ەسكەلدى اۋداندىق كىتاپحاناسىندا جۋرناليست، ولكەتانۋشى، «جەتىسۋ ولكەتانۋشىلار ورتالىعى» قوعامدىق بىرلەستىگىنىڭ ديرەكتورى، Q-Andas اقپارات اگەنتتىگىنىڭ باس رەداكتورى قاجەت انداسپەن كەزدەسۋ ءوتتى، دەپ حابارلايدى Q-Andas اقپارات اگەنتتىگى.
Посмотреть эту публикацию в Instagram
2026 جىلعى 6 قاراشادا ۇيىمداستىرىلعان «ولكە شەجىرەسىن سويلەتكەن قالامگەر» اتتى كەشتە تۋعان جەر تاريحىن زەرتتەۋ، ادەبي مۇرانى تانىتۋ جانە تاريحي جادتى ساقتاۋ ماسەلەلەرى ءسوز بولدى. جۇزدەسۋ قالامگەردىڭ شىعارماشىلىق ەڭبەگىن وقىرماندارعا تانىستىرىپ، جاس ۇرپاقتىڭ ولكە تاريحىنا قىزىعۋشىلىعىن ارتتىرۋدى ماقسات ەتتى.
كەشتى ۇيىمداستىرۋعا ەسكەلدى اۋداندىق كىتاپحاناسىنىڭ مەڭگەرۋشىسى باقىتگۇل تويلىبەكوۆا، كىتاپحاناشىلار ايمان نايزابەكوۆ، مەرۋەرت بەكمىرزا جانە روزا ابدىراحمانقىزى اتسالىستى. كىتاپحانا ۇجىمى قالامگەر مەن وقىرماننىڭ ەركىن پىكىر الماسۋىنا جاعداي جاساپ، مازمۇندى جۇزدەسۋگە ۇيىتقى بولدى.
قاجەت انداس وسى ۋاقىتقا دەيىن جەكە اۆتور، بىرلەسكەن اۆتور جانە قۇراستىرۋشى رەتىندە 64 كىتاپتىڭ جارىق كورۋىنە ەڭبەك سىڭىرگەن. قازىرگى تاڭدا ونىڭ 37 كىتابى ەلەكتروندى كىتاپ كاتالوگىنا ەنگىزىلىپ، وقىرماندارعا قولجەتىمدى بولىپ وتىر. ولكەتانۋ جانە ساياسي قۋعىن-سۇرگىن تاقىرىبىنداعى ەڭبەكتەرىن زەرتتەۋشىلەر دەرەك كوزى رەتىندە پايدالانىپ ءجۇر.
قالامگەردىڭ ولكەتانۋ باعىتىنداعى زەرتتەۋلەرىندە جەتىسۋدىڭ ەلدى مەكەندەرى، جەر-سۋ اتاۋلارى، تاريحي ورىندارى، جارتاس سۋرەتتەرى مەن مادەني مۇراسى قامتىلادى. ول اۋىل شەجىرەسىن سول جەردە ءومىر سۇرگەن ادامداردىڭ تاعدىرىمەن بايلانىستىرىپ، جەرگىلىكتى تاريحتى ارحيۆ قۇجاتتارى، اۋىزشا دەرەكتەر جانە ساپار بارىسىندا جينالعان ماتەريالدار ارقىلى زەردەلەيدى. بۇل ەڭبەكتەر ءوڭىردىڭ وتكەنىن تانىپ-بىلۋگە، ەل جادىنداعى مالىمەتتەردى جيناقتاپ، كەيىنگى ۇرپاققا جەتكىزۋگە باعىتتالعان.
زەرتتەۋلەرىنىڭ ماڭىزدى ارناسى – ساياسي قۋعىن-سۇرگىن، تاركىلەۋ، اشارشىلىق جانە بوسقىنشىلىق تاريحى. اۆتور وسى كەزەڭدەردەگى ادام تاعدىرلارىن ارحيۆتىك قۇجاتتارمەن جانە حالىق جادىندا ساقتالعان ەستەلىكتەرمەن ساباقتاستىرا قاراستىرادى. جەكە ادامدار مەن وتباسىلاردىڭ تاريحىن جيناقتاۋ ارقىلى وڭىردەگى قاسىرەتتى وقيعالاردىڭ زاردابىن ناقتى دەرەكتەر نەگىزىندە تانىتۋعا كوڭىل بولەدى.
