Qorshaǵan ortanyń tazalyǵy kóbine úlken isten emes, qarapaiym eńbekten bastalady. Aryqty tazalau, shóp shabu, qoqys jinau siyaqty júmys kúndelikti ómirde asa baiqala bermeui múmkin. Alaida osyndai iske jastardyń aralasuy tazalyqqa degen kózqarasty qalyptastyruǵa áser etedi. Biyl Jetisu oblysynda «Jasyl el» eńbek jasaǵy osy baǵyttaǵy júmysyn jalǵastyrdy.
Oblystyq «Jasyl el» menedjeri Rinat Dalelovtyń málimetinshe, mausym aiynda 268 adam júmyspen qamtylǵan. Onyń ishinde 42 student, 80 tehnikalyq bilim beru úiymynyń bilim alushysy, 120 mektep oqushysy jáne 26 júmyssyz azamat bar. SHilde aiynda jobaǵa qatysuǵa niet bildirgender sany 260 adamdy qúraǵan. Mausym aiynda oblystyń 8 audany men 2 qalasynda «Jasyl baq – taza qala», «Tazalyq tyńshysy», «Jaiqalsyn jas terek», «Ekodesant», «Ekosaqshy» siyaqty aktsiyalar úiymdastyrylǵan. Sonymen qatar «Armysyń – ardager», «Úlkenge qúrmet – kishige mindet», «Búl seniń jeriń, taza ústau mindetiń» atty bastama da júzege asqan.

Júrgizilgen júmys nátijesinde, mausym aiynda oblys boiynsha 20 shaqyrym aryq tazalanyp, 10 gektar aumaqta shóp shabylǵan. 5 tonna qoqys jinalǵan. Búl bir ai ishinde atqarylǵan júmystyń naqty kórsetkishi. Degenmen, «Jasyl eldiń» mańyzyn tek osy sandarmen baǵalau jetkiliksiz. Sebebi jobaǵa qatysqan jas úshin búl alǵashqy eńbek tájiribesi. Júmys tártibine beiimdelip, ózine berilgen mindetti oryndau arqyly jauapkershilik qalyptasady. Sondai-aq qorshaǵan ortaǵa úqypty qaraudy úirenedi.
Múny jobaǵa qatysyp júrgen Ǵylymbek Aibektiń aitqanynan ańǵaruǵa bolady. Ol atqarylyp jatqan júmystyń nátijesin kúndelikti kórip, tazalyqqa óz úlesin qosudyń mańyzyn atap ótti.
– Qala jap-jasyl bolyp túrsa, bizge de jaqsy ǵoi. Ainalań jasyl jelekke bólenip túrsa, adamnyń kóńil-kúii de kóteriledi. Al jan-jaǵyń sap-sary bolyp, qurap jatsa, nesi kóńildi? Eldi mekenimizdiń ainalasy jasyl bolyp jainap túruy úshin gúl men aǵashty suǵaryp, shóp shauyp, tazalyq júmystaryna atsalysyp júrmiz. Óz eńbegimizben osyndai ózgeristi kórgende quanyp qalamyz, – deidi Ǵylymbek Aibek.

Jobaǵa ártúrli baǵyttaǵy jas qatysady. Biri oquyn jalǵastyryp júrse, endi biri júmys izdep júrgen boluy múmkin. Olardyń ortaq maqsaty – eńbek etip, ózine qajetti tájiribe jinau. Osy túrǵydan alǵanda, «Jasyl el» jaz mezgilindegi uaqytsha júmystan bólek, eńbekke alǵashqy qadam jasauǵa múmkindik beretin orta. Sonymen birge atqarylǵan júmystyń keiingi jaǵdaiy da mańyzdy. Tazalanǵan aryq qaita bitelmei, jinalǵan qoqys orny qaita lastanbasa, otyrǵyzylǵan kóshetke kútim jasalsa, eńbektiń nátijesi de úzaq saqtalady. Demek, tazalyqty bir rettik júmys emes, túraqty ádetke ainaldyru qajet. «Jasyl eldiń» basty ereksheligi de osynda. Joba bir jaǵynan jastardy eńbekke tartsa, ekinshi jaǵynan tuǵan jerdiń tazalyǵyna jauapkershilikpen qarauǵa úiretedi. Qarapaiym júmystyń ózi osyndai ádet qalyptastyruǵa sebep bolsa, onyń mańyzy da arta túsedi.
Aisúlu Bauyrjanqyzy
“Q-Andas” aqparat agentiginiń tilshisi.











