Búgin bir jas jigitke qatty ashulandym. Alakeuim shaqta úidi ainala bergenim sol jaǵama jarmasa tústi. Qaryn shyǵyp, jastyqtan alystap bara jatqanymyz bolmasa bala kezde mashyqqan tásilderdi úmyta qoimappyn. Ol da múndai áreketti kútpese kerek. Jaǵamnan qolynyń qalai ajyrap ketkenin sezbei qaldy. Esin jiǵanda eńirep kelip, keshirim súrady. Men basqasha, artyq áreketke barady dep oilasa kerek. Biraq, biz ondai aqymaqtyqty bilmei óstik qoi.
Osy kezde sonau alysta qalǵan balalyq shaǵym esime tústi. Auyl balalary keshke qarai jol toryǵandardyń kim ekenin ysqyryqtyń úninen tanushy edik. Sol únnen auyldyń qai shetinde 68-der, qai jaǵynda 71-ler, qai túsynda 74- terdiń shalqyp júrgenin, al qalqada ózimizden kishi 77, 79-dardyń tyǵylyp, temeki shegip otyrǵanyn bilip, úlkenderdiń kózine túsip qalmau úshin barynsha saqtanushy edik. Al kishkeneler qolǵa tússe qúdaidyń bergeni qaltasyndaǵy temeksin qaǵyp alasyń. Sóitip jol toryp júrip, ózimizde keide úlkenderdiń qolyna túsip qalatynbyz. Ondaida basyńa qara búlt úiirildi dei ber. Aldymen eki betiń men qúiryǵyń jazalandy. Sosyn jeti qarańǵy túnde auyldy kezip, ne izdep júrgeniń jaily tergeuge alynasyń. “Qozy joq”, “Siyr sheshilip ketipti”… degen syltaulardy aitasyń. Olarda seniń jal tauyp túrǵanyńdy biledi. qaltańdy aqtaryp, baǵanaǵy 77-lerden tartyp alǵan shylymyńdy sypyryp alady. Sosyn búny ákemizge aitamyz dep qorqytady. Ol kezde tym namysshyl edik. Ákelerimizdiń múny bilip qaluy ólgenmen teń. Sondyqtan aǵatailarǵa aitpauyn ótinip, jalyna bastaisyń. Aqyry bir jarty tauyp berip, qútyluǵa uáde etushi edik. Ol kezde búgingidei dúken degen tolyp túrǵan joq. Endi áke-sheshemizben bir bólmede úiyqtaityn 81-lerdiń tobyndaǵy bauyrymyzdy ysqyryp shaqyrasyń. Ol da seniń ysqyryǵyńnyń úninen qolǵa túsip qalǵanyńdy bilip, máseleńdi sheshu úshin baryn salady. Sóitip, úlkenderdiń talabyn oryndaisyń.
– Jaraisyń, azamat ekensiń, – dep arqamyzdan qaqqanda jer-álemge syimai ketushi edik. Búl maqtaudyń jazasyn kóp ótpei ákemizden alamyz. Taǵy da kóbirek jazalanatyn eki betiń bolady. Biraq, qansha tergeuge tússeńde aǵalardyń kim ekenin múlde aitpaisyń. Ol is úmyt bolǵansha bir ai boiy keshke qydyrmai bilte shamnyń túbinde sabaqqa daiyndalasyń. Sosyn taǵy qaitalanady. Óstip júrip jaz ben kúzdi bitiresiń.
Qazir oilasam, sonyń bári zań bolmasa da, bizdi zańsyzdyqqa jaqyndatpaityn tejem eken ǵoi. Ókinishke qarai, qazir jastarǵa aqyl aitudan qalyp baramyz. Kerisinshe olar bizge jol men jóndi kórsetkisi keledi. Onyń janynda jaǵańa jarmasa túsu degen jai nárse. Jazasyn berseń, shoshańdatyp sotqasyn shúqylap, 102-ni tere bastaidy. “Bas jarylsa bórik, qol synsa jeń úshin de” degen qazaqtyń qairan namysy qúmǵa sińgen sudai bolyp, joǵalyp bitti. Osyndaida ákemniń: “Biz ómirdiń eń bir tańǵajaiyp kezinde ómir súrdik. Endigi jastar biz siyaqty bola almaidy” degeni jii esime túsedi.
Qajet ANDAS
«Q-andas» aqparattyq agenttigi.











