بۇگىن ءبىر جاس جىگىتكە قاتتى اشۋلاندىم. الاكەۋىم شاقتا ءۇيدى اينالا بەرگەنىم سول جاعاما جارماسا ءتۇستى. قارىن شىعىپ، جاستىقتان الىستاپ بارا جاتقانىمىز بولماسا بالا كەزدە ماشىققان تاسىلدەردى ۇمىتا قويماپپىن. ول دا مۇنداي ارەكەتتى كۇتپەسە كەرەك. جاعامنان قولىنىڭ قالاي اجىراپ كەتكەنىن سەزبەي قالدى. ەسىن جيعاندا ەڭىرەپ كەلىپ، كەشىرىم سۇرادى. مەن باسقاشا، ارتىق ارەكەتكە بارادى دەپ ويلاسا كەرەك. بىراق، ءبىز ونداي اقىماقتىقتى بىلمەي وستىك قوي.
وسى كەزدە سوناۋ الىستا قالعان بالالىق شاعىم ەسىمە ءتۇستى. اۋىل بالالارى كەشكە قاراي جول تورىعانداردىڭ كىم ەكەنىن ىسقىرىقتىڭ ۇنىنەن تانۋشى ەدىك. سول ۇننەن اۋىلدىڭ قاي شەتىندە 68-دەر، قاي جاعىندا 71-لەر، قاي تۇسىندا 74- تەردىڭ شالقىپ جۇرگەنىن، ال قالقادا وزىمىزدەن كىشى 77، 79-داردىڭ تىعىلىپ، تەمەكى شەگىپ وتىرعانىن ءبىلىپ، ۇلكەندەردىڭ كوزىنە ءتۇسىپ قالماۋ ءۇشىن بارىنشا ساقتانۋشى ەدىك. ال كىشكەنەلەر قولعا تۇسسە قۇدايدىڭ بەرگەنى قالتاسىنداعى تەمەكسىن قاعىپ الاسىڭ. ءسويتىپ جول تورىپ ءجۇرىپ، وزىمىزدە كەيدە ۇلكەندەردىڭ قولىنا ءتۇسىپ قالاتىنبىز. وندايدا باسىڭا قارا بۇلت ءۇيىرىلدى دەي بەر. الدىمەن ەكى بەتىڭ مەن قۇيرىعىڭ جازالاندى. سوسىن جەتى قاراڭعى تۇندە اۋىلدى كەزىپ، نە ىزدەپ جۇرگەنىڭ جايلى تەرگەۋگە الىناسىڭ. “قوزى جوق”، “سيىر شەشىلىپ كەتىپتى”… دەگەن سىلتاۋلاردى ايتاسىڭ. ولاردا سەنىڭ جال تاۋىپ تۇرعانىڭدى بىلەدى. قالتاڭدى اقتارىپ، باعاناعى 77-لەردەن تارتىپ العان شىلىمىڭدى سىپىرىپ الادى. سوسىن بۇنى اكەمىزگە ايتامىز دەپ قورقىتادى. ول كەزدە تىم نامىسشىل ەدىك. اكەلەرىمىزدىڭ مۇنى ءبىلىپ قالۋى ولگەنمەن تەڭ. سوندىقتان اعاتايلارعا ايتپاۋىن ءوتىنىپ، جالىنا باستايسىڭ. اقىرى ءبىر جارتى تاۋىپ بەرىپ، قۇتىلۋعا ۋادە ەتۋشى ەدىك. ول كەزدە بۇگىنگىدەي دۇكەن دەگەن تولىپ تۇرعان جوق. ەندى اكە-شەشەمىزبەن ءبىر بولمەدە ۇيىقتايتىن 81-لەردىڭ توبىنداعى باۋىرىمىزدى ىسقىرىپ شاقىراسىڭ. ول دا سەنىڭ ىسقىرىعىڭنىڭ ۇنىنەن قولعا ءتۇسىپ قالعانىڭدى ءبىلىپ، ماسەلەڭدى شەشۋ ءۇشىن بارىن سالادى. ءسويتىپ، ۇلكەندەردىڭ تالابىن ورىندايسىڭ.
– جارايسىڭ، ازامات ەكەنسىڭ، – دەپ ارقامىزدان قاققاندا جەر-الەمگە سىيماي كەتۋشى ەدىك. بۇل ماقتاۋدىڭ جازاسىن كوپ وتپەي اكەمىزدەن الامىز. تاعى دا كوبىرەك جازالاناتىن ەكى بەتىڭ بولادى. بىراق، قانشا تەرگەۋگە تۇسسەڭدە اعالاردىڭ كىم ەكەنىن مۇلدە ايتپايسىڭ. ول ءىس ۇمىت بولعانشا ءبىر اي بويى كەشكە قىدىرماي بىلتە شامنىڭ تۇبىندە ساباققا دايىندالاسىڭ. سوسىن تاعى قايتالانادى. ءوستىپ ءجۇرىپ جاز بەن كۇزدى بىتىرەسىڭ.
قازىر ويلاسام، سونىڭ ءبارى زاڭ بولماسا دا، ءبىزدى زاڭسىزدىققا جاقىنداتپايتىن تەجەم ەكەن عوي. وكىنىشكە قاراي، قازىر جاستارعا اقىل ايتۋدان قالىپ بارامىز. كەرىسىنشە ولار بىزگە جول مەن ءجوندى كورسەتكىسى كەلەدى. ونىڭ جانىندا جاعاڭا جارماسا ءتۇسۋ دەگەن جاي نارسە. جازاسىن بەرسەڭ، شوشاڭداتىپ سوتقاسىن شۇقىلاپ، 102-ءنى تەرە باستايدى. “باس جارىلسا بورىك، قول سىنسا جەڭ ءۇشىن دە” دەگەن قازاقتىڭ قايران نامىسى قۇمعا سىڭگەن سۋداي بولىپ، جوعالىپ ءبىتتى. وسىندايدا اكەمنىڭ: “ءبىز ءومىردىڭ ەڭ ءبىر تاڭعاجايىپ كەزىندە ءومىر سۇردىك. ەندىگى جاستار ءبىز سياقتى بولا المايدى” دەگەنى ءجيى ەسىمە تۇسەدى.
قاجەت انداس
«Q-andas» اقپاراتتىق اگەنتتىگى.











