Malshy tapshylyǵyn tuyndatyp otyrǵan birinshi másele – kásibi biliktiliktiń joqtyǵy. «Avstraliyada qoidy úshaqpen baǵady eken» degen daqpyrtty estigenimizge biraz jyl boldy. Rasynda qazir asyl túqymdy maldyń tólin solardan satyp alyp, aspanmen jetkizip, jersindirip jatyrmyz. Biraq sol asyl túqymdy maldy asyldandyryp, onyń igiligin kóru úshin de malshy bilikti boluy kerek. Alaida biz dástúrli mal sharuashylyǵynan alystai almai qoidyq. Sondyqtan bilimdi de bilikti malshy daiyndaityn, orta bilim beretin mekeme baǵdarlamasyn qaita qarap, osy mamandyq ielerine qoldau kórsetilui kerek. Jastardy soǵan baǵyttaǵan jón. Osy arqyly kabinette otyryp, maldyń jaiyn bilip, úshaqpen júrip mal qaiyratyn malshylar buynyn qalyptastyruǵa bolady.
Auyl jáne mal sharushylyǵy jaily sóz bolsa: «Memleket barynsha qoldau kórsetip jatyr», – dep auyz ashtyrmaityndar jetedi. Ony joqqa shyǵarmaimyz. Qazir elimizde auyl sharuashylyǵyna qomaqty demeuqarjy beriledi eken. Onyń bir bóligi investitsyalyq baǵytqa, qalǵany eginshilik pen mal sharuashylyǵyna tiesili. Ókinishke qarai, demeuqarjynyń kólemi óskenimen, mal sharuashylyǵynyń ónimdiligi ósken joq.
Demeuqarjynyń tóńireginde bylyq kóp. Jalǵan qújat, jasyryn jolmen qarjyny jymqyru tyiylatyn emes. Máselen, búrynǵy jyldary «16 myń gektarǵa qant qyzylshasy sebildi» dep, 8 myń gektardan ǵana ónim alynǵan kezi bolǵan. Demeuqarjy 16 myń gektarǵa berilgeni beseneden belgili. Nátijesinde, qant tappai sandalyp júrmiz. Mal sharuashylyǵynda da osy jaǵdai. Ótirik esep, jeń úshynan jalǵasqan aǵaiyndyqtyń saldarynan sharualar demeuqarjyǵa qol jetkize almai, qarajaty bolmaǵasyn malshysyn jarylqai almai, sharuashylyǵyn túralatyp otyr.
Bizdiń oiymyzsha, demeuqarjy degendi alyp tastap, auylsharuashylyǵy tauaryn óndirushilerge tómen paiyzben, úzaq jylǵa nesie berilip, óndirgen ónimin satqannan keiingi kirisi arqyly tóleitin jaǵdai jasau kerek. Búl – Qytai elinde dáleldengen tájiribe. Olar osy tásil arqyly ózderiniń bir jarym milliard halqyn asyraumen qatar, jarty álemdi et-sút, azyq-túlikpen qamtamasyz etip otyr. Osy jol ǵana úrlyqtyń aldyn alady jáne malshy tapshylyǵyn joyady.
Qajet Andas
«Q-Andas» aqparattyq agenttigi











