جامبىل وبلىسىنىڭ تۋماسى سانالاتىن جاس سپورتشىنىڭ بايزاق اۋدانىنداعى مىرزاتاي اۋىلىنان شىققانى ايتىلادى. اۋىل بالاسىنىڭ ۇلكەن سپورتقا قاراي بەت الۋى كوبىنە قاراپايىم ەڭبەك پەن قايسار مىنەزدەن باستالادى. باۋىرجاننىڭ سپورتتاعى جولى دا ەرتە جاستان قالىپتاسقان. بالا كۇنىنەن بوكسقا دەن قويىپ، جاتتىعۋ زالىنداعى تارتىپكە، توزىمگە، تاباندىلىققا ۇيرەندى. ۋاقىت وتە كەلە سول ەڭبەكتىڭ ناتيجەسى كورىنىپ، جاس بولسا دا ەل ىشىندە بولاشاعىنان ءۇمىت كۇتتىرەتىن بوكسشىلاردىڭ قاتارىنا قوسىلدى.
2005 جىلى 6 شىلدەدە دۇنيەگە كەلگەن بىلعارى قولعاپ شەبەرى بۇگىندە قازاقستان رەسپۋبليكاسى ىشكى ىستەر مينيسترلىگىنىڭ ب. بەيسەنوۆ اتىنداعى قاراعاندى اكادەمياسىنىڭ 3 كۋرس كۋرسانتى، پوليتسيا سەرجانتى. جاس سپورتشى وقۋ مەن سپورتتى قاتار الىپ ءجۇرىپ، جوعارى ناتيجەلەرىمەن كوزگە ءتۇسىپ كەلەدى. ءومىر جولى جاس بۋىنعا تاباندىلىقتىڭ، ءتارتىپتىڭ جانە ماقساتقا ادالدىقتىڭ ۇلگىسىن كورسەتەدى.
سپورتتىق ورتادا جاس بوكسشىنىڭ ەسىمى ەڭبەكقورلىعىمەن، رينگتەگى باتىلدىعىمەن جانە جەڭىسكە دەگەن ۇمتىلىسىمەن اتالادى. مالىمەتتەرگە سۇيەنسەك، نەبارى 15 جاسىندا قازاقستان رەسپۋبليكاسىنىڭ سپورت شەبەرى اتانعان. مۇنداي اتاق كەز كەلگەن سپورتشىعا وڭاي بەرىلمەيدى. ارتىندا جىلدار بويعى دايىندىق، قاتاڭ ءتارتىپ، تالاي جارىس، جەڭىس پەن جەڭىلىستەن الىنعان ساباق تۇرادى.
جاس سپورتشىنىڭ قالىپتاسۋىنا باپكەرلەرىمەن قاتار اكەسىنىڭ دە ىقپالى زور بولدى. اكەسى ادىلبەك ۇلىنىڭ بويىنداعى سپورتقا دەگەن قىزىعۋشىلىقتى ەرتە بايقاپ، وعان باعىت-باعدار بەردى. ونىڭ كاسىبي تۇرعىدان قالىپتاسۋىنا قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى نۇرلان اقۇرپەكوۆ ۇلكەن ەڭبەك ءسىڭىردى. وليمپيادا چەمپيونى باقتيار ارتاەۆتى تاربيەلەگەن بىلىكتى باپكەر جاس سپورتشىنىڭ قابىلەتىن ەرتە تانىپ، رينگتەگى شەبەرلىگىن، ءتارتىبىن، ءتوزىمىن جانە جەڭىسكە دەگەن سەنىمىن شىڭدادى. وسىلايشا اكە قولداۋى مەن باپكەر ەڭبەگى باۋىرجاننىڭ ۇلكەن سپورتتاعى بەرىك نەگىزىنە اينالدى. تىنىمسىز ەڭبەكتىڭ ناتيجەسىندە 75 كەلى سالماق دارەجەسىندە ۇلتتىق قۇراما جۇيەسىندە كوزگە ءتۇسۋى دە جاس سپورتشىنىڭ الەۋەتىن اڭعارتادى.
قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ادىلقاري مولداتاي دا شاكىرتىنىڭ باستى قاسيەتى رەتىندە ءتارتىپ پەن ەڭبەكقورلىقتى العا تارتادى.
– باۋىرجان جاتتىعۋدا بارىن سالاتىن، تاپسىرمانى مۇقيات ورىندايتىن بوكسشى. بۇگىنگى جەتىستىگى كۇن سايىنعى ەڭبەگىنىڭ ناتيجەسى»، – دەيدى باپكەر.
