– Áke, siz tuǵan kúnińizdi toilappa edińiz?
– Joq.
– Nege?
– Qazaq balasynyń tuǵan ai, kúni ár túrli bolǵanymen, Úlystyń úly kúninde Nauryz kójeden dám tatqan qazaq balasy bir jasqa shyqty dep sanalady. Sondyqtan ata-babamyz tuǵan kúndi jyldyń ár kúninde emes, jyldyń bir-aq kúninde Nauryz merekesimen orailastyryp toilaudy saltqa ainaldyrǵan, – dep jauap berdi.
«Bar qazaqtyń tuǵan kúnin bir-aq kúnge syiǵyzǵan netken berekeli ómir» dep ishtei súisindim.
Taǵy bir de ákem Nauryz merekesiniń shyǵuy turaly qyzyqty ańyzdy aityp berip edi. onyń úzyn yrǵasy bylai óriletin.
… Osydan bes myńjyldyń aldynda tau basyna qonystanyp, tórt túlikpen tirshiligin qamdap otyrǵan bir taipa el bolypty. Sol taipada aqylgói, danalyǵymen eldi auzyna auzyna qaratyp, berekge úiytqan Nauryz atty áje bolǵan eken. Bir jyly qatty jút bolyp, mal qyrylyp, taipa adamdary qytymyr qystan kóktemge úzdigip áreń shyǵypty. Kóktem kelip, kók tebendep, jerdiń tońy jibip, maldyń auzy kókke ilingen bir kúni Nauryz áje qystan aman-esen shyqqan taipalastaryn jinap, auyldyń dál ortasyna úlken tai qazandy ornatyp:
– Erteń árkim úiinde qalǵan tamaǵyn ákelip osy qazanǵa salatyn bolsyn, – dep búiyrypty.
Úlkenniń aitqanynan shyqpaityn ejelgi ádet boiynsha árkim úiinde qalǵan tamaǵyn tai qazanǵa salady. Ony sanap kórse 7 túrli dámnen túrypty. Sonyń ishindegi kózge kóriktisi Nauryz ájeniń qysqy soǵymynan asyp qalǵan jalqynyń kári jilik pen tórt japyraq maily et eken.
Sonymen júrt jiylyp kárijilik pen jeti túrli dámdi qazanǵa salyp, tórt japyraq etti qazannyń tórt qúlaǵyna qoiyp, kóz-kósir kóje jasapty. Bir qyzyǵy, bir qazan kójeni taipadaǵylar bir ai ishipti, al kári jiliktiń eti bir ai boiy jelinip bitpegen eken. Sol jyly el yrysy shalqyp, qoi egizden qozylap, iri qara qońdanyp, qúlyn bitken arǵymaq bolyp ósipti. Osydan bylai júrt solsh kúndi jyldyń basy sanap, Úlystyń úly kúni dep atapty. Múny Nauryz áje bastaǵandyqtan merekeni áz-Nauryz dep, kárijilikti bas súiek, jeti dámnen túratyn kójeni Nauryz kóje dep atap ketipti.
Búl taipadaǵy berekeli tirlikti kórgen kórshi taipalar da uaqyt óte Nauryz ájeniń jolyn ústap, Nauryz merekesin toilaityn bolypty…
Qajet ANDAS
«Q-andas» aqparattyq agenttigi.
