Ayapbergen JANSARBAIÚLY
Jaqsylyq aitty bir sóz bayau ǵana,
Jaqyndap jamandyqqa tayau ǵana.
JAQSYLYQ:
Ekeumiz jaralmyshtan egiz edik,
Túsindir sen bir iske berip baǵa.
Qaneki az syrlasyp kórelikshi,
Qúrdas ek emes bolǵan ini-aǵa.
Jetelep seni daǵy, meni daǵy,
Enshige berer kimge Alla taǵala.
Bireumiz quantamyz qúdailatyp,
Bireumiz kúńirentemiz jyrtyp jaǵa.
Adamzat únatady qaisymyzdy,
Osyǵan ádildikpen bershi baǵa.
Aitady kimge qarǵys, kimge alǵys,
Qymbatty, ashyq oily aramyzda.
JAMANDYQ:
Jamandyq aitty túryp, mardamsyma,
Ainalaiyn dep qapsyń aldamshyǵa.
Mynauyń kórealmastyq, dúshpandyǵyń,
Ataǵyma kir jaqpaq bolǵan sirá.
Biraq auyz jauappen sheshe salar,
Ótirikti búl iske tartsaq kuá.
Ataǵym meniń kúshti áldeqaida,
Sen múny túsinip qoi sózimdi úǵa.
Men artyqpyn qaitseń de, qaida barsań,
Baqtalasyp, menimen pále quma.
JAQSYLYQ:
Toqta, – dedi jaqsylyq júmsaqtatyp,
Auzyńdy kerip, sozba qisaqtatyp.
Tek az ǵana aittym ǵoi shyn sózimdi,
Jalǵan sóilep túrǵam joq syipaqtatyp.
SHamdanarlyq isiń joq búǵan tipti,
Bir auyz sóz aityldy, boldy bitti.
Sóz asyrmas basyńnan bolyp apsyń,
Kuáshi bop ótirik taǵy shyqty.
Ótiriktiń aldyna bara almaimyn,
Kuáligin esepke ala almaimyn.
Qaitseńdaǵy men adal, sen aramsyń,
Senen tómen qalai da qala almaimyn.
Daldalamaq bolsań da qarańmenen,
Kóleńkeńde kómilip qala almaimyn.
Kelgenińdi qolyńnan ayai kórme,
Nemene ataq bar edi baiǵús sende.
Kóteriler imany qyryq kez úshyp,
Kórer bolsa júzińdi adam pende.
Óziń-aq bol sol biik ataǵyńmen,
Men úshin qadiri joq jarym teńge.
JAMANDYQ:
Qaraigór baqtalasqan jaqsylyqty,
Úirenip alǵan eken baqsylyqty.
Meni jaman kórsetip, óziń jaqsy,
Pále-qaza ayamai japsyrypty.
Kim jaqsy, kim jamanyn tauyp ber, – dep,
Qaisy bir táuipke bal ashtyrypty.
Óteke-ai, qaida júrsiń kelshi beri,
Sózge júirik sheshen eń menen góri.
Óziń jaqsy, meni sen qusyń deidi,
Qúdai qalys sózińdi aitshy tegi.
Qaneki, sen naq kesip baǵa bershi,
Kórip, bilip júrsiń ǵoi búl nemeni.
Bolar jerin boldyrta aityp tasta,
Tynbai shapqan batyrym erke seri.
Qaharyma shynaiy keler bolsam,
Zel-zala ǵyp jiberem dúnieni.
Ataǵym Alataudai aibatym zor,
Boiymda qara batpan qairatym mol.
Óteke seni aiǵailap shaqyrǵanym,
Qaneki, osy iske sen tóreshi bol.
ÓTIRIK:
Aitqanyń jamandyq dos dúrys, – deidi,
Ekeuiń egiz tuǵan tuys deidi.
SHaqyrdyńdar tórelik jasaiyn men,
Kóńilge jaraityndai bir is dedi.