جاس سپورتشىنىڭ جەتىستىكتەر ءتىزىمى از ەمەس. 2017 جىلى بوكستان ازيا كۋبوگىندا 3 ورىن يەلەنىپ، حالىقارالىق ارەناداعى العاشقى ءىرى جەتىستىكتەرىنىڭ بىرىنە قول جەتكىزدى. سول جىلى تاشكەنت قالاسىندا وتكەن «Ez 2017» تۋرنيرىندە 1 ورىننان كورىندى. بۇدان بولەك، وزبەكستان رەسپۋبليكاسى كونستيتۋتسياسىنىڭ 25 جىلدىعىنا ارنالعان بوكستان حالىقارالىق تۋرنيردە دە جەڭىمپاز اتاندى. وسى جەڭىستەر ءجاسوسپىرىم كەزىنەن ۇلكەن دوداعا دايىن، باسەكەگە قابىلەتتى سپورتشى ەكەنىن كورسەتتى.
2018 جىل دا جاس بوكسشى ءۇشىن تابىستى كەزەڭ بولدى. 2006 جانە 2007 جىلى تۋعان جاسوسپىرىمدەر اراسىنداعى رەسپۋبليكالىق تۋرنيردە 1 ورىن الدى. سونىمەن قاتار ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا جانە استانا قالاسىنىڭ 20 جىلدىعىنا ارنالعان وبلىستىق كوللەدجدەر اراسىنداعى اشىق تۋرنيردە جەڭىمپاز اتاندى. سول جىلى بوكستان اشىق رەسپۋبليكالىق تۋرنيردە دە توپ جاردى. ءبىر جىلدىڭ ىشىندە بىرنەشە جارىستا ءبىرىنشى ورىن الۋى تۇراقتى دايىندىق پەن ۇزدىكسىز ەڭبەكتىڭ ناتيجەسىن ايقىن كورسەتتى.
2019 جىلى دا جەڭىستى جول جالعاستى. جاس سپورتشى 2006 جانە 2007 جىلى تۋعان جاسوسپىرىمدەر اراسىنداعى جامبىل وبلىسىنىڭ چەمپيوناتىندا 1 ورىن الىپ، وڭىرلىك دەڭگەيدە ۇزدىك ەكەنىن دالەلدەدى. سونىمەن قاتار، جاسوسپىرىمدەر اراسىنداعى قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى و. ۆ. كرۋگلوۆتىڭ جۇلدەسىنە ارنالعان I حالىقارالىق تۋرنيردە 3 ورىن يەلەندى. سول جىلى بوكستان 4 الەم چەمپيوناتىندا 1 ورىنعا كوتەرىلىپ، سامارا قالاسىندا وتكەن VI حالىقارالىق تۋرنيردە دە جەڭىمپاز بولدى.
2020 جىلى «اسقار جۇماباەۆ» اتىنداعى قورداي باتىر كۇرەس كلۋبىنىڭ كۋبوگى ءۇشىن وتكەن حالىقارالىق تۋرنيردە 1 ورىن الدى. ال 2025 جىلى قاراعاندى قالاسىندا وتكەن ع. جارىلعاپوۆتى ەسكە الۋعا ارنالعان حالىقارالىق تۋرنيردە تاعى دا جەڭىمپاز اتاندى. مۇنداي بەدەلدى جارىستاردا توپ جارۋ سپورتشىنىڭ شەبەرلىگى مەن تاجىريبەسىن ودان ءارى ايقىنداي ءتۇستى.
جەتىستىكتەردىڭ ارقايسىسى ءبىر كۇندىك ەڭبەكتىڭ ەمەس، جىلدار بويى توگىلگەن تەردىڭ، ءتوزىمنىڭ، باپكەر مەن شاكىرت اراسىنداعى سەنىمنىڭ ناتيجەسى. شارشى الاڭدا جەڭىسكە جەتۋ ءۇشىن سپورتشى تەك قارسىلاسىن عانا ەمەس، ءوز بويىنداعى شارشاۋدى، قوبالجۋدى، كۇماندى دە جەڭۋى كەرەك. جاس تالانتتىڭ سپورتتىق جولىنان وسىنداي مىنەز انىق بايقالادى.
2026 جىل جاس بوكسشى ءۇشىن جاڭا بەلەستىڭ باستالۋىمەن ەستە قالدى. كاسىپقوي بوكسقا قادام باسىپ، العاشقى جەكپە جەكتەرىندە جەڭىس ءدامىن تاتتى. بيىل Steppe Boxing وسكەمەن قالاسىندا ۇيىمداستىرعان بوكس كەشىندە 1 ورىندى جەڭىپ الدى. ال تاراز قالاسىنداعى جاقسىلىق ۇشكەمپىروۆ اتىنداعى «تاراز ارەنا» سپورت كەشەنىندە قازاقستان كاسىبي بوكس فەدەراتسياسىنىڭ ۇيىمداستىرۋىمەن وتكەن ءدۇبىرلى دودادا باۋىردان ءالي تاجىكستان وكىلى رادجابوي احمەدوۆپەن شارشى الاڭعا شىقتى. جەكپە جەك ءتورت راۋندقا جوسپارلانعانىمەن، ايقاس ۇزاققا سوزىلعان جوق. قارسىلاسىن ءبىرىنشى راۋندتىڭ 57 سەكۋندىندا تەحنيكالىق نوكاۋتپەن جەڭىپ، جانكۇيەرلەردى قۋانتتى.
