مالشى تاپشىلىعىن تۋىنداتىپ وتىرعان ءبىرىنشى ماسەلە – كاسىبي بىلىكتىلىكتىڭ جوقتىعى. «اۆستراليادا قويدى ۇشاقپەن باعادى ەكەن» دەگەن داقپىرتتى ەستىگەنىمىزگە ءبىراز جىل بولدى. راسىندا قازىر اسىل تۇقىمدى مالدىڭ ءتولىن سولاردان ساتىپ الىپ، اسپانمەن جەتكىزىپ، جەرسىندىرىپ جاتىرمىز. بىراق سول اسىل تۇقىمدى مالدى اسىلداندىرىپ، ونىڭ يگىلىگىن كورۋ ءۇشىن دە مالشى بىلىكتى بولۋى كەرەك. الايدا ءبىز ءداستۇرلى مال شارۋاشىلىعىنان الىستاي الماي قويدىق. سوندىقتان ءبىلىمدى دە بىلىكتى مالشى دايىندايتىن، ورتا ءبىلىم بەرەتىن مەكەمە باعدارلاماسىن قايتا قاراپ، وسى ماماندىق يەلەرىنە قولداۋ كورسەتىلۋى كەرەك. جاستاردى سوعان باعىتتاعان ءجون. وسى ارقىلى كابينەتتە وتىرىپ، مالدىڭ جايىن ءبىلىپ، ۇشاقپەن ءجۇرىپ مال قايىراتىن مالشىلار بۋىنىن قالىپتاستىرۋعا بولادى.
اۋىل جانە مال شارۋشىلىعى جايلى ءسوز بولسا: «مەملەكەت بارىنشا قولداۋ كورسەتىپ جاتىر»، – دەپ اۋىز اشتىرمايتىندار جەتەدى. ونى جوققا شىعارمايمىز. قازىر ەلىمىزدە اۋىل شارۋاشىلىعىنا قوماقتى دەمەۋقارجى بەرىلەدى ەكەن. ونىڭ ءبىر بولىگى ينۆەستيتسيالىق باعىتقا، قالعانى ەگىنشىلىك پەن مال شارۋاشىلىعىنا تيەسىلى. وكىنىشكە قاراي، دەمەۋقارجىنىڭ كولەمى وسكەنىمەن، مال شارۋاشىلىعىنىڭ ونىمدىلىگى وسكەن جوق.
دەمەۋقارجىنىڭ توڭىرەگىندە بىلىق كوپ. جالعان قۇجات، جاسىرىن جولمەن قارجىنى جىمقىرۋ تىيىلاتىن ەمەس. ماسەلەن، بۇرىنعى جىلدارى «16 مىڭ گەكتارعا قانت قىزىلشاسى سەبىلدى» دەپ، 8 مىڭ گەكتاردان عانا ءونىم الىنعان كەزى بولعان. دەمەۋقارجى 16 مىڭ گەكتارعا بەرىلگەنى بەسەنەدەن بەلگىلى. ناتيجەسىندە، قانت تاپپاي ساندالىپ ءجۇرمىز. مال شارۋاشىلىعىندا دا وسى جاعداي. وتىرىك ەسەپ، جەڭ ۇشىنان جالعاسقان اعايىندىقتىڭ سالدارىنان شارۋالار دەمەۋقارجىعا قول جەتكىزە الماي، قاراجاتى بولماعاسىن مالشىسىن جارىلقاي الماي، شارۋاشىلىعىن تۇرالاتىپ وتىر.
ءبىزدىڭ ويىمىزشا، دەمەۋقارجى دەگەندى الىپ تاستاپ، اۋىلشارۋاشىلىعى تاۋارىن وندىرۋشىلەرگە تومەن پايىزبەن، ۇزاق جىلعا نەسيە بەرىلىپ، وندىرگەن ءونىمىن ساتقاننان كەيىنگى كىرىسى ارقىلى تولەيتىن جاعداي جاساۋ كەرەك. بۇل – قىتاي ەلىندە دالەلدەنگەن تاجىريبە. ولار وسى ءتاسىل ارقىلى وزدەرىنىڭ ءبىر جارىم ميلليارد حالقىن اسىراۋمەن قاتار، جارتى الەمدى ەت-ءسۇت، ازىق-تۇلىكپەن قامتاماسىز ەتىپ وتىر. وسى جول عانا ۇرلىقتىڭ الدىن الادى جانە مالشى تاپشىلىعىن جويادى.
قاجەت انداس
«Q-Andas» اقپاراتتىق اگەنتتىگى











