وڭداسىن بىردە سىيقىمباي دەگەن بايدىڭ ۇيىنە قونادى. بايدىڭ بايبىشەسى ونى قۇرت قاتقان كوجەمەن جاتقىزادى. داستارقان جيىلاردا وڭداسىن:
تاڭ اتۋمەن كەش باتقان،
كەسپە كوجە قۇرت قاتقان.
سىيقىمبايدىڭ ۇيىندە،
وڭداسىن ءبىر ءتۇن اش جاتقان.
توقتىنىڭ تەڭى كورمەدى،
سۇراماي قاسقار جەپ جاتقان.
ال، وڭداسىن وتىرما،
بۇل ارادان تەز اتتان، اللاھۋاكپار، – دەپ باتا بەرىپ، تۇرا بەرگەندە باي قاتتى ۇيالىپ، بۇل ءسوزدىڭ ەل اۋزىنا تارالىپ كەتۋىنەن قورقىپ، وڭداسىندى تاعى ءبىر قوندىرىپ، مالىن سويدىرىپ، شاپان كيگىزىپ اتتاندىرىپتى.
وڭداسىن قۇرداسى مەدەۋگە:
قاڭعىرىپ، تەنتىرەپ كەلەسىڭ،
جاۋدان جۋا تەرەسىڭ.
قاشان ايتتىڭ دەمە سەن،
ءوستىپ ءجۇرىپ، ولەسىڭ.
وسى جۇلعان ءشوبىڭنىڭ،
كورەسىسىن كورەسىڭ.
جاعاڭنان السا باقيدا،
قايتىپ جاۋاپ بەرەسىڭ.
ەمشىمىن دەپ ەسىرىپ،
ورىنسىز كەۋدە كەرەسىڭ.
ايەلىڭ ايتسا ول كونبە،
قۇرداسىڭ ايتسا ول كونبە،
ەندى كىمگە كونەسىڭ؟، – دەگەندە قۇرداسى، «وي، ايتا بەرەدى ەكەنسىڭ» دەپ جۇرە جونەلىپتى.
سوندا وڭداسىن تاعى دا:
قاشان بولسا وسىنى،
ايتا بەرەم كوزىڭە.
قۇلاق سالماي كەتتىڭ سەن،
كەڭەس ايتقان سوزىمە.
زيانداساڭ ءشوپتى ەندى،
ءبىز سۇعامىن بەزىڭە، – دەپتى.
وتىن اكەلە جاتقان وڭداسىنعا ورالباي دەگەن كىسى:
ەي، وڭداسىن، وڭداسىن،
اۋليە، پىرلەر قولداسىن.
كوبىرەك ال وتىندى،
قاتىن، بالاڭ توڭباسىن، – دەيدى. سوندا وڭداسىن ورالبايدىڭ جەتپىستەرگە كەلگەن التىنبەك دەگەن اعاسىن سوزگە قوسىپ:
اي، ورالباي، ورالباي،
التىنبەگىڭ دوبالداي.
ءوز تەڭدەسى كەتكەندە،
ناعىپ ءجۇر كوزى جوعالماي.
ءتاڭىر ءبارىن العاندا،
سەنى ءجۇر قۇداي الماي، – دەپتى. سودان بىلاي ورالباي ەندىگى جەردە ولەڭمەن ءسوز ايتقاندى قويىپتى.
وڭداسىن قۇرداسى مەدەۋ قايتىس بولعاندا بەت كورگەلى بارىپ ايەلىنە كورىسىپ:
مەدەۋ بايعۇس قاراماي،
كەشە كەتتى مەككەگە.
جىلاعان زارلاپ داۋىسىڭ،
قۇلاعىنا جەتە مە.
ايىرىلدىق پا توكىردەن،
ءوتتى مە امان كوپىردەن.
ءپاني دۇنيە باقيعا،
اكەتە الدىما وكىلدەن، – دەپ جىلاۋدىڭ ارتىن كۇلكىگە اينالدىرىپ جىبەرىپتى.
قازىنالى قارتتاردان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