كەزدەسۋدە قالامگەردىڭ ءىلياستانۋ سالاسىنداعى ەڭبەگىنە دە نازار اۋدارىلدى. ونىڭ بۇل باعىتتاعى ىزدەنىستەرى ءىلياس جانسۇگىروۆتىڭ جۋرناليستىك قىزمەتى مەن باسپاسوزدە جاريالانعان مۇراسىن زەردەلەۋدى قامتيدى. ەسكى گازەت-جۋرنالدارداعى ماتىندەردى ىزدەستىرۋ، بۇركەنشىك اتپەن شىققان تۋىندىلاردى سالىستىرىپ انىقتاۋ، اراب قارپىندەگى جازبالاردى كيريلل جازۋىنا ءتۇسىرۋ جۇمىستارى اقىن شىعارماشىلىعىنىڭ از زەرتتەلگەن قىرلارىن تانىتۋعا مۇمكىندىك بەرەدى.
تاريحي ءباسپاسوزدى زەرتتەۋ مەن اۋدارماشىلىق قىزمەت تە قالامگەر ەڭبەگىندە ءوزارا ساباقتاسادى. حح عاسىر باسىنداعى قازاق جانە وزگە دە ورتالىق ازيا حالىقتارىنىڭ مەرزىمدى باسىلىمدارىن قاراستىرۋ ارقىلى ول تاريحي وقيعالاردىڭ سول داۋىردەگى كورىنىسىن، قوعامدىق پىكىر مەن ۇلت ازاتتىعى يدەياسىنىڭ تارالۋىن زەردەلەيدى. ادەبي مۇرالاردى جيناقتاۋ، قولجازبالاردى باسپاعا دايىنداۋ جۇمىستارى ارقىلى كوپشىلىككە كەڭىنەن تانىلا قويماعان شىعارمالاردى وقىرمانعا ۇسىنادى.
ال كوركەم جانە پۋبليتسيستيكالىق تۋىندىلارىندا وتباسى قۇندىلىقتارى، اكە ونەگەسى، تۋعان جەرگە سۇيىسپەنشىلىك، اۋىل تىرشىلىگى مەن كوشى-قون ماسەلەلەرى كورىنىس تابادى. ادامداردىڭ كۇندەلىكتى ءومىرى مەن ەڭبەك جولىن بايانداۋ ارقىلى اۆتور ءوڭىردىڭ الەۋمەتتىك وزگەرىستەرىن دە كورسەتەدى.
قاجەت انداس – ەسكەلدى اۋدانىنىڭ تاريحى مەن بۇگىنگى تىنىس-تىرشىلىگى تۋرالى ۇزبەي جازىپ كەلە جاتقان قالامگەر. قوڭىر، نۇرا، اقىن سارا جانە باقتىباي اۋىلدارىنا ارنالعان زەرتتەۋلەرى مەن ماقالالارىندا ەلدى مەكەندەردىڭ وتكەنى، مادەني ءومىرى جانە الەۋمەتتىك ماسەلەلەرى قامتىلعان. نۇرانىڭ تاريحىن ارحيۆتىك دەرەكتەر مەن ەل جادىنداعى ەستەلىكتەر ارقىلى زەردەلەپ، اشارشىلىق قۇرباندارىن ۇلىقتاۋ قاجەتتىگىن العا تارتادى.
