قورشاعان ورتانىڭ تازالىعى كوبىنە ۇلكەن ىستەن ەمەس، قاراپايىم ەڭبەكتەن باستالادى. ارىقتى تازالاۋ، ءشوپ شابۋ، قوقىس جيناۋ سياقتى جۇمىس كۇندەلىكتى ومىردە اسا بايقالا بەرمەۋى مۇمكىن. الايدا وسىنداي ىسكە جاستاردىڭ ارالاسۋى تازالىققا دەگەن كوزقاراستى قالىپتاستىرۋعا اسەر ەتەدى. بيىل جەتىسۋ وبلىسىندا «جاسىل ەل» ەڭبەك جاساعى وسى باعىتتاعى جۇمىسىن جالعاستىردى.
وبلىستىق «جاسىل ەل» مەنەدجەرى رينات دالەلوۆتىڭ مالىمەتىنشە، ماۋسىم ايىندا 268 ادام جۇمىسپەن قامتىلعان. ونىڭ ىشىندە 42 ستۋدەنت، 80 تەحنيكالىق ءبىلىم بەرۋ ۇيىمىنىڭ ءبىلىم الۋشىسى، 120 مەكتەپ وقۋشىسى جانە 26 جۇمىسسىز ازامات بار. شىلدە ايىندا جوباعا قاتىسۋعا نيەت بىلدىرگەندەر سانى 260 ادامدى قۇراعان. ماۋسىم ايىندا وبلىستىڭ 8 اۋدانى مەن 2 قالاسىندا «جاسىل باق – تازا قالا»، «تازالىق تىڭشىسى»، «جايقالسىن جاس تەرەك»، «ەكودەسانت»، «ەكوساقشى» سياقتى اكتسيالار ۇيىمداستىرىلعان. سونىمەن قاتار «ارمىسىڭ – ارداگەر»، «ۇلكەنگە قۇرمەت – كىشىگە مىندەت»، «بۇل سەنىڭ جەرىڭ، تازا ۇستاۋ مىندەتىڭ» اتتى باستاما دا جۇزەگە اسقان.

جۇرگىزىلگەن جۇمىس ناتيجەسىندە، ماۋسىم ايىندا وبلىس بويىنشا 20 شاقىرىم ارىق تازالانىپ، 10 گەكتار اۋماقتا ءشوپ شابىلعان. 5 توننا قوقىس جينالعان. بۇل ءبىر اي ىشىندە اتقارىلعان جۇمىستىڭ ناقتى كورسەتكىشى. دەگەنمەن، «جاسىل ەلدىڭ» ماڭىزىن تەك وسى ساندارمەن باعالاۋ جەتكىلىكسىز. سەبەبى جوباعا قاتىسقان جاس ءۇشىن بۇل العاشقى ەڭبەك تاجىريبەسى. جۇمىس تارتىبىنە بەيىمدەلىپ، وزىنە بەرىلگەن مىندەتتى ورىنداۋ ارقىلى جاۋاپكەرشىلىك قالىپتاسادى. سونداي-اق قورشاعان ورتاعا ۇقىپتى قاراۋدى ۇيرەنەدى.
مۇنى جوباعا قاتىسىپ جۇرگەن عىلىمبەك ايبەكتىڭ ايتقانىنان اڭعارۋعا بولادى. ول اتقارىلىپ جاتقان جۇمىستىڭ ناتيجەسىن كۇندەلىكتى كورىپ، تازالىققا ءوز ۇلەسىن قوسۋدىڭ ماڭىزىن اتاپ ءوتتى.
– قالا جاپ-جاسىل بولىپ تۇرسا، بىزگە دە جاقسى عوي. اينالاڭ جاسىل جەلەككە بولەنىپ تۇرسا، ادامنىڭ كوڭىل-كۇيى دە كوتەرىلەدى. ال جان-جاعىڭ ساپ-سارى بولىپ، قۋراپ جاتسا، نەسى كوڭىلدى؟ ەلدى مەكەنىمىزدىڭ اينالاسى جاسىل بولىپ جايناپ تۇرۋى ءۇشىن گۇل مەن اعاشتى سۋعارىپ، ءشوپ شاۋىپ، تازالىق جۇمىستارىنا اتسالىسىپ ءجۇرمىز. ءوز ەڭبەگىمىزبەن وسىنداي وزگەرىستى كورگەندە قۋانىپ قالامىز، – دەيدى عىلىمبەك ايبەك.

جوباعا ءارتۇرلى باعىتتاعى جاس قاتىسادى. ءبىرى وقۋىن جالعاستىرىپ جۇرسە، ەندى ءبىرى جۇمىس ىزدەپ جۇرگەن بولۋى مۇمكىن. ولاردىڭ ورتاق ماقساتى – ەڭبەك ەتىپ، وزىنە قاجەتتى تاجىريبە جيناۋ. وسى تۇرعىدان العاندا، «جاسىل ەل» جاز مەزگىلىندەگى ۋاقىتشا جۇمىستان بولەك، ەڭبەككە العاشقى قادام جاساۋعا مۇمكىندىك بەرەتىن ورتا. سونىمەن بىرگە
اتقارىلعان جۇمىستىڭ كەيىنگى جاعدايى دا ماڭىزدى. تازالانعان ارىق قايتا بىتەلمەي، جينالعان قوقىس ورنى قايتا لاستانباسا، وتىرعىزىلعان كوشەتكە كۇتىم جاسالسا، ەڭبەكتىڭ ناتيجەسى دە ۇزاق ساقتالادى. دەمەك، تازالىقتى ءبىر رەتتىك جۇمىس ەمەس، تۇراقتى ادەتكە اينالدىرۋ قاجەت. «جاسىل ەلدىڭ» باستى ەرەكشەلىگى دە وسىندا. جوبا ءبىر جاعىنان جاستاردى ەڭبەككە تارتسا، ەكىنشى جاعىنان تۋعان جەردىڭ تازالىعىنا جاۋاپكەرشىلىكپەن قاراۋعا ۇيرەتەدى. قاراپايىم جۇمىستىڭ ءوزى وسىنداي ادەت قالىپتاستىرۋعا سەبەپ بولسا، ونىڭ ماڭىزى دا ارتا تۇسەدى.
ايسۇلۋ باۋىرجانقىزى
“Q-Andas” اقپارات اگەنتىگىنىڭ ءتىلشىسى.











