“جەتىسۋ مەديا” اقپارات الاڭىندا وتكەن جيىندا ، اۆتوموبيل جولدارىن جوندەۋ جانە كۇتىپ ۇستاۋ ماسەلەلەرىنە ارنالعان ءباسپاسوز ءماسليحاتى ءوتتى. جيىنعا «قازاۆتوجول» ۇك» اق جەتىسۋ وبلىستىق فيليالىنىڭ ديرەكتورى جاسۇلان كەلىمبەتۇلى قالتاەۆ، وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس ماناسۇلى دوسجانوۆ جانە جەتىسۋ وبلىسى پوليتسيا دەپارتامەنتى جول-تەحنيكالىق ينسپەكتسياسى ءبولىمىنىڭ ينسپەكتورى دياس تالعاتۇلى مولدابەرگەنوۆ قاتىستى. ءباسپاسوز ءماسليحاتىندا رەسپۋبليكالىق ماڭىزى بار جولداردىڭ قازىرگى جاي-كۇيى، جوندەۋ جۇمىستارى، جول قاۋىپسىزدىگى، جول بويىنداعى قىزمەت كورسەتۋ ساپاسى جانە جول پايدالانۋشىلارعا قولايلى جاعداي جاساۋ ماسەلەلەرى ءسوز بولدى. سونداي-اق كۇردەلى جانە ورتاشا جوندەۋ جۇمىستارىنىڭ بارىسى، جول بەلگىلەرىن ورناتۋ، شۇڭقىرلاردى جويۋ، كوپىرلەر مەن سۋ وتكىزگىش قۇبىرلاردىڭ تەحنيكالىق جاعدايىن باقىلاۋ، سانيتارلىق تازالىقتى ساقتاۋ باعىتىنداعى جۇمىستار تۋرالى اقپارات بەرىلدى. ولكەتانۋ تۇرعىسىنان قاراعاندا، جول – جاي عانا قاتىناس قۇرالى ەمەس، ەل ءومىرىنىڭ ايناسى.
جەتىسۋعا كەلگەن جولاۋشى ەڭ الدىمەن جولدى كورەدى. جول بويىنداعى جانارماي بەكەتى، دەمالىس ورنى، ەسكەرتۋ بەلگىسى، تاريحي ەسكەرتكىش ماڭى – ءبارى دە ءوڭىر تۋرالى العاشقى اسەر قالىپتاستىرادى. سوندىقتان جولدىڭ كۇتىمى، تازالىعى مەن قاۋىپسىزدىگى ءوڭىر مادەنيەتىمەن، تۋريزممەن جانە قوعامدىق جاۋاپكەرشىلىكپەن تىكەلەي بايلانىستى ەكەنى نازارعا الىندى. وسى ورايدا «قازاۆتوجول» ۇك» اق جەتىسۋ وبلىستىق فيليالىنىڭ ديرەكتورى جاسۇلان كەلىمبەتۇلى قالتاەۆقا جول بويىنداعى قىزمەت كورسەتۋ ساپاسىنا قاتىستى سۇراق قويىلدى. جەتىسۋ وبلىسىنداعى كەيبىر جانارماي قۇيۋ بەكەتتەرىندە دارەتحانالاردىڭ ءالى دە اقىلى ەكەنى ايتىلىپ، بۇل ماسەلەنى شەشۋ بويىنشا «قازاۆتوجول» قانداي جۇمىستار جۇرگىزىپ جاتقانى سۇرالدى. بۇل سۇراق جولاۋشىلارعا جاسالاتىن قاراپايىم جاعدايدىڭ ءوزى ءوڭىردىڭ جول مادەنيەتى مەن تۋريستىك تارتىمدىلىعىنا اسەر ەتەتىنىن كورسەتتى.
سونىمەن قاتار وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس ماناسۇلى دوسجانوۆقا رەسپۋبليكالىق جولدار بويىنداعى تاريحي-رۋحاني ەسكەرتكىشتەردىڭ ساقتالۋى مەن اينالاسىنىڭ كۇتىمىنە قاتىستى ساۋال جولداندى. جەتىسۋ وڭىرىندە جول بويىندا كونە قورىمدار، تاريحي ورىندار، ەل جادىندا ساقتالعان جەر-سۋ اتاۋلارى از ەمەس. سوندىقتان مۇنداي نىسانداردىڭ قاراۋسىز قالماۋى، اينالاسىنىڭ تازا بولۋى جانە ءتيىستى ورگاندارمەن بىرلەسكەن جۇمىس جۇرگىزىلۋى ولكەتانۋ ءۇشىن ماڭىزدى ماسەلە رەتىندە كوتەرىلدى. ءباسپاسوز ءماسليحاتىندا جول ساپاسى، قاۋىپسىزدىك، تازالىق، تاريحي نىسانداردىڭ كۇتىمى جانە جولاۋشىعا قولايلى ورتا قالىپتاستىرۋ ماسەلەلەرى جان-جاقتى تالقىلاندى. جول بويىنداعى ءاربىر نىسان، ءاربىر بەلگى، ءاربىر قاۋىپسىزدىك شاراسى ءوڭىردىڭ بەت-بەينەسىنە اسەر ەتەتىنى ايتىلدى.
Посмотреть эту публикацию в Instagram
جەتىسۋدىڭ جولى – جاي عانا باعىت ەمەس. ول اۋىل مەن قالانى، تاريح پەن بۇگىندى، تابيعات پەن ءتۋريزمدى، ادام مەن مەكەندى جالعاپ تۇرعان كەڭىستىك. سوندىقتان جولدى جوندەۋ جانە كۇتىپ ۇستاۋ جۇمىستارى تەك تەحنيكالىق مىندەت رەتىندە ەمەس، ءوڭىردىڭ مادەنيەتى مەن تاريحي كەلبەتىن ساقتاۋعا قاتىستى جاۋاپتى ءىس رەتىندە قاراستىرىلدى.
ايدانا امانجولقىزى
“Q-Andas” اقپارات اگەنتىگىنىڭ ءتىلشىسى.











