قازىرگى ۋاقىتتا جاساندى ينتەللەكت (جي) ءبىلىم بەرۋ سالاسىنىڭ اجىراماس بولىگىنە اينالدى. كۇن سايىن وقۋشىلار مەن ستۋدەنتتەر تاپسىرمالارىن ورىنداۋدا، جاڭا مالىمەت ىزدەۋدە جانە شىعارماشىلىق جۇمىستار جاساۋدا JI قۇرالدارىن ءجيى پايدالانادى. ChatGPT، Google Gemini، Copilot سياقتى پلاتفورمالار وقۋ پروتسەسىن جەڭىلدەتىپ، اقپاراتقا قول جەتكىزۋدى الدەقايدا جىلدام ەتتى. الايدا ماماندار مەن ۇستازدار بۇل قۇبىلىستىڭ ەكى قىرى بار ەكەنىن ەسكەرتەدى.
جي-دىڭ كومەگى ءسوزسىز پايدالى. ول كۇردەلى ۇعىمداردى ءتۇسىندىرىپ، جازبا جۇمىستاردى جەتىلدىرۋگە، جاڭا يدەيالار تابۋعا مۇمكىندىك بەرەدى. الايدا بالانىڭ بارلىعىن تەك جاساندى ينتەللەكت ارقىلى ۇيرەنۋى دۇرىس ەمەس.
ءبىلىمنىڭ ەڭ باستى بولىگى – ءوز بەتىمەن ىزدەنۋ، ويلانۋ جانە قاتەلىكتەن ساباق الۋ. ەگەر بالا ءبارىن دايىن كۇيدە السا، ونىڭ سىني ويلاۋ قابىلەتى، شىعارماشىلىعى مەن تاباندىلىعى دامىمايدى.
پوليتسيا سەرجانتى رينات تولەپبەرگەنوۆ:
– مەنىڭ ويىمشا، جاساندى ينتەللەكت – جاقسى قۇرال. بىراق بالاعا ءبارىن دايىن كۇيدە ۇسىنۋ ونىڭ ەرتەڭگى ومىردە شەشىم قابىلداۋ قابىلەتىن السىرەتەدى، – دەپ پىكىر ءبىلدىردى.
ءبىلىم تەك اقپارات الۋ ەمەس، ول – ويلانۋ، ىزدەنۋ جانە ەڭبەك ەتۋ پروتسەسى. ەگەر وقۋشىلار ءوز بەتىمەن ۇيرەنۋدى ۇمىتپاسا، ال جي تەك كومەكشى ءرول اتقارسا، ول ناعىز ناتيجەلى جۇيە بولار ەدى.
باستاۋىش سىنىپ مۇعالىمى كاميلا جۇمابايقىزىنىڭ ايتۋىنشا، جاساندى ينتەللەكت وقۋ پروتسەسىن جەڭىلدەتكەنىمەن، بالالاردىڭ ويلاۋ مادەنيەتىن قالىپتاستىرۋدا مۇعالىمنىڭ ورنى ەرەكشە.
– “كەيدە بالالار تاپسىرمانى ChatGPT-كە جازدىرىپ الادى، بىراق نە جازىلعانىن وزدەرى تۇسىنبەيدى. بۇل قاۋىپتى ءۇردىس. مۇعالىمنىڭ مىندەتى – ءبىلىمدى تەك جەتكىزۋ ەمەس، بالانى ويلانۋعا ۇيرەتۋ. ەگەر جي تەك كومەكشى قۇرال رەتىندە قولدانىلسا، ول وتە ءتيىمدى. بىراق ول ەشقاشان ادامدىق تاربيە مەن ۇستازدىق جىلۋلىقتى الماستىرا المايدى”، – دەيدى.
ال بولاشاق ستۋدەنت ايارۋ ءابدىلدا: “جي” – باعىت بەرۋشى قۇرال”
– مەن جي-دى ءجيى قولدانامىن. بىراق ءبارىن ودان سۇراي بەرمەيمىن. مىسالى، مەن ودان باعىت نەمەسە تۇسىنىكتەمە الامىن دا، قالعانىن ءوزىم ىزدەنىپ جازامىن. وسىلاي ۇيرەنۋ الدەقايدا پايدالىراق”، – دەيدى.
جاساندى ينتەللەكت – ءبىلىم بەرۋدىڭ جاڭا ءداۋىرىن اشقان قۋاتتى قۇرال. ول دۇرىس قولدانىلعاندا وقۋشىنىڭ تانىمدىق قابىلەتىن ارتتىرۋ مەن وقۋ پروتسەسىن جەڭىلدەتۋگە كومەكتەسەدى.
بىراق تەحنولوگيانى شامادان تىس پايدالانۋ بالانىڭ دەربەس ويلاۋ مەن ىزدەنۋ قابىلەتىنە كەرى اسەر ەتۋى مۇمكىن.
سوندىقتان ەڭ دۇرىس جول – جي-دى باعىتتاۋشى قۇرالعا اينالدىرىپ، ال باستى ىزدەنىس پەن تالداۋ جۇمىسىن وقۋشىنىڭ وزىنە قالدىرۋ.
سوندا عانا جاساندى ينتەللەكت ادامعا كومەكشى بولىپ، ءبىلىمنىڭ ساپاسى ارتىپ، جاڭا مۇمكىندىكتەرگە جول اشىلادى.
ءلاززات مۇحامەدجان
Q-Andas.kz رەداكتسياسى
