Qaiyrymdylyq – qoǵamdaǵy meiirim men janashyrlyqtyń aiqyn kórinisi. Ásirese el tarihyndaǵy qasiretti kezeńderdi eske alu kúnderinde jasalatyn igi isterdiń tárbielik máni zor. Múndai sharalar ótkenge qúrmet kórsetumen qatar, búgingi úrpaqty adamgershilikke, bauyrmaldyqqa jáne eldik qúndylyqtardy qadirleuge úndeidi.
«Alakól Jeltoqsan ardagerleri» respublikalyq qoǵamdyq birlestigi 1986 jylǵy Jeltoqsan kóierilisine qatysqan azamattardyń erligi men eldik ústanymyn úlyqtauǵa, tarihi jadty jańǵyrtuǵa jáne jas úrpaqqa otansúigishtik tárbie beruge baǵyttalǵan qoǵamdyq úiym.
Birlestik 31 mamyr – Sayasi quǵyn-súrgin jáne asharshylyq qúrbandaryn eske alu kúnine, sondai-aq 16 jeltoqsan – Táuelsizdik kúnine orai qaiyrymdylyq sharalaryn ótkizip túrady.
Biyl da úiym atauly kúnge orai qaiyrymdylyq is-sharasyn úiymdastyryp, Kóksu audany Múqanshy auyldyq okruginiń ortalyǵy Kóksu auylynda túratyn Erbol Ábilmajinov otbasyna kómek kórsetti. Búl otbasynyń jaǵdaiy kópshiliktiń júregin auyrtpai qoimaidy. Jaqynda ǵana balalardyń anasy ómirden ótip, toǵyz bala ana meiiriminsiz qaldy. Bir shańyraqtyń bar jauapkershiligi otbasynyń jalǵyz asyraushysy – otaǵasynyń moinyna túsken. Sonymen birge búl úide 90 jasqa kelgen, kóru qabiletinen aiyrylǵan qart áje de túrady.
Birlestik tóraiymy Lázzat Maqatqyzy búl qaiyrymdylyq sharasynyń máni tereńde ekenin atap ótti.
Посмотреть эту публикацию в Instagram
– Búgin biz Kóksu audany Múqanshy auyldyq okruginde túratyn Erbol Ábilmajinov otbasyna arnaiy kelip, qaiyrymdylyq kómegin kórsetip otyrmyz. Búl shańyraqta toǵyz bala ósip keledi. Bir úidiń quanyshy da, tiregi de bolǵan ananyń orny eshqashan tolmaidy. Ásirese ómirdiń ashysy men túshysyn áli tolyq tanyp úlgermegen balalar úshin búl óte auyr jaǵdai.
Toǵyz balany jetkizu, qart anany kútu, otbasynyń kúndelikti qajettiligin óteu bir adamnyń moinyna túskeni ońai emes. Osyndai jaǵdaidy estigen soń, biz birlestik tarapynan qarap otyra almadyq. Qaiyrymdylyq jasau adamdarǵa materialdyq kómek beru ǵana emes, qiyn sátte jalǵyz emes ekenin sezindiru, janǵa demeu bolu, úmit syilau.
Búgingi igi iske birlestiktiń Jetisu, Almaty, Aqtóbe oblystary men Almaty qalasyndaǵy ókilderi atsalysty. Aldaǵy uaqytta da múndai qaiyrymdylyq sharalary jalǵasyn tabady, – dedi Lázzat Maqatqyzy.
Otbasynyń úlkeni úly Ársen Ábilmajinov te kórsetilgen kómekke rizashylyǵyn bildirip, bauyrlarynyń búginde bir-birine súieu bolyp otyrǵanyn aitty.
– Men kolledj bitirip, áskeri boryshymdy ótep qaittym. Menen keiingi bauyrlarym kolledjde, mektepte oqidy, balabaqshaǵa baratyndary da bar. Árqaisysynyń bolashaǵynan úmitimiz úlken. Biz anamyzdyń amanatyna adal bolyp, bauyrlarymyzdyń bir-birinen ajyramai, jaqsy azamat bolyp ósuin qalaimyz.
Auyl ákimdigi tarapynan da qoldau kórsetilip túrady. Mektepte oqityn bauyrlarym jazǵy lagerьlerge tegin barady, ystyq tamaqpen qamtylǵan. Oqu jyly bastalǵan kezde kiim-keshek, oqu qúraldary jaǵynan da kómek beriledi. Múndai qoldaular bizge úlken demeu.
Búgin arnaiy kelip, jaǵdaiymyzdy súrap, kómek kórsetip jatqan jeltoqsanshy aǵai-apailarǵa otbasymyzdyń atynan kóp-kóp alǵys aitamyn, – deidi ol.
Búl otbasy búginde Múqanshy auyldyq okruginiń ortalyǵy Kóksu auylyndaǵy jaldamaly úide túryp jatyr. Ai saiyn 7 myń teńge kóleminde jaldau aqysyn tóleidi. Alaida toǵyz balanyń «bir kúni osy úiden aiyrylyp qalamyz ba?» degen alańdaushylyǵy oryndy.
Osy máselege qatysty zańger Lyazat Japasheva baspanany jekemenshikke beru múmkindigin zań ayasynda qarastyruǵa bolatynyn aitty.
– Eger búl túrǵyn úi jańadan salynǵan baspana bolsa, qoldanystaǵy tártipke sáikes Otbasy bank arqyly nemese kezek boiynsha múqtaj azamattarǵa beriler edi. Biraq búl úi Keńes odaǵy kezinde salynǵan eski baspana. Sondyqtan otbasynyń áleumettik jaǵdaiyn, balalardyń múddesin jáne úidiń naqty jai-kúiin eskere otyryp, búl máseleni jeke tártippen qarastyruǵa negiz bar.
Ol úshin audandyq qoǵamdyq keńes músheleri, máslihat deputattary, balalar qúqyǵyn qorǵaityn úiym ókilderi jáne tiisti jauapty mekemeler otbasynyń jaǵdaiyn jan-jaqty qarap, ortaq qorytyndyǵa kelui qajet. Sol sheshimniń negizinde audan ákimdiginiń qaulysy arqyly baspanany otbasynyń menshigine beru máselesin zań ayasynda sheshuge bolady. Búl másele jauapty mekemeler tarapynan ádil ári adamgershilik túrǵysynan qaraluy tiis, – dedi zańger Lyazat Japasheva.
Qaiyrymdylyq aktsiyasyna Múqanshy auyldyq okruginiń ákimi Múhit Mamyr da qatysyp otbasynyń jaǵdaiy auyldyq ákimdiktiń túraqty nazarynda ekenin jetkizdi. Sondai-aq qaiyrymdylyq sharasy barysynda kóterilgen úsynystardy tiisti oryndarǵa jetkizip, oń sheshim tabuyna yqpal etuge tyrysatynyn bildirdi.
Atalǵan qaiyrymdylyq sharasy eldik ruhty, azamattyq jauapkershilikti jáne adamgershilik qúndylyqtardy naqty ispen kórsetken taǵylymdy bastama boldy. Múndai igi ister qoǵamda meiirim mádenietin qalyptastyryp qana qoimai, qiyndyqqa tap bolǵan jandarǵa demeu berip, kópshilikke úlgi bolady.
Qajet Andas,
Kóksu auyly,
Kóksu audany.