Biri tómen, joǵary biri bolu,
Kele jatqan áuelden shyn is dedi.
Ekeuine ótirik kesim aitty,
Jamandyqty órge dep kesip aitty.
Ataǵy bar opyryp, oiyp túser,
Maǵynasyn solai dep sheship aitty.
SHydamady jaqsylyq myna sózge,
Kórip júrgen ótirik kóziń kez be?
Soqyr bige barsaq ta ádil aitar,
Jamandyqty jaqtaǵan sóziń sóz be?
Bere almaisyń búl iske dúrys baǵa,
Kuáshige barmasaq senen ózge.
Jamandyqty sen menen joǵary dep,
Jaratqannyń júzinen shyndap bezbe.
Ótirik pen jamandyq bir jaq bolyp,
Janjal tudy arada, mine, lezde.
Qol-ayaǵyn jaqsylyqtyń buyp qoidy,
Oilaryna aramdyq túiip qoidy.
SHyryldatyp qaradai shimirikpei,
Tarpa bas sap júmsady suyq qoldy.
Búl jańjaldyń ústine shyn keledi,
Ajyratyp úsheuin syn beredi.
Neden shyqty búl shataq, búlaryń ne,
Pále basy aityńdar kimde dedi?
Qarǵyp túryp jaqsylyq orynynan,
Ótirikke bar shataq sende dedi.
Qasaqana maqtadyń jamandyqty,
Úrǵandaryń taǵy da jón be dedi.
Men qalysqa shyndyqqa baram deseń,
Jibermediń ekeuiń jónge dedi.
Úqpai qaldy ekeui shyn kelerin,
SHynnyń kúshi boiynda tyń kelerin.
Ótiriktiń bezektep jany shyqty,
SHynnan ábden biledi dúre jerin.
SHynnyń sonda qabaǵy qatuly túr,
Ór jiger men kek oty ashuly túr.
Jaqsylyqty jazyqsyz úrǵanyna,
Ekeuine azuy basuly túr.
SHYN:
Búl qalaisha ekeuiń qorlaǵanyń,
Osy qúrly órekpip zorlaǵanyń.
Jaqsylyqtyń qashanda jaqsy aty bar,
Ekeuińniń ras qoi ońbaǵanyń.
Moiynyńdy, ótirik, júlar edim,
Amal qansha basynda bolmaǵanym.
Jaqsylyqtyń ústiniń shańyn qaqty,
Kimge barsań baǵań bar degen jaqsy.
Qysym jasap, joya almai máńgi baqi,
Esirip júrgenińmen málim uaqytty.
Kónseń de osy, aitarym kónbeseń de,
Men qalystyq jasaimyn, mine, naqty.
Ótirik pen jamandyq mińgirledi,
Bas izedi ashyq syr bildirmedi.
Basyp túsip aibaty aq shyndyqtyń,
Basqa qúlyq qyluǵa úlgermedi.
Jaqsylyqty shyǵaryp, úńgirdegi,
Án men kúii shyndyqtyń kúmbirledi.
Arttarynan bas baǵyp ana ekeui,
Áli erip júr sybdyryn bildirmedi.
Túzetuge qateni syn ketedi,
Ótiriktiń túbine shyn jetedi.
Qúlyq – túlki bolǵanda, shyndyq – búrkit,
Aqyry bir kún qoimaidy indetedi.
Ayapbergen JANSARBAIÚLY jazǵan aitys.
Aityp bergen Túrdybek SÁRSEÚLY.
Jazyp alǵan Andas OMARAQYNÚLY
Derekkóz: Doda: (Aitystar men tarihi-etnografiyalyq jyrlary) / A. Omaraqyn ; [qúrastyrǵan: Á. Majai [j. b.] .- Taldyqorǵan : [b. j.]. https://kazneb.kz/kk/catalogue/view/1657687
“Q-Andas” aqparattyq agenttigi











