ساعىمباي:
جىل ەدى ون جەتىنشى، التىنشى ايدا،
شاقپىنىڭ بوساعاسى قىزىس سايدا.
قوي باعىپ، تاياق ۇستاپ جۇرگەنىمدە،
ءبىر سۇلۋ مال شەتىندە بولدى پايدا.
جاقىنداپ كەلدىمداعى ءجون سۇرادىم،
قۇربىلاس، ءجونىڭدى ايتشى، اۋىل قايدا؟
سوندا قىز قۋراي سالىپ، قويىن قۋدى،
قاراماي، جاۋاپ قاتپاي ءاي مەن شايعكا
بۇبىقان:
قويىما قويىڭ كەلىپ ارالاسار،
ارى ايداساڭ ويىڭدى دوڭنەن اسار.
ورىسكە ءبىزدىڭ نەگە قوي جاياسىڭ،
قويشى ەمەس، كىسى ەكەنسىڭ الاڭعاسار.
ساعىمباي:
ەي، بالا، ءدامسىز دەيدى تويماعان اس،
وتىرمىز اۋىل ارالاس، قوي قورالاس.
قويلاردى ورگىزەيىك ەكى سايعا،
ايتەۋىر تەك مەنىمەن جولدا ارالاس.
بۇبىقان:
جەيتۇعىن تۇيە شالىپ جاپىراق تۇر،
قاراشا قىستىڭ باسى باسىپ-اق تۇر.
نەڭدى العان مەنىمەنەن جولداس بولعان،
تۇمسىعى شاقايىڭنىڭ قاقىراپ تۇر.
ساعىمباي:
قىزىل تۇز الاتۇعىن كەندە دە بار،
بىرەۋ باي، بىرەۋ جارلى ەلدە دە بار.
بۇرمەسىن شاقايىمنىڭ ايىپ قىلما،
قارىس جەر قاقىراعان سەندە دە بار.
بۇبىقان:
قۇدايعا قۇلدىق ەتەر جاننىڭ ءبارى،
قويىڭدى ارى قايتار الدىڭداعى.
ءسوزى ءمىردىڭ وعىنداي قادالاتىن،
نە دەگەن تۇينەك ەدىڭ جامان سارى، – دەپ ءسوز تابا الماي قينالىپ قالعان ەكەن.
جوعارىداعى ايتىستى قۇديارقان قويشىمبايۇلىنان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











