Qazirgi uaqytta jasandy intellekt (JI) bilim beru salasynyń ajyramas bóligine ainaldy. Kún saiyn oqushylar men studentter tapsyrmalaryn oryndauda, jańa málimet izdeude jáne shyǵarmashylyq júmystar jasauda JI qúraldaryn jii paidalanady. ChatGPT, Google Gemini, Copilot siyaqty platformalar oqu protsesin jeńildetip, aqparatqa qol jetkizudi áldeqaida jyldam etti. Alaida mamandar men ústazdar búl qúbylystyń eki qyry bar ekenin eskertedi.
JI-dyń kómegi sózsiz paidaly. Ol kúrdeli úǵymdardy túsindirip, jazba júmystardy jetildiruge, jańa ideyalar tabuǵa múmkindik beredi. Alaida balanyń barlyǵyn tek jasandy intellekt arqyly úirenui dúrys emes.
Bilimniń eń basty bóligi – óz betimen izdenu, oilanu jáne qatelikten sabaq alu. Eger bala bárin daiyn kúide alsa, onyń syni oilau qabileti, shyǵarmashylyǵy men tabandylyǵy damymaidy.
Politsiya serjanty Rinat Tólepbergenov:
– Meniń oiymsha, jasandy intellekt – jaqsy qúral. Biraq balaǵa bárin daiyn kúide úsynu onyń erteńgi ómirde sheshim qabyldau qabiletin álsiretedi, – dep pikir bildirdi.
Bilim tek aqparat alu emes, ol – oilanu, izdenu jáne eńbek etu protsesi. Eger oqushylar óz betimen úirenudi úmytpasa, al JI tek kómekshi ról atqarsa, ol naǵyz nátijeli júie bolar edi.
Bastauysh synyp múǵalimi Kamila Júmabaiqyzynyń aituynsha, jasandy intellekt oqu protsesin jeńildetkenimen, balalardyń oilau mádenietin qalyptastyruda múǵalimniń orny erekshe.
– “Keide balalar tapsyrmany ChatGPT-ke jazdyryp alady, biraq ne jazylǵanyn ózderi túsinbeidi. Búl qauipti úrdis. Múǵalimniń mindeti – bilimdi tek jetkizu emes, balany oilanuǵa úiretu. Eger JI tek kómekshi qúral retinde qoldanylsa, ol óte tiimdi. Biraq ol eshqashan adamdyq tárbie men ústazdyq jylulyqty almastyra almaidy”, – deidi.
Al Bolashaq student Aiaru Ábdilda: “JI” – baǵyt berushi qúral”
– Men JI-dy jii qoldanamyn. Biraq bárin odan súrai bermeimin. Mysaly, men odan baǵyt nemese túsinikteme alamyn da, qalǵanyn ózim izdenip jazamyn. Osylai úirenu áldeqaida paidalyraq”, – deidi.
Jasandy intellekt – bilim berudiń jańa dáuirin ashqan quatty qúral. Ol dúrys qoldanylǵanda oqushynyń tanymdyq qabiletin arttyru men oqu protsesin jeńildetuge kómektesedi.
Biraq tehnologiyany shamadan tys paidalanu balanyń derbes oilau men izdenu qabiletine keri áser etui múmkin.
Sondyqtan eń dúrys jol – JI-dy baǵyttaushy qúralǵa ainaldyryp, al basty izdenis pen taldau júmysyn oqushynyń ózine qaldyru.
Sonda ǵana jasandy intellekt adamǵa kómekshi bolyp, bilimniń sapasy artyp, jańa múmkindikterge jol ashylady.
Lázzat MÚHAMEDJAN
Q-Andas.kz redaktsiyasy
