قايىرىمدىلىق – قوعامداعى مەيىرىم مەن جاناشىرلىقتىڭ ايقىن كورىنىسى. اسىرەسە ەل تاريحىنداعى قاسىرەتتى كەزەڭدەردى ەسكە الۋ كۇندەرىندە جاسالاتىن يگى ىستەردىڭ تاربيەلىك ءمانى زور. مۇنداي شارالار وتكەنگە قۇرمەت كورسەتۋمەن قاتار، بۇگىنگى ۇرپاقتى ادامگەرشىلىككە، باۋىرمالدىققا جانە ەلدىك قۇندىلىقتاردى قادىرلەۋگە ۇندەيدى.
«الاكول جەلتوقسان ارداگەرلەرى» رەسپۋبليكالىق قوعامدىق بىرلەستىگى 1986 جىلعى جەلتوقسان كويەرىلىسىنە قاتىسقان ازاماتتاردىڭ ەرلىگى مەن ەلدىك ۇستانىمىن ۇلىقتاۋعا، تاريحي جادتى جاڭعىرتۋعا جانە جاس ۇرپاققا وتانسۇيگىشتىك تاربيە بەرۋگە باعىتتالعان قوعامدىق ۇيىم.
بىرلەستىك 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە، سونداي-اق 16 جەلتوقسان – تاۋەلسىزدىك كۇنىنە وراي قايىرىمدىلىق شارالارىن وتكىزىپ تۇرادى.
Посмотреть эту публикацию в Instagram
بيىل دا ۇيىم اتاۋلى كۇنگە وراي قايىرىمدىلىق ءىس-شاراسىن ۇيىمداستىرىپ، كوكسۋ اۋدانى مۇقانشى اۋىلدىق وكرۋگىنىڭ ورتالىعى كوكسۋ اۋىلىندا تۇراتىن ەربول ءابىلماجىنوۆ وتباسىنا كومەك كورسەتتى. بۇل وتباسىنىڭ جاعدايى كوپشىلىكتىڭ جۇرەگىن اۋىرتپاي قويمايدى. جاقىندا عانا بالالاردىڭ اناسى ومىردەن ءوتىپ، توعىز بالا انا مەيىرىمىنسىز قالدى. ءبىر شاڭىراقتىڭ بار جاۋاپكەرشىلىگى وتباسىنىڭ جالعىز اسىراۋشىسى – وتاعاسىنىڭ موينىنا تۇسكەن. سونىمەن بىرگە بۇل ۇيدە 90 جاسقا كەلگەن، كورۋ قابىلەتىنەن ايىرىلعان قارت اجە دە تۇرادى.
بىرلەستىك ءتورايىمى ءلاززات ماقاتقىزى بۇل قايىرىمدىلىق شاراسىنىڭ ءمانى تەرەڭدە ەكەنىن اتاپ ءوتتى.
– بۇگىن ءبىز كوكسۋ اۋدانى مۇقانشى اۋىلدىق وكرۋگىندە تۇراتىن ەربول ءابىلماجىنوۆ وتباسىنا ارنايى كەلىپ، قايىرىمدىلىق كومەگىن كورسەتىپ وتىرمىز. بۇل شاڭىراقتا توعىز بالا ءوسىپ كەلەدى. ءبىر ءۇيدىڭ قۋانىشى دا، تىرەگى دە بولعان انانىڭ ورنى ەشقاشان تولمايدى. اسىرەسە ءومىردىڭ اشىسى مەن تۇشىسىن ءالى تولىق تانىپ ۇلگەرمەگەن بالالار ءۇشىن بۇل وتە اۋىر جاعداي.
توعىز بالانى جەتكىزۋ، قارت انانى كۇتۋ، وتباسىنىڭ كۇندەلىكتى قاجەتتىلىگىن وتەۋ ءبىر ادامنىڭ موينىنا تۇسكەنى وڭاي ەمەس. وسىنداي جاعدايدى ەستىگەن سوڭ، ءبىز بىرلەستىك تاراپىنان قاراپ وتىرا المادىق. قايىرىمدىلىق جاساۋ ادامدارعا ماتەريالدىق كومەك بەرۋ عانا ەمەس، قيىن ساتتە جالعىز ەمەس ەكەنىن سەزىندىرۋ، جانعا دەمەۋ بولۋ، ءۇمىت سىيلاۋ.
بۇگىنگى يگى ىسكە بىرلەستىكتىڭ جەتىسۋ، الماتى، اقتوبە وبلىستارى مەن الماتى قالاسىنداعى وكىلدەرى اتسالىستى. الداعى ۋاقىتتا دا مۇنداي قايىرىمدىلىق شارالارى جالعاسىن تابادى، – دەدى ءلاززات ماقاتقىزى.
وتباسىنىڭ ۇلكەنى ۇلى ارسەن ءابىلماجىنوۆ تە كورسەتىلگەن كومەككە ريزاشىلىعىن ءبىلدىرىپ، باۋىرلارىنىڭ بۇگىندە ءبىر-بىرىنە سۇيەۋ بولىپ وتىرعانىن ايتتى.
