimi Esim Bazarhanov pen ziyaly qauym ókilderiniń qatysuymen audandyq Molyqbai atyndaǵy Mádeniet úiinde ótti. Saltanatty basqosuda alǵashqy sóz kezegin alǵan óńir basshysy:
– «Óz eli óz erlerin eskermese, el tegi qaidan alsyn kemeńgerdi» dep sońǵylarǵa úlken úlaǵatty sóz qaldyrǵan Iliyas atamyzdyń shyǵarmashylyq, túlǵalyq qarym-qabiletin úlgi etu Máńgilik El boludyń jolynda eńbek etip jatqan bizder úshin úlken úlgi. Biylǵy baiqau Elbasy, Qazaqstannyń Túńǵysh Prezidenti Núrsúltan Nazarbaevtyń «Ruhani jańǵyru» baǵdarlamasy men «Úly Dalanyń jeti qyry» atty maqalasyndaǵy tapsyrmalardy oryndau negizinde qolǵa alyndy. Meni eń aldymen elimizdiń túkpir-túkpirinen kelgen, Iliyas atamyzdyń múrasyn qúnttap júrgen jastardyń kóp ekendigi quantty. Árine, respublikalyq deńgeidegi baiqaudyń audan ortalyǵynda ótui de jauapty júmys. Sol úshin úmitkerlerdiń úmitin úkileu maqsatynda qoldan kelgenniń bárin jasadyq. Baiqau barysynda bárińniń baptaryń men baqtaryńnyń teń túsip, júldegerler qatarynan kórinulerińe sáttilik tileimin, – dedi ol.
Osydan keiin sharanyń shymyldyǵyn Aqsu audandyq óner mektebiniń shákirtteri ashty. Ónerpaz jastardy tárbieleude úlken nátijelerge jetip, halyqaralyq, respublikalyq deńgeidegi jeńimpazdardy jetildirip júrgen oqu ornynyń shákirtteri baryn saldy. Án aityldy, bi bilendi, kúi shertildi. Eń bastysy, balǵyndardyń taqyldaǵan dauysy, tartymdy erkin de erke qylyqtary kópshilikti tánti etti. Osyndai joǵary kóńil-kúimen bastalǵan báseke tórt kezeńnen túrdy. Aldymen úmitkerler Iliyastyń ózi tańdaǵan bir tuyndysyn mánerlep oqyp shyqty, sosyn qatysushy Iliyas aqynǵa arnauyn kóptiń nazaryna úsyndy, kelesi kezekte Iliyastyń dramaturgiyalyq shyǵarmalarynan kórinis kórsetildi. Sońynda ádilqazylar ár qatysushy aldyn ala qalamger shyǵarmashylyǵy turaly jazǵan jeke shyǵarmashylyǵyn jalyqpai oqyp, árbirin belgilengen shart boiynsha baǵalap shyqty.
Bir aita keterligi, búl retki baiqauda ár qatysushy búrkenshik at qoldandy jáne baǵalaushylardyń qoiǵan baly úlken ekran arqyly kópshilik nazaryna úsynylyp otyrdy. Ashyqtyq bolǵandyqtan júldegerdi anyqtauda búra tartar óreskel jaǵdai oryn alǵan joq. Nátijesinde, Aqsu audany, J.Sydyqov atyndaǵy orta mektep oqushysy Álibek Begimbekúly bas júldeni qanjyǵasyna bailap, óńir ákimi atynan taǵaiyndalǵan 500 myń teńge arnaiy júldeni jeńip aldy.
«Óskendi jerdiń balasy óreli keledi». Ádilbek kópshiliktiń kózinshe ózine tiesili qarajaty Iliyas Jansúgirov atyndaǵy qorǵa úsynatynyn jetkizdi. Birinshi oryndy Aqmola oblysy, Kókshetau qalasynan Ernúr Balmashek, ekinshi orynǵa Mańǵystau oblysynan Jaras Júsipov pen SHymkent qalasynynan Arujan Núradin laiyqty dep tanyldy. Al úshinshi oryndy SHymkent, Almaty, Taldyqorǵan qalasynyń oqushylary qanjyǵasyna bailady.
Qatysushylardyń bárine sertifikat, júldeli orynǵa ie bolǵandarǵa aqshalai syilyq tabystaldy.
Qajet ANDAS
Aqsu audany
Almaty oblysy
