Облыстық Көркемөнер галереясында Балалар көркемсурет мектебінің түлектеріне арналған салтанатты кеш өтті. Өнерге құштар жас өрендерге арнайы куәліктер табысталып, бірнеше жылдық шығармашылық ізденістері мен еңбектерінің нәтижесі қорытындыланды.
Мазмұнды шараға ұстаздар, ата-аналар, мәдениет саласының өкілдері мен қала тұрғындары қатысты. Кеш барысында мектеп директоры мен оқытушылар түлектерді құттықтап, олардың өнер жолындағы алғашқы қадамдарына сәттілік тіледі. Ұстаздар шәкірттердің сурет салу шеберлігін меңгеріп қана қоймай, эстетикалық талғамы жоғары, шығармашыл тұлға ретінде қалыптасқанын ерекше атап өтті.
Кеш аясында 40 түлектің үздік шығармашылық жұмыстары қойылған арнайы көрме ұйымдастырылды. Көрермендер жас қылқалам шеберлерінің еңбектеріне жоғары баға беріп, туындылардан ұлттық нақыш пен заманауи көзқарастың үйлесімін байқады. Әсіресе туған өлкенің табиғаты, ел өмірі мен ұлттық құндылықтарды бейнелейтін шығармалар көпшіліктің ерекше ықыласына бөленді.
Шара барысында сөз алған өнер өкілдері жас суретшілердің шығармашылығына тоқталып, өнердің қоғамдағы орны мен рухани маңызы жайында тағылымды ойларын ортаға салды.
– Өз суретшілеріміздің туындыларынан тағылым алып, нағыз өнерді тануға ұмтылуымыз керек. Біз оларды қаншалықты дәріптесек, төл мәдениетіміздің де мерейі соншалықты үстем болады. Картина салу жай орындаушылық емес. Туындыға жан бітіру үшін шығармашылық шешім, бояу мен сезім үндесуі қажет. Суретші өз көңіл күйін картинаға бере алғанда ғана шығарма шынайы өнер туындысына айналады. Әр еңбек суретшінің жан дүниесінің бір бөлшегі. Ол өз дәуірінің тынысын болашаққа жеткізетін рухани мұра, – деді кеш барысында сөз алған өнер өкілдерінің бірі.
Шара соңында түлектер ата-аналары мен ұстаздарына алғыстарын білдіріп, болашақта өнер саласында биік белестерді бағындыруға ниетті екендерін жеткізді.
Бұл кеш жас суретшілердің бірнеше жылдық еңбегін саралап, олардың өнер әлеміне жасаған алғашқы қадамын айқындаған тағылымды шара болды. Түлектердің туындылары арқылы ұлттық құндылыққа құрмет, туған жерге сүйіспеншілік және шығармашылық ізденіс айқын көрінді. Мұндай бастамалар жас таланттардың қанатын қатайтып, төл мәдениетіміздің өркендеуіне жол ашады.
Қажет Андас,
«Q-Andas» ақпарат агенттігі.