مۇنداي جەڭىستەر كەزدەيسوق كەلمەيدى. رينگتە ءار سەكۋندتىڭ سالماعى بار. جىلدام ويلاۋ، اراقاشىقتىقتى دۇرىس ەسەپتەۋ، ءساتتى ءدال پايدالانۋ، قارسىلاستىڭ وسال تۇسىن دەر كەزىندە كورۋ ۇزاق ەڭبەكتىڭ جەمىسى سانالادى. تارازداعى جەڭىس جاس بوكسشىنىڭ تەك كۇشكە عانا ەمەس، تاكتيكا مەن ىشكى سەنىمگە دە سۇيەنەتىن سپورتشى ەكەنىن كورسەتتى.
جاس سپورتشى تەك سپورتتىق جەتىستىكتەرىمەن عانا ەمەس، ازاماتتىق بولمىسىمەن دە ەرەكشەلەنەدى. وقۋ مەن سپورتتى قاتار الىپ ءجۇرۋ وڭاي ەمەس. قاراعاندى اكادەمياسىنىڭ كۋرسانتى رەتىندە بولاشاق قۇقىق قورعاۋ سالاسىنىڭ مامانى بولىپ قالىپتاسىپ جاتىر. ال سپورتتاعى تابىسى تارتىپكە، جۇيەلى ەڭبەككە، جىگەر مەن جاۋاپكەرشىلىككە بەرىك ەكەنىن دالەلدەيدى. ەكى باعىت ءبىرىن ءبىرى تولىقتىرىپ تۇرعانداي. اكادەمياداعى ءتارتىپ سپورتتاعى مىنەزدى شىڭداسا، سپورتتاعى ءتوزىم قىزمەتتەگى جاۋاپكەرشىلىكتى كۇشەيتەدى.
بوكس مىنەزدىڭ سپورتى. قازاق بوكسى ءار داۋىردە جاڭا ەسىمدەرمەن تولىعىپ كەلەدى. ءبىر بۋىن ەل نامىسىن وليمپيادادا، الەم چەمپيوناتتارىندا قورعادى. ەندى ءىزىن جالعايتىن جاس تولقىن ءوسىپ كەلەدى. جامبىلدىق بىلعارى قولعاپ شەبەرى سول جاڭا بۋىننىڭ وكىلى. بۇگىنگى جەڭىستەرى ۇلكەن جولدىڭ باسى عانا. ال ۇلكەن جول ارقاشان تاباندىلىقتى، ءتارتىپتى جانە تىنىمسىز ەڭبەكتى تالاپ ەتەدى.
جاس سپورتشى الداعى ۋاقىتتا تاعى ءبىر جاۋاپتى سىنعا قاتىسۋعا مۇمكىندىك الىپ وتىر. 24-30 مامىر ارالىعىندا الماتى قالاسىندا كەڭەس وداعىنىڭ باتىرى، «حالىق قاھارمانى»، ارميا گەنەرالى س. ق. نۇرماعامبەتوۆتى ەسكە الۋعا ارنالعان حالىقارالىق تۋرنيرگە جولداما الدى. جانكۇيەرلەرى بۇل جارىستا دا ونىڭ جەڭىس تۇعىرىنان كورىنەرىنە سەنىم ارتادى. ەگەر اتالعان سايىستا الدىڭعى ورىنداردان كورىنىپ، 1 نەمەسە 2 ورىن يەلەنسە، شىلدە ايىندا مالايزيادا وتەتىن قارۋلى كۇشتەر اراسىنداعى الەم چەمپيوناتىنا قاتىسۋ مۇمكىندىگى دە بەكىتىلۋى ىقتيمال.
ءىلياس جانسۇگىروۆتىڭ «ءوز ەلى ءوز ەرلەرىن ەسكەرمەسە، ەل تەگى قايدان السىن كەمەڭگەردى» دەگەن تاعىلىمدى ءسوزى وسىندايدا ويعا ورالادى. ەل نامىسىن قورعاپ، ەڭبەگىمەن تانىلىپ جۇرگەن جاستاردى دەر كەزىندە تانىپ، قولداۋ كورسەتۋ ورتاق پارىز. باۋىرجان ءالي ادىلبەكۇلىنىڭ بۇگىنگى جەتىستىگى جامبىل ءوڭىرىنىڭ عانا ەمەس، قازاق سپورتىنىڭ مەرەيى. ەرىن ەسكەرگەن ەلدىڭ ەڭسەسى بيىك، بولاشاعى نۇرلى بولماق.
قاجەت انداس،
«Q-andas» اقپارات اگەنتتىگى
