Bala kúnimizde apalarymyz aitatyn ertegilerden «úshqysh kilem», «jalǵyz kózdi dáu», «tau qoparǵysh» deitin terminderdi jii estip óstik. Qazirgi kúnde olar asa tańsyq emes. Sebebi, sońǵy jyldardaǵy ǵylymnyń jańalyǵy adamdy tań qaldyrady. Áne, sputnik antenna arqyly robot tau qoparǵyshtardy da, jalǵyz kózdi dáudiń túr-túrin kóre alamyz.
Búl kúnderi árbir úidiń shatyryna ornatylǵan, tórtkúl dunieniń tórt búryshyndaǵy ǵalamattardan susyndatyp sputniktik tárelkeler túrǵyndardyń básekelese satyp alatyn tauaryna ainalyp otyr. Al onyń úrpaq bolashaǵyna balta shabatyn qaterin eskerip jatqan eshkim joq. Túrǵylyqty halyqtar onyń tilin batysqa baǵyttap, Europa áleminiń atys-shabysqa toly azǵyndaǵan filьmderimen jas órkinniń sanasyn ulandyrsa, Qytaidan kelgen qandastarymyz tárelkeniń tilin shyǵysqa baǵyttap, qytaidyń kúibeń tirligin tamashalap otyrǵanyn kórgende qarnyńyz ashady. Ótkenge kóz salsaq, eki júz elu jyl orystyń biliginde bolyp, qorlanudyń ashy dámin ábden tatyp, kúlkimizden kúńirenuimiz kóp bolǵan halyqpyz. Al, qytaidyń sayasaty mamyrajai bolsa ata júrtty ańsap jetip neń bar edi?!
Ortamyzda shetel dúókeileri men óz eliniń ministrleriniń kim ekendigin bilmeui bylai túrsyn, kún saiyn bolyp jatqan óń ózgeristerden habarsyz qara shoqylardyń qatary kóbeiip bara jatqany adamdy alańdatady? Elimzde eshqandai jaǵymdy jańalyq bolmaityndai-aq, úsh qazaqtyń basy qosylǵan jerde orysta anau bolypty, qytai bylai istep jatypty degen tatymsyz áńgimelerden qúlaǵyń jauyr bolady.
Árkim óz tauynyń biik boluyn armandaidy. Sondyqtan ár eldiń telebaǵdarlamasy da sol jerdegi ómirdiń ainasy, ol óz eliniń keregesi keń boluy úshin qyzmet etedi. Men ozyq oily telenómirlerdi tamashalauǵa qarsy emespin, alaida, qazaq jastary elimizdiń kúndelikti tynys-tirshiliginen bir sát bolsa da habar tauyp, qazaq dalasynyń tynys-tirshiliginen kóz aiym bolyp otyrsa, núr ústine núr bolar edi.
Qazaq halqynda «esti jigit elin tabar, essiz jigit jattyń otyn jaǵar» deitin qaǵida bar. Ózgeniń shashbauyn qansha kótergenińmen ol ózińdei bolmaidy ǵoi. Aldymen ózimizdi túsinuge, biluge tyrysaiyq.
Qajet Andas
«Q-andas» aqparattyq agenttigi.











