«Q-Andas» اقپارات اگەنتتىگى ەل ىشىندەگى تالانتتى جاستاردىڭ يگىلىكتى ىستەرى مەن جارقىن جەتىستىكتەرىن جۇرتشىلىققا جەتكىزۋدى ءاردايىم باستى ماقساتتارىنىڭ ءبىرى سانايدى. ويتكەنى، ءىلياس جانسۇگىروۆ ايتقانداي: «ءوز ۇلىن، ءوز ەرلەرىن ەسكەرمەسە، ەل تەگى قايدان السىن كەمەڭگەردى؟»
سايتىمىز بۇعان دەيىن دە جاس بوكسشى باۋىرجان ءاليدىڭ سپورتتاعى جەتىستىكتەرى تۋرالى جازعان بولاتىن. ( وسى سىلتەمەدەن وقۋعا بولادى). سودان بەرى ونىڭ ءاربىر قادامىن ءجىتى باقىلاپ، شارشى الاڭداعى جەڭىستەرىنە تىلەۋلەس بولىپ كەلەمىز. بۇگىن رەداكتسيامىزعا تاعى ءبىر قۋانىشتى حابار جەتتى.
باۋىرجان ءالي وتاندىق سپورتتىڭ دامۋىنا قوسقان ۇلەسى ءۇشىن قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆتىڭ اتىنان «قۇرمەت» توسبەلگىسىمەن ماراپاتتالدى.
بۇل ماراپات – جاس سپورتشىنىڭ قاجىرلى ەڭبەگى مەن تاباندىلىعىنىڭ، ەل نامىسىن ابىرويمەن قورعاپ جۇرگەن ناتيجەلى جولىنىڭ لايىقتى باعاسى.
باۋىرجان ءالي قازىرگى ۋاقىتتا قازاقستان رەسپۋبليكاسى ىشكى ىستەر مينيسترلىگىنىڭ قاراعاندى اكادەمياسىندا ءبىلىم الىپ جۇرگەن كۋرسانت. سونىمەن قاتار ول ىشكى ىستەر مينيسترلىگىنىڭ «ارلان» سپورت كلۋبىنىڭ نامىسىن قورعاپ، ءتۇرلى جارىستاردا جوعارى ناتيجەلەر كورسەتىپ كەلەدى.
Посмотреть эту публикацию в Instagram
جاس سپورتشىعا ءتان ەڭ ەرەكشە قاسيەتتىڭ ءبىرى – اسكەري ءتارتىپ پەن كاسىبي بوكس مانسابىن قاتار الىپ ءجۇرۋى. كۋرسانتتىق مىندەت ۇلكەن جاۋاپكەرشىلىكتى، تەمىردەي ءتارتىپ پەن توزىمدىلىكتى تالاپ ەتەدى. ال كاسىبي سپورتتا بيىك ناتيجەگە جەتۋ ءۇشىن كۇن سايىنعى تىنىمسىز جاتتىعۋ، جىگەر جانە جەڭىسكە دەگەن سەنىم قاجەت. باۋىرجان ءالي وسى ەكى باعىتتى ۇيلەستىرە وتىرىپ، ءوزىنىڭ ماقساتشىلدىعىن ىسىمەن دالەلدەپ ءجۇر.
ول ۇلتتىق قۇراما ساپىندا دا ونەر كورسەتىپ، حالىقارالىق جانە رەسپۋبليكالىق جارىستاردا ەل نامىسىن ابىرويمەن قورعاپ كەلەدى. ونىڭ ءاربىر جەڭىسى – جەكە سپورتتىق جەتىستىك قانا ەمەس، قازاقستاندىق بوكستىڭ بەدەلىن كوتەرۋگە قوسىلعان ۇلەس.
كۋرسانتتىق مىندەتىن اتقارا ءجۇرىپ، كاسىبي مانسابىن جوعارى دەڭگەيدە جالعاستىرۋى قازاقستاندىق بوكس تاريحىندا ءجيى كەزدەسە بەرمەيتىن ەرەكشە جاعدايلاردىڭ ءبىرى. بۇل جەتىستىك باۋىرجان ءاليدىڭ تارتىپكە بەرىكتىگىن، ەڭبەكقورلىعىن جانە ەل الدىنداعى جاۋاپكەرشىلىگىن ايقىن اڭعارتادى.
«Q-Andas» اقپارات اگەنتتىگىنىڭ ۇجىمى باۋىرجان ءاليدى مارتەبەلى ماراپاتىمەن شىن جۇرەكتەن قۇتتىقتايدى! جاس بوكسشىنىڭ الداعى ۋاقىتتا دا كوك تۋىمىزدى بيىككە كوتەرىپ، ەل قورجىنىنا تالاي جەڭىس سىيلايتىنىنا سەنەمىز.
قاجەت انداس،
«Q-Andas» اقپارات اگەنتتىگى.











