وبلىستىق اۋىل شارۋاشىلىعى باسقارماسىنىڭ ءبولىم باسشىسى مۇرات تىلەۋباەۆ، «بەرەكە» بانكىنىڭ جەتىسۋ وبلىستىق فيليالى كورپوراتيۆتىك كليەنتتەردى قارجىلاندىرۋ ءبولىمىنىڭ باستىعى باقىتجان باحقوجا جانە «اگرارلىق نەسيە كورپوراتسياسى» اق جەتىسۋ وبلىسى بويىنشا فيليالىنىڭ ءبولىم باسشىسى ۇلان كۇزدەۋباەۆ «يگىلىك»، «بەرەكە» جانە «جايلاۋ» باعدارلاماماسىنىڭ جۇزەگە اسۋ بارىسىن تانىستىردى.
مال شارۋاشىلىعىن دامىتۋعا، اۋىل تۇرعىندارىنىڭ كاسىپ باستاۋىنا جانە جۇمىس ىستەپ تۇرعان شارۋاشىلىقتاردىڭ الەۋەتىن ارتتىرۋعا باعىتتالعان. باعدارلامالار ارقىلى فەرمەرلەر اسىل تۇقىمدى ءىرى قارا مەن ۇساق مال ساتىپ الىپ، مال باسىن كوبەيتۋگە، ءوندىرىس كولەمىن ۇلعايتۋعا جانە شارۋاشىلىقتىڭ ماتەريالدىق-تەحنيكالىق بازاسىن نىعايتۋعا مۇمكىندىك الادى. سونىمەن قاتار، جيىن بارىسىندا نەسيە الۋ تالاپتارى، قارجىلاندىرۋ كولەمى، سىياقى مولشەرلەمەلەرى، وتەۋ مەرزىمدەرى جانە ءوتىنىم بەرۋ ءتارتىبى جان-جاقتى ءتۇسىندىرىلدى.
Посмотреть эту публикацию в Instagram
سالا ماماندارى مەملەكەتتىك قولداۋ شارالارىنىڭ اۋىلداعى كاسىپكەرلىكتى دامىتۋعا تىڭ سەرپىن بەرىپ، ازىق-تۇلىك قاۋىپسىزدىگىن قامتاماسىز ەتۋگە جانە اۋىل ەكونوميكاسىنىڭ تۇراقتى دامۋىنا وڭ ىقپال ەتەتىنىن اتاپ ءوتتى. جۋرناليستەر تاراپىنان بىرقاتار وزەكتى سۇراقتار قويىلدى. اتاپ ايتقاندا، شەتەلدەن اسىل تۇقىمدى مال ساتىپ الۋدىڭ تيىمدىلىگى، يمپورتتىق مالدى جاڭا نەسيەلىك باعدارلامالار ارقىلى قارجىلاندىرۋ مۇمكىندىگى، ولاردىڭ جەرگىلىكتى كليماتقا بەيىمدەلۋى جانە مۇنداي ينۆەستيتسيانىڭ شارۋاشىلىقتارعا بەرەتىن پايداسى تالقىلاندى.
مامانداردىڭ ايتۋىنشا، ونىمدىلىگى جوعارى اسىل تۇقىمدى مالدى ساتىپ الۋ ۇزاق مەرزىمدى پەرسپەكتيۆادا ەت پەن ءسۇت ءوندىرىسىنىڭ كولەمىن ارتتىرىپ، شارۋاشىلىقتاردىڭ تابىسىن كوبەيتۋگە مۇمكىندىك بەرەدى. دەگەنمەن، مالدى تاڭداۋ كەزىندە ءوڭىردىڭ تابيعي-كليماتتىق ەرەكشەلىكتەرى مەن كۇتىپ-باعۋ تالاپتارىن ەسكەرۋ ماڭىزدى ەكەنى ايتىلدى.
سوڭىندا ءبىز دە ءوزىمىزدى تولعاندىرعان سۇراقتارعا تولىققاندى جاۋاپ الىپ، جاڭا باعدارلامالاردىڭ اۋىل تۇرعىندارى ءۇشىن قولجەتىمدىلىگى مەن تيىمدىلىگى تۋرالى جان-جاقتى اقپاراتقا قانىقتىق. جاڭا نەسيەلىك باعدارلامالاردىڭ ماڭىزدى ەرەكشەلىكتەرىنىڭ ءبىرى – اۋىلدىق جەرلەردەگى شاعىن جانە ورتا شارۋاشىلىقتاردى قارجىلاندىرۋعا باسىمدىق بەرىلۋى. بۇل اۋىل تۇرعىندارىنا ءوز كاسىبىن اشۋعا، وتباسىلىق شارۋاشىلىقتى كەڭەيتۋگە جانە تۇراقتى تابىس كوزىن قالىپتاستىرۋعا مۇمكىندىك بەرەدى. قارجىلاندىرۋمەن قاتار، ءوتىنىم بەرۋشىلەرگە قاجەتتى قۇجاتتاردى راسىمدەۋ، بيزنەس-جوسپار ازىرلەۋ جانە نەسيە قاراجاتىن ءتيىمدى پايدالانۋ بويىنشا ءتۇسىندىرۋ جۇمىستارى جۇرگىزىلمەك. ماماندار شارۋالارعا باعدارلامالاردىڭ تالاپتارىن الدىن الا مۇقيات زەردەلەپ، ءوز مۇمكىندىكتەرىنە سايكەس ءتيىمدى باعىتتى تاڭداۋعا كەڭەس بەردى.
ايدانا امانجولقىزى
دينارا نارىمباي
«Q-Andas اقپارات اگەنتتىگىنىڭ تىلشىلەرى.











