Bir kúni túmau tiip júmysqa túshkirip, pysqyryp keldim. Meniń jaǵdaiymdy kórip jany ashydy ma, joq, túmau ózimede júǵyp ketpesin degen saqtyq pa kerekti zatyn satyp aluǵa ketken dosym maǵanda bir betperde satyp ala kelipti.
Ony qolyma alyp kúldim.
Búl qylyǵym oǵan asa únamady. Sosyn onyń mənisin túsindiruge kóshtim.
…Osydan túra 30 jyl búryn joǵary oqu ornyna shaqyrtu alyp, alyp-úshyp Úrimjge jol tarttym. Universitetke jetip, qújattarymdy ótkizip, jataqhanaǵa ornalasuǵa bettedim. Men belgili sebeptermen bir jeti keshigip kelgendikten basqalar ózderi tańdaǵan jataqhanaǵa ornalysyp alypty.
– Jataqhanada bos oryn qalǵan joq. Tek eki adamdyq bólmedegi bir orynnyń bos túrǵanyna úsh jyl boldy. Kórshiń ókpe auruymen auyratyndyqtan basqalar onymen birge túrǵysy kelmeidi. Dərigerler ókpe auruynyń búl túri joqpaly bolmaǵandyqtan oquyn jalǵastyryp jatyr. Búl sońǵy oqu jyly. Eger qoryqpasań sonda túr, – dep keńes berdi jataqhana basqarushy.
Basynda oilanyp qaldym. Sosyn basqarushyǵa eki saǵatqa qiyla súranyp, qalanyń ortalyǵyndaǵy telekomǵa tarttym. Ol kezde búgingidei sotqa degen joq. Jarty saǵat kezekte túryp, əkemniń júmysyna telefon shaldym.
Telefon tútqasy səl túryp kóterildi. Arǵy jaǵynan əkemniń maqpal qońyr úni estildi. Auyldan alǵash úzap shyqqan saparym bolǵandyqtan kózime jas úiirilip, únim shyqpai qaldy. Sosyn jailap sabama túsip, mən-jaidy əkeme bayandadym.
– «Qyryq jyl qyrǵyn bolsa da ajaldy adam óledi» degen bar. Taqalyp túrǵan ajal altyn úige qamap qoisada əketedi. Ólimnende qiyn nərse bar. Ol – ózińe degen senim men ózgege degen ayaushylyqtan ajyrap qalu. Qalǵanyn óziń shesh, – dep telefon tútqasyn jaimen qoidy.
Sol kúnnen bastap ol ekeumiz bir bólmede túra bastadyq. Basynda azdap tartynyp júrsem de, sezdirmeuge tyrysatynmyn. Búny ol da sezetin. Uaqyt óte kele alańdaudan arylyp, jaqyn aralasyp kettik. Studenttik ómir basymyzdan ótti ǵoi. Keide bir kese asty bólip iship júrdik. Ol suretshi edi, kúi shertip, ən salǵanda kóp adam qyzyǵatyn. Biraq jaqyndauǵa batyna almaityny belgili bolyp qalatyn. Al bólmeniń ishi meniń kitap, qaǵazymmen auzy múrnyna shyǵyp jatatyn.
Bir jyl júbymyz jazylǵan joq. Birge kinoǵa baramyz, demalys kúnderi qalǵa jaqyn auyldarǵa qydyramyz. Sóitip júrip, ir qyzǵa birdei ǵashyq bolyp, kózimizben soǵysyp júrgen kezimiz de boldy. Biraq ortaq qyzyǵushylyǵymyz kóp edi. Demalys kúnderi ol boyaq-soyaǵyn, men kitap-qalamymdy kóterip tauǵa baryp, birimiz suret salyp, ekinshimiz óleń jazyp qaitatynbyz. Ol meniń úiime, men onyń úiine qonaqqa da bardyq.
Osyndai qyzyq, qiyndyqpen bir jyl uaqyt jyljyp óte shyqty. Ol oquyn bitirip, diplomyn alyp, auylyna qaitatyn kúni meni qúshaqtap túryp qoshtasty. Kózinen jas shyǵyp ketti. Ol maǵan degen rizashylyǵy edi. Keiin basyma qiyn is túsip, taǵdyrym talqyǵa salynǵanda sol dosym men onyń dostary jan úshyryp júrip, arashalap aldy.
Bir qyzyǵy ol ekeumiz de əli tirimiz. Bizge úrke qarap, alystan ainalyp ketetin talailar búl kúnde qatarymyzda joq. Jer jamandamasyn.
Əkemniń sol kezde aitqan:”Qyryq jyl qyrǵyn bolsa da ajaldy óledi”, – degen sózi kúni búginge deiin maǵan senim berip keledi. Ər saparǵa attanǵan saiyn sol sózdi esime alamyn.
Betperde bizdi mikroptan qorǵaityn shyǵar. Biraq adamgershilikten alystatyp jiberedi.
Qajet ANDAS
«Q-andas» aqparattyq agenttigi.











