…Áli esimde. Meniń bala shaǵym.
Bizdiń úige júdeu júzdi, úzyn boily, aqsary kisi kirip keldi. Ómirdiń ashy-túshysyn kóp kórgeni jadau júzi men tilingen alaqanynan, ainalasyn ájim izi tereńdei túsken, kóz shanaǵynan anyq biluge bolatyn. Súńǵaq boiy sál búgilgeni bolmasa, jas kezinde jigittiń serisi bolǵany bilinip túr.
– Omaraqyn záńginiń úii osy ma? – dep súrady.
– Iá, osy. Kókem ómirde joq, – dedi ákem.
– Endeshe, úige kelgen ekenmin, – dedi de “kirińiz” degendi kútpei-aq tórgi úige endi.
– Men, Yrysbekpin, – dep tanystyrdy ózin.
Ákem de, sheshem de ań-tań bolyp, sileiip túrdy da qaldy. Kózderinen ytqyp ketken tamshyny sezdirmeuge tyrysty.
– Siz tirime edińiz? – dedi ákem.
– Tirimin.
Ol kezdegi túrmysymyz da júpyny. SHeshei shai daiyndap, báiek bolyp júr. Kebejedegi bar tátti-dámdisin dastarqanǵa saldy. “Úzyn sary kelgende jeisińder” deitin qos qazy da qazanǵa tústi. Qaryndaǵy sary maidyń tortasy aiyrylyp, maiǵa shylanǵan tary da dastarqannyń ortasyna ornyqty. Bauyrym máz: “Úzynsary degen osy kisi me?” dep qoyady maǵan. “Úzynsarynyń” ne ekenin men de bilmeitinmin. Úlkendermen dastarqan basynda qatar otyryp tamaqtanuǵa dárejesi jetetin aǵam men ápkemnen basqa beseuimiz auyz bólmedegi kishkentai ústelge jaiǵastyq. Jer oshaqqa ot jaǵyp, qazan asyldy.
Tórgi úide kúbir-sybyr áńgime bastaldy. Bizdiń áulettiń balalardy úlkenderdiń keńesine jaqyndatpaityn ádeti bolushy edi. Jii-jii múryndardyń pysyldaǵan dybysynan asa bir kúlkili áńgime aitylmaǵanyn qu ishimiz sezip otyrdy.
… Yrysbek atamyz bizdiń úige osylai keldi.
Ol kisi atamnyń qandy kóilek dosy, qarulas joldasy bolyp shyqty.
… Yrysbek atamyz 1938 jyly Sábetten qytaiǵa qashyp ótkende Qazaqstanda jalǵyz qyzy qalady da. Sony alyp ketu úshin 12 ret shekara búzady. biraq taba almaidy. 1958 jyly 13 ret ótkende shekarashylardyń qúryǵyna túsip, jiyrma jylǵa sottalyp ketedi. Keiin Qytaidyń ataqty Tarym lagerinen oralǵan soń tuys-tuǵany bolmai bizben birge eki jyl túrdy. Sonda talai qyzyqty áńgime aitushy edi. Júrip ótken joly, jer attary, Il Alatauynyń bókter-bókteri, úry joldary, tau men ózen attaryn sóz etetin.
Keiin Atajúrtqa oralyp, gazetke júmysqa shyqqannan keiin Jarkent pen Ketpen taularyn aralaǵanda sol áńgimeler esime qaita oralap, Yrysbek atam aitatyn jer ataularynyń áli kúnge ózgermegenin kórdim.
Qajet ANDAS
«Q-andas» aqparattyq agenttigi.











