Qazaqtyń mádeniet pen ádebiet qúndylyǵy óz biiginen eshqashan tómendegen emes. El ruhaniyatymen jańǵyra jasasyp keledi. Búgingi jastar jańasha serpin alyp, qazaq qalamgerlerimen qatar eline eńbegi sińgen túlǵalardy da tereńinen tanyp, shyǵarmalaryn zerdeleude. Búl, árine, olardyń bilim kókjiegin keńeitetini sózsiz. Eń bastysy, olar tanimyn degen jannyń tútamdai tirshilikte qylǵan qam-qareketi danalyqqa negizdelgen bolsa, keiingige úlgi.
Osyndai tebirenisimizge túrtki bolǵan – tarihshy, aitysker jáne jazba aqyn Andas Omaraqyn. Qytai qazaqtarynyń aitys óneriniń damuyna zor úles sińirgen túlǵanyń «Tarih talǵarynda», «Doda», «Jyldar izi» atty úsh tomdyq eńbegi kitap bolyp qattalǵan. Qazaqstan men Qytaidaǵy túrli basylymda 400-den astam óleńi, 20-dan astam poema-dastany jaryq kórgen.Eńbekteri aǵylshyn, qytai, túrki halyqtarynyń tiline audarylǵan. Atalǵan eńbekteri úshin 2010 jyly QHR memleket dárejeli syilyǵy berilse, keiipkerimiz 2015 jyly ómirden ozyp, denesi Taldyqorǵan topyraǵyna qoiyldy.
Túlǵa atyn óshirmei keiingige dáriptep júrgen áriptesimiz Qajet Andastyń úiymdastyruymen ákesi Andas Omaraqynnyń oqulary óz deńgeiinde órnek tapty. Atalmysh baiqauǵa qatysqan aimaq oqushylary kil júirikten kim júirik ekenin ózara anyqtasty.
Mektep jetkinshekteri arasyndaǵy doda V. Mayakovskii atyndaǵy Taldyqorǵan qalalyq kitaphanasynda shymyldyq túrdi. Igi istiń ótuine oblystyq bilim basqarmasy men «Jetisý» gazeti, «Qazposhta» AQ Almaty oblystyq filialy jáne Andas otbasy múryndyq boldy.
Baiqau barysynda alǵashqy bolyp «Jetisý» gazeti bas redaktorynyń orynbasary Mádi Aljanbai sóz alyp, saiysqa qatysushylarǵa sáttilik tiledi. Óz kezeginde «Qazposhta» AQ Almaty oblystyq fili-aly direktorynyń orynbasary Bolathan Erjigitov lebizin bildirdi. Sonymen qatar, «Parasat» ordeniniń iegeri Áueshan Majaiqyzy qúrastyrǵan «Andas Omaraqyn oqulary» atty jinaqtyń túsaukeser rásimi ótti. Atalmysh kitapqa saiysqa qatysushy jas órenderdiń ǵylymi eńbekteri engenin aita ketken jón. Búl oraida kitap avtory jinaq shyǵarudaǵy basty maqsaty – joldasynyń shyǵarmashylyǵyn keiingi jas buynǵa dáripteu, talantty balalarǵa riyasyz qoldau tanytu ekenin atap ótti.
«Andas Omaraqyn oqulary» baiqauy jarty jyl boiy onlain júrgizilip kelgen bolatyn. Oblys kóleminde bilim saiysyna 30 -dan astam oqushy qatysty. Barlyq tapsyrmalardy tolyq ári sapaly oryndaǵan 18 oqushy aqtyq synǵa joldama alyp, ádilqazylar aldynda bilim-biligin kórsetti.
Oqushylar test súraqtary, jazba aqyndar, ólketanushylar, aitys aqyndary syndy 4 baǵyt boiynsha berilgen tapsyrmaǵa sai baǵalandy. Bilimgerlerdiń qarym-qabiletin, saiysqa daiyndyǵyn geografiya ǵylymdarynyń kandidaty Erkin Toqpanov, «Parasat» ordeniniń iegeri, «Altyn alqaly» ana Áueshan Majaiqyzy, ǵylym magistri, Almaty oblystyq kitaphananyń qyzmetkeri Maqpal Andas, V. Mayakovskii atyndaǵy Taldyqorǵan qalalyq kitaphananyń direktory Kúlpan Qalkenova baǵalap, qazylyq etti.
Alǵyrlyǵymen tanylǵan qatysushylar kitap, Alǵys hat, qomaqty qarjymen marapattaldy.
Qorytyndy baiqauda jazba aqyndar Andas Omaraqynnyń óleńin oqysa, ólketanushylar ǵylymi júmysyn qorǵady, aityskerler sóz saiysyna tústi. Nátijesinde jazba aqyndar arasynda Arailym Janahmet, ólketanushylar baǵyty boiynsha Janel Júmaǵali, aityskerler arasynda Úlan Núrbol I oryn iegeri dep tanyldy.
Jalpy, atalmysh baiqaudyń ótuine demeushilik kórsetip otyrǵan áriptesimiz Qajet Andastyń otbasy jarty jyl kóleminde ótken sharaǵa 6 jarym million teńgeden astam qarajat bólgen eken. Baiqaudy dástúrli ári respublikalyq deńgeide ótkizu josparlanuda.
Medet JÚMABAI











