Q-Andas» ақпарат агенттігі ел ішіндегі талантты жастардың игілікті істері мен жарқын жетістіктерін жұртшылыққа жеткізуді әрдайым басты мақсаттарының бірі санайды. Өйткені, Ілияс Жансүгіров айтқандай: «Өз ұлын, өз ерлерін ескермесе, ел тегі қайдан алсын кемеңгерді?»
Сайтымыз бұған дейін де жас боксшы Бауыржан Әлидің спорттағы жетістіктері туралы жазған болатын. ( осы сілтемеден оқуға болады). Содан бері оның әрбір қадамын жіті бақылап, шаршы алаңдағы жеңістеріне тілеулес болып келеміз. Бүгін редакциямызға тағы бір қуанышты хабар жетті.
Бауыржан Әли отандық спорттың дамуына қосқан үлесі үшін Қазақстан Республикасының Туризм және спорт министрі Ербол Мырзабосыновтың атынан «Құрмет» төсбелгісімен марапатталды.
Бұл марапат – жас спортшының қажырлы еңбегі мен табандылығының, ел намысын абыроймен қорғап жүрген нәтижелі жолының лайықты бағасы.
Бауыржан Әли қазіргі уақытта Қазақстан Республикасы Ішкі істер министрлігінің Қарағанды академиясында білім алып жүрген курсант. Сонымен қатар ол Ішкі істер министрлігінің «Арлан» спорт клубының намысын қорғап, түрлі жарыстарда жоғары нәтижелер көрсетіп келеді.
Посмотреть эту публикацию в Instagram
Жас спортшыға тән ең ерекше қасиеттің бірі – әскери тәртіп пен кәсіби бокс мансабын қатар алып жүруі. Курсанттық міндет үлкен жауапкершілікті, темірдей тәртіп пен төзімділікті талап етеді. Ал кәсіби спортта биік нәтижеге жету үшін күн сайынғы тынымсыз жаттығу, жігер және жеңіске деген сенім қажет. Бауыржан Әли осы екі бағытты үйлестіре отырып, өзінің мақсатшылдығын ісімен дәлелдеп жүр.
Ол ұлттық құрама сапында да өнер көрсетіп, халықаралық және республикалық жарыстарда ел намысын абыроймен қорғап келеді. Оның әрбір жеңісі – жеке спорттық жетістік қана емес, қазақстандық бокстың беделін көтеруге қосылған үлес.
Курсанттық міндетін атқара жүріп, кәсіби мансабын жоғары деңгейде жалғастыруы қазақстандық бокс тарихында жиі кездесе бермейтін ерекше жағдайдың бірі. Бұл жетістік Бауыржан Әлидің тәртіпке беріктігін, еңбекқорлығын және ел алдындағы жауапкершілігін айқын аңғартады.
«Q-Andas» ақпарат агенттігінің ұжымы Бауыржан Әлиді мәртебелі марапатымен шын жүректен құттықтайды! Жас боксшының алдағы уақытта да көк Туымызды биікке көтеріп, ел қоржынына талай жеңіс сыйлайтынына сенеміз.
Қажет Андас,
«Q-Andas» ақпарат агенттігі.











