بالا كۇنىمىزدە اپالارىمىز ايتاتىن ەرتەگىلەردەن «ۇشقىش كىلەم»، «جالعىز كوزدى ءداۋ»، «تاۋ قوپارعىش» دەيتىن تەرميندەردى ءجيى ەستىپ وستىك. قازىرگى كۇندە ولار اسا تاڭسىق ەمەس. سەبەبى، سوڭعى جىلدارداعى عىلىمنىڭ جاڭالىعى ادامدى تاڭ قالدىرادى. انە، سپۋتنيك انتەننا ارقىلى روبوت تاۋ قوپارعىشتاردى دا، جالعىز كوزدى ءداۋدىڭ ءتۇر-ءتۇرىن كورە الامىز.
بۇل كۇندەرى ءاربىر ءۇيدىڭ شاتىرىنا ورناتىلعان، تورتكۇل دۋنيەنىڭ ءتورت بۇرىشىنداعى عالاماتتاردان سۋسىنداتىپ سپۋتنيكتىك تارەلكەلەر تۇرعىنداردىڭ باسەكەلەسە ساتىپ الاتىن تاۋارىنا اينالىپ وتىر. ال ونىڭ ۇرپاق بولاشاعىنا بالتا شاباتىن قاتەرىن ەسكەرىپ جاتقان ەشكىم جوق. تۇرعىلىقتى حالىقتار ونىڭ ءتىلىن باتىسقا باعىتتاپ، ەۋروپا الەمىنىڭ اتىس-شابىسقا تولى ازعىنداعان فيلمدەرىمەن جاس وركىننىڭ ساناسىن ۋلاندىرسا، قىتايدان كەلگەن قانداستارىمىز تارەلكەنىڭ ءتىلىن شىعىسقا باعىتتاپ، قىتايدىڭ كۇيبەڭ تىرلىگىن تاماشالاپ وتىرعانىن كورگەندە قارنىڭىز اشادى. وتكەنگە كوز سالساق، ەكى ءجۇز ەلۋ جىل ورىستىڭ بيلىگىندە بولىپ، قورلانۋدىڭ اشى ءدامىن ابدەن تاتىپ، كۇلكىمىزدەن كۇڭىرەنۋىمىز كوپ بولعان حالىقپىز. ال، قىتايدىڭ ساياساتى مامىراجاي بولسا اتا جۇرتتى اڭساپ جەتىپ نەڭ بار ەدى؟!
ورتامىزدا شەتەل دۇوكەيلەرى مەن ءوز ەلىنىڭ مينيسترلەرىنىڭ كىم ەكەندىگىن بىلمەۋى بىلاي تۇرسىن، كۇن سايىن بولىپ جاتقان ءوڭ وزگەرىستەردەن حابارسىز قارا شوقىلاردىڭ قاتارى كوبەيىپ بارا جاتقانى ادامدى الاڭداتادى؟ ەلىمزدە ەشقانداي جاعىمدى جاڭالىق بولمايتىنداي-اق، ءۇش قازاقتىڭ باسى قوسىلعان جەردە ورىستا اناۋ بولىپتى، قىتاي بىلاي ىستەپ جاتىپتى دەگەن تاتىمسىز اڭگىمەلەردەن قۇلاعىڭ جاۋىر بولادى.
اركىم ءوز تاۋىنىڭ بيىك بولۋىن ارماندايدى. سوندىقتان ءار ەلدىڭ تەلەباعدارلاماسى دا سول جەردەگى ءومىردىڭ ايناسى، ول ءوز ەلىنىڭ كەرەگەسى كەڭ بولۋى ءۇشىن قىزمەت ەتەدى. مەن وزىق ويلى تەلەنومىرلەردى تاماشالاۋعا قارسى ەمەسپىن، الايدا، قازاق جاستارى ەلىمىزدىڭ كۇندەلىكتى تىنىس-تىرشىلىگىنەن ءبىر ءسات بولسا دا حابار تاۋىپ، قازاق دالاسىنىڭ تىنىس-تىرشىلىگىنەن كوز ايىم بولىپ وتىرسا، نۇر ۇستىنە نۇر بولار ەدى.
قازاق حالقىندا «ەستى جىگىت ەلىن تابار، ەسسىز جىگىت جاتتىڭ وتىن جاعار» دەيتىن قاعيدا بار. وزگەنىڭ شاشباۋىن قانشا كوتەرگەنىڭمەن ول وزىڭدەي بولمايدى عوي. الدىمەن ءوزىمىزدى تۇسىنۋگە، بىلۋگە تىرىسايىق.
قاجەت انداس
«Q-andas» اقپاراتتىق اگەنتتىگى.











