قىز:
بۇل تويعا نەعىپ كەلدىڭ، توندى جىگىت،
توعايداعى شوشقاداي جوندى جىگىت.
شىلدەنىڭ ىستىعىندا تونىڭ تۇسپەي،
وسىنشانىڭ ىشىندە سورلى جىگىت.
ولجابين:
ايت دەگەننەن ايتايىن كەكىلدى قىز،
مەگەجىن توعايداعى سەكىلدى قىز.
وسىنشاعا كەلگەنشە كۇيەۋ الماي،
ياپىرماي، باعىڭ نەدەن بەكىندى قىز.
(قىز وتىزدارعا كەلىپ وتىرىپ قالعان ەكەن)
سوندا قىز:
وي قۇدايدىڭ تاباسىنا ۇشىرا، – دەپ تۇرا جونەلگەن ەكەن.
مۇقامەتنۇسىپ پەن ساپار قىزدىڭ ايتىسى
(مۇقامەتنۇسىپ ءۇش ايماقتىڭ مىرزا اسكەرىندە ءجۇرىپ ساۋانعا بارعاندا ساپار قىزبەن كەزدەسىپ، ايتىسىپ قالادى).
ساپار:
قىز ەدىم ساركەرەيدىڭ اتىم ساپار،
تۇيەنى جەتەلەۋشى ەم قاتار-قاتار.
باسىندا تەرى تۇماق قىزايدى اكەل،
قارا سۇر كورىنەدى نە دەپ شاتار.
مۇقامەتنۇسىپ:
تەگى پايدا جەتپەگەن قاراسۇردان،
ءبىر قانشىق قىز ەكەنسىڭ الاسۇرعان.
كەتەسىڭ ولاي دا ورعىپ، بۇلاي دا ورعىپ،
بايتالداي الاشولاق تاڭ اسىرعان.
يسانىڭ قىزبەن ايتىسى
(يسا ءبىر قىزعا بارىپ قولعا ءتۇسىپ قالادى. ءوزى كەدەي ەكەن.
ايىپ تارتقان كورىنەدى).
قىز:
ەي، يسا، وڭامىسىڭ، وڭبايمىسىڭ،
ءتۇرىڭ مىناۋ سۋىققا توڭبايمىسىڭ.
ايىپقا جالعىز اتتى بەرىپ قويدىڭ،
شەشەگە كەرەگەڭدى قومدايمىسىڭ.
يسا:
جامانداساڭ جاماندا جەر تاباندا،
جىگىت جامان بولمايدى ەلى اماندا.
قالاي ايتساڭ ءوز ەركىڭ، جامان قىزدار،
ەردەن اسقان قىز قايدا بۇل زاماندا؟
قىز:
كارى بايعۇس جەڭەمىن دەپ جەتكەنىڭ بە،
سۇيرەلىپ جىرتىق-جىرتىق شەكپەنىڭدە.
سىرىلداپ كارى كەۋدەڭ جىعىلارسىڭ،
اۋزىڭا قوس اياقتاپ تەپكەنىمدە.
يسا:
المايمىن ەندى قاتىن قالىڭ بەرىپ،
جيناعان بالالاردىڭ مالىن بەرىپ.
مىنا قىز قوس اياقتاپ تەپكەلى وتىر،
بولاسىڭ ءبارىڭ قارىق ءتۇرىن كورىپ.
سابىرباي مەن ايبالانىڭ ايتىسى
ايبالا:
سابىرباي سارى الامەن سالىپ جۇرگەن،
سالپايىپ ساپتاياقتاي قالىپ جۇرگەن.
بۇل جەردە تامىرى جوق، تانىسى جوق،
تويىمدا شاقىرماعان ناعىپ جۇرگەن.
سابىرباي:
سابىرباي سارى الامەن سالىپ جۇرگەن،
سالپايىپ ساپتاياقتاي قالىپ جۇرگەن.
ايبالا سەن قالاساڭ اندا-ساندا،
تاياعىڭدى بۇلاعىڭا مالىپ جۇرسەم.
جوعارىداعى ايتىستى تىلەۋقابال ابىلعازىۇلىنان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