سونىمەن قاتار ەسكەلدى اۋدانى اۋماعىنداعى جالايىر شورا، اسان سيىق اۋليە سىندى تاريحي تۇلعالار، سىرىمبەت قىرعىنى، اشارشىلىق پەن تاركىلەۋ زارداپتارى جانە ساياسي قۋعىن-سۇرگىنگە ۇشىراعان ادامداردىڭ تاعدىرى تۋرالى تاريحي-تانىمدىق زەرتتەۋلەر جۇرگىزىپ كەلەدى. اقىن سارا مەن باقتىباي جولبارىسۇلىنىڭ مۇراسىن ناسيحاتتاۋعا ارنالعان جازبالارىندا ولاردىڭ ونەگەسىن جاس ۇرپاققا جەتكىزۋ جولدارىن ۇسىنادى. اۋدان ومىرىندەگى وزەكتى ماسەلەلەردى كوتەرۋمەن قاتار، ۇسىنىستارىنىڭ ەسكەرىلۋىن قاداعالاپ، ءتيىستى مەكەمەلەردىڭ جاۋاپتارىن وقىرمانعا جەتكىزىپ وتىرادى.
جۇزدەسۋگە ەسكەلدى اۋدانىنداعى مەكتەپتەردە تاريح جانە گەوگرافيا پاندەرىنەن ساباق بەرەتىن مۇعالىمدەر ايات كوبەحان، اراي احمەتجانوۆا جانە اراي ماناسقىزى دا قاتىستى. ۇستازدار اڭگىمەگە بەلسەنە ارالاسىپ، ورامدى ويلارى مەن ۇتقىر ۇسىنىستارىن ورتاعا سالدى.
ولكەتانۋ ەڭبەكتەرىنىڭ ءبىلىم بەرۋ ىسىندەگى ورنى دا وسىنداي كەزدەسۋلەردە ايقىندالا تۇسەدى. اۋىل تاريحى، جەر-سۋ اتاۋلارى، تاريحي تۇلعالار مەن مادەني مۇرا تۋرالى دەرەكتەر تاريح جانە گەوگرافيا ساباقتارىن جەرگىلىكتى ماتەريالدارمەن تولىقتىرۋعا مۇمكىندىك بەرەدى. وقۋشىعا تانىس مەكەننىڭ وتكەنى ارقىلى ەل تاريحىن ءتۇسىندىرۋ تۋعان جەرگە دەگەن قىزىعۋشىلىق پەن جاۋاپكەرشىلىكتى قالىپتاستىرۋعا كومەكتەسەدى.
ەركىن سۇحبات بارىسىندا وقىرماندار قالامگەرگە كوكەيلەرىندەگى ساۋالدارىن قويىپ، جاۋاپ الدى. قوناق شىعارماشىلىق ىزدەنىستەرى مەن ومىرلىك تاجىريبەسى تۋرالى اڭگىمەلەپ، زەرتتەۋشىلىك جۇمىسىنىڭ ەرەكشەلىكتەرىمەن ءبولىستى.
كەش اياسىندا «تۋعان ولكە تاريحى – ۇرپاققا امانات» اتتى كىتاپ كورمەسى تانىستىرىلدى. كورمەگە جاسالعان شولۋ قاتىسۋشىلارعا قالامگەر ەڭبەكتەرىنىڭ تاقىرىپتىق اۋقىمىن جاقىنىراق تانىپ، تۋعان جەر تاريحى مەن ادەبي مۇرا تۋرالى ءبىلىمىن تولىقتىرۋعا مۇمكىندىك بەردى.
ەسكەلدى اۋداندىق كىتاپحاناسىنداعى جۇزدەسۋ قالامگەر، ۇستازدار جانە وقىرماندار اراسىنداعى مازمۇندى پىكىر الماسۋعا ۇلاستى. تۋعان جەردىڭ شەجىرەسىن جيناقتاۋ، تاريحي جادتى ساقتاۋ جانە زەرتتەۋ ەڭبەكتەرىن جاس ۇرپاقتىڭ يگىلىگىنە جاراتۋ ماسەلەلەرى كەشتىڭ نەگىزگى ارقاۋىنا اينالدى.
Q-Andas اقپارات اگەنتتىگى
سۋرەتتەر مەن بەينەفيلمدى تۇسىرگەن
ءامينا اقىلبەك.
«Q-Andas» اقپارات اگەنتىگىنىڭ تىلشىلەرى.