– مەن كوللەدج ءبىتىرىپ، اسكەري بورىشىمدى وتەپ قايتتىم. مەنەن كەيىنگى باۋىرلارىم كوللەدجدە، مەكتەپتە وقيدى، بالاباقشاعا باراتىندارى دا بار. ارقايسىسىنىڭ بولاشاعىنان ءۇمىتىمىز ۇلكەن. ءبىز انامىزدىڭ اماناتىنا ادال بولىپ، باۋىرلارىمىزدىڭ ءبىر-بىرىنەن اجىراماي، جاقسى ازامات بولىپ ءوسۋىن قالايمىز.
اۋىل اكىمدىگى تاراپىنان دا قولداۋ كورسەتىلىپ تۇرادى. مەكتەپتە وقيتىن باۋىرلارىم جازعى لاگەرلەرگە تەگىن بارادى، ىستىق تاماقپەن قامتىلعان. وقۋ جىلى باستالعان كەزدە كيىم-كەشەك، وقۋ قۇرالدارى جاعىنان دا كومەك بەرىلەدى. مۇنداي قولداۋلار بىزگە ۇلكەن دەمەۋ.
بۇگىن ارنايى كەلىپ، جاعدايىمىزدى سۇراپ، كومەك كورسەتىپ جاتقان جەلتوقسانشى اعاي-اپايلارعا وتباسىمىزدىڭ اتىنان كوپ-كوپ العىس ايتامىن، – دەيدى ول.
بۇل وتباسى بۇگىندە مۇقانشى اۋىلدىق وكرۋگىنىڭ ورتالىعى كوكسۋ اۋىلىنداعى جالدامالى ۇيدە تۇرىپ جاتىر. اي سايىن 7 مىڭ تەڭگە كولەمىندە جالداۋ اقىسىن تولەيدى. الايدا توعىز بالانىڭ «ءبىر كۇنى وسى ۇيدەن ايىرىلىپ قالامىز با؟» دەگەن الاڭداۋشىلىعى ورىندى.
وسى ماسەلەگە قاتىستى زاڭگەر ليازات جاپاشەۆا باسپانانى جەكەمەنشىككە بەرۋ مۇمكىندىگىن زاڭ اياسىندا قاراستىرۋعا بولاتىنىن ايتتى.
– ەگەر بۇل تۇرعىن ءۇي جاڭادان سالىنعان باسپانا بولسا، قولدانىستاعى تارتىپكە سايكەس وتباسى بانك ارقىلى نەمەسە كەزەك بويىنشا مۇقتاج ازاماتتارعا بەرىلەر ەدى. بىراق بۇل ءۇي كەڭەس وداعى كەزىندە سالىنعان ەسكى باسپانا. سوندىقتان وتباسىنىڭ الەۋمەتتىك جاعدايىن، بالالاردىڭ مۇددەسىن جانە ءۇيدىڭ ناقتى جاي-كۇيىن ەسكەرە وتىرىپ، بۇل ماسەلەنى جەكە تارتىپپەن قاراستىرۋعا نەگىز بار.
ول ءۇشىن اۋداندىق قوعامدىق كەڭەس مۇشەلەرى، ءماسليحات دەپۋتاتتارى، بالالار قۇقىعىن قورعايتىن ۇيىم وكىلدەرى جانە ءتيىستى جاۋاپتى مەكەمەلەر وتباسىنىڭ جاعدايىن جان-جاقتى قاراپ، ورتاق قورىتىندىعا كەلۋى قاجەت. سول شەشىمنىڭ نەگىزىندە اۋدان اكىمدىگىنىڭ قاۋلىسى ارقىلى باسپانانى وتباسىنىڭ مەنشىگىنە بەرۋ ماسەلەسىن زاڭ اياسىندا شەشۋگە بولادى. بۇل ماسەلە جاۋاپتى مەكەمەلەر تاراپىنان ءادىل ءارى ادامگەرشىلىك تۇرعىسىنان قارالۋى ءتيىس، – دەدى زاڭگەر ليازات جاپاشەۆا.
قايىرىمدىلىق اكتسياسىنا مۇقانشى اۋىلدىق وكرۋگىنىڭ اكىمى مۇحيت مامىر دا قاتىسىپ وتباسىنىڭ جاعدايى اۋىلدىق اكىمدىكتىڭ تۇراقتى نازارىندا ەكەنىن جەتكىزدى. سونداي-اق قايىرىمدىلىق شاراسى بارىسىندا كوتەرىلگەن ۇسىنىستاردى ءتيىستى ورىندارعا جەتكىزىپ، وڭ شەشىم تابۋىنا ىقپال ەتۋگە تىرىساتىنىن ءبىلدىردى.
اتالعان قايىرىمدىلىق شاراسى ەلدىك رۋحتى، ازاماتتىق جاۋاپكەرشىلىكتى جانە ادامگەرشىلىك قۇندىلىقتاردى ناقتى ىسپەن كورسەتكەن تاعىلىمدى باستاما بولدى. مۇنداي يگى ىستەر قوعامدا مەيىرىم مادەنيەتىن قالىپتاستىرىپ قانا قويماي، قيىندىققا تاپ بولعان جاندارعا دەمەۋ بەرىپ، كوپشىلىككە ۇلگى بولادى.
قاجەت انداس،
كوكسۋ اۋىلى،
كوكسۋ اۋدانى.
