بۇگىنگى ءداۋىر – عىلىم مەن تەحنيكانىڭ ءداۋىرى. عىلىم ادامدارىن قۇرمەتتەۋدى، ناسيحاتتاۋدى كوبەيتكەن ءجون. كەزىندە ماعجانداردىڭ داۋىرىندە جازىلىپ، قازىردە ارحيۆتەردە جاتقان وقۋلىقتاردى اقتارعان سايىن ارمانىم ۇشتالادى، دارمەنىم قۇريدى.
بالالارىمىز قازىر ەڭبەككە قىرسىز بولىپ بارادى. ونىڭ سەبەبى – مەكتەپ باعدارلاماسىنداعى ەڭبەك ءپانىنىڭ جۇكتەمەسىن ازايتىپ، سىزۋ ءپانىن مۇلدەم الىپ تاستاعانى. سوندىقتان قازىرگى وقۋشىلار بەينەلەۋ ونەرىنىڭ جانرىنان حابارسىز ءوسىپ كەلەدى. بۇل تۋرالى بىرنەشە ماقالا جاريالاپ، ءوز پىكىرىمدى ايتقانمىن، وكىنىشكە قاراي، ەشقانداي ناتيجە شىقپادى.
مىسالى، ەكونوميكاسى كۇن سايىن قارقىندى دامىپ وتىرعان قىتايداعى باستاۋىش سىنىپتاردا بەينەلەۋ ونەرى، ەڭبەك، مۋزىكا پاندەرى 2 ساعاتتان وتەدى. ال 6-سىنىپتان باستاپ 9-سىنىپقا دەيىن اپتاسىنا 4-ساعاتتان، 10-11 سىنىپتاردا اپتاسىنا 6-ساعاتتان. ال 12-سىنىپتا ءبىر سىنىپ ءۇش توپقا ءبولىنىپ (قولونەر، كومپيۋتەر جيناۋ، كاسىپتىك ماماندار) اپتاسىنا ارقايسىسى 6-ساعاتتان ءبىلىم الادى. مىنە، وسىنداي ەڭبەك ءپانىنىڭ ارقاسىندا قىتايلىقتار ءوندىرىس سالاسىندا ەڭ بەلسەندى بولىپ وتىر. ءبىز وسى ءۇردىستى مىقتى ۇستاماعاننان جۇمىسسىزدىق كوبەيىپ، اتالعان ءپان ماماندارىنىڭ بەدەلى ءتۇسىپ كەتتى. قازىرگى كەزدە قاراپايىم دانەكەرشى (سۆارشيك، گازوسۆارشيك) ماماندىعى تاپشى ەكەنى جاسىرىن ەمەس.
سوندىقتان كوركەم ەڭبەك ءپانىن ەكىگە ءبولۋ كەرەك. 9-سىنىپتاعى ءۇي جيھازدارى وقۋشىلاردى قىزىقتىرمايدى، «ارحيتەكتۋرا» تۋرالى ءبىلىم تاريح ءپانىنىڭ مادەنيەتتانۋ بولىمىنە اۋىستىرىلۋى كەرەك. 6-سىنىپتاعى «روبوت» تاقىرىبى كوركەم ەڭبەك ساباعىنا قاتىستى ەمەس، 7-سىنىپتاعى «ديزاين» تۋرالى تاقىرىپتى ەڭبەك كابينەتتەرىنە كومپيۋتەردى ورناتۋ نەمەسە كومپيۋتەر سىنىبىنا بارىپ وقىعانى دۇرىس. 6-سىنىپتاعى ەلەكتر بۇرعىلارمەن جۇمىستى جوعارى سىنىپتارعا اۋىستىرعان ءجون. 8-سىنىپتاعى ۇستەل ويىنى تۇككە كاجەتى جوق. گرافيكا جانە جوبالاۋ ءپانىن «سىزۋ» ءپانى دەپ اۋىستىرۋ كەرەك. ويتكەنى بارلىق تەحنيكالىق ماماندىق – ديزاين، ساۋلەت قۇرىلىس، فيزيكا، گەومەتريا، ماتەماتيكا، ت.ب. سىزۋ پانىمەن تىكەلەي بايلانىستى. جالپى، «سىزۋ» ءپانىن 9-10-سىنىپتارعا مىندەتتى كومپونەنت رەتىندە قايتارعان دۇرىس. 2000 جىلعى تەحنولوگيا جانە بەينەلەۋ ونەرىنىڭ باعدارلامالارىن 2013 جىلعى باعدارلامالارمەن تولىقتىرىپ قايتا قارالسا دەگەن ۇسىنىسىم بار. بۇرىنعى «تەحنولوگيا» ءپانىن قايتارىپ، 2-9-سىنىپقا اپتاسىنا 2-ساعاتتان بەكىتىلسە،10-11-سىنىپتارعا بۇرىنعى «كاسىپتىك وقىتۋ»، «وندىرىستىك پايدالى ەڭبەك» پاندەرى 2 ساعاتپەن، بەينەلەۋ ونەرىن 1-6-سىنىپتاردا اپتاسىنا 2 ساعاتتان، «سىزۋ» ءپانىن 8-9-سىنىپتارعا اپتاسىنا 2 ساعاتتان وتكىزسە، ۇلدار مەن قىزداردى «تەحنولوگيا» ساباعىندا بولەك وقىتىلسا قۇبا قۇپ.
قىسقاسى، قازىرگى تاڭداعى ءبىلىم بەرۋ سالاسىندا بالا مەن مۇعالىم، اتا-انا مەن مۇعالىم، بالا مەن اتا-انا اراسىنداعى بارلىق كەلىسپەۋشىلىكتى وقۋلىقتاعى ولقىلىقتار تۋىنداتىپ وتىر. ەگەر ول تۇزەلمەسە، وسى كەتكەنىمىز كەتكەن!
قاجەت انداس،
Q-Andas اقپاراتتىق اگەنتتىگى.
