“Jetisu mediya” aqparat alańynda ótken jiynda , avtomobilь joldaryn jóndeu jáne kútip ústau máselelerine arnalǵan baspasóz máslihaty ótti. Jiynǵa «QazAvtoJol» ÚK» AQ Jetisu oblystyq filialynyń direktory Jasúlan Kelimbetúly Qaltaev, oblystyq jolaushylar kóligi jáne avtomobilь joldary basqarmasy basshysynyń orynbasary Aidos Manasúly Dosjanov jáne Jetisu oblysy Politsiya departamenti jol-tehnikalyq inspektsiyasy bóliminiń inspektory Dias Talǵatúly Moldabergenov qatysty. Baspasóz máslihatynda respublikalyq mańyzy bar joldardyń qazirgi jai-kúii, jóndeu júmystary, jol qauipsizdigi, jol boiyndaǵy qyzmet kórsetu sapasy jáne jol paidalanushylarǵa qolaily jaǵdai jasau máseleleri sóz boldy. Sondai-aq kúrdeli jáne ortasha jóndeu júmystarynyń barysy, jol belgilerin ornatu, shúńqyrlardy joyu, kópirler men su ótkizgish qúbyrlardyń tehnikalyq jaǵdaiyn baqylau, sanitarlyq tazalyqty saqtau baǵytyndaǵy júmystar turaly aqparat berildi. Ólketanu túrǵysynan qaraǵanda, jol – jai ǵana qatynas qúraly emes, el ómiriniń ainasy.

Jetisuǵa kelgen jolaushy eń aldymen joldy kóredi. Jol boiyndaǵy janarmai beketi, demalys orny, eskertu belgisi, tarihi eskertkish mańy – bári de óńir turaly alǵashqy áser qalyptastyrady. Sondyqtan joldyń kútimi, tazalyǵy men qauipsizdigi óńir mádenietimen, turizmmen jáne qoǵamdyq jauapkershilikpen tikelei bailanysty ekeni nazarǵa alyndy. Osy oraida «QazAvtoJol» ÚK» AQ Jetisu oblystyq filialynyń direktory Jasúlan Kelimbetúly Qaltaevqa jol boiyndaǵy qyzmet kórsetu sapasyna qatysty súraq qoiyldy. Jetisu oblysyndaǵy keibir janarmai qúyu beketterinde dárethanalardyń áli de aqyly ekeni aitylyp, búl máseleni sheshu boiynsha «QazAvtoJol» qandai júmystar júrgizip jatqany súraldy. Búl súraq jolaushylarǵa jasalatyn qarapaiym jaǵdaidyń ózi óńirdiń jol mádenieti men turistik tartymdylyǵyna áser etetinin kórsetti.

Sonymen qatar oblystyq jolaushylar kóligi jáne avtomobilь joldary basqarmasy basshysynyń orynbasary Aidos Manasúly Dosjanovqa respublikalyq joldar boiyndaǵy tarihi-ruhani eskertkishterdiń saqtaluy men ainalasynyń kútimine qatysty saual joldandy. Jetisu óńirinde jol boiynda kóne qorymdar, tarihi oryndar, el jadynda saqtalǵan jer-su ataulary az emes. Sondyqtan múndai nysandardyń qarausyz qalmauy, ainalasynyń taza boluy jáne tiisti organdarmen birlesken júmys júrgizilui ólketanu úshin mańyzdy másele retinde kóterildi. Baspasóz máslihatynda jol sapasy, qauipsizdik, tazalyq, tarihi nysandardyń kútimi jáne jolaushyǵa qolaily orta qalyptastyru máseleleri jan-jaqty talqylandy. Jol boiyndaǵy árbir nysan, árbir belgi, árbir qauipsizdik sharasy óńirdiń bet-beinesine áser etetini aityldy.
Посмотреть эту публикацию в Instagram
Jetisudyń joly – jai ǵana baǵyt emes. Ol auyl men qalany, tarih pen búgindi, tabiǵat pen turizmdi, adam men mekendi jalǵap túrǵan keńistik. Sondyqtan joldy jóndeu jáne kútip ústau júmystary tek tehnikalyq mindet retinde emes, óńirdiń mádenieti men tarihi kelbetin saqtauǵa qatysty jauapty is retinde qarastyryldy.
Aidana Amanjolqyzy
“Q-Andas” aqparat agentiginiń tilshisi.











