تالدىقورعان قالاسىندا كونتەنت جاساۋدى ۇيرەتەتىن 2 كۇندىك پراكتيكالىق ينتەنسيۆ ۇيىمداستىرىلدى. باعدارلاما اياسىندا موبيلوگرافيا جانە جاساندى ينتەللەكت ارقىلى ۆيدەو جاساۋ ۇيرەتىلدى.
ءبىرىنشى كۇنى قاتىسۋشىلار تەلەفونمەن كاسىبي ءتۇسىرۋدىڭ نەگىزگى قاعيدالارىن مەڭگەردى. كادر قۇرۋ، جارىق قويۋ، راكۋرس تاڭداۋ جانە كۇندەلىكتى كونتەنتتى ساپالى ءتۇسىرۋ تاسىلدەرى جان-جاقتى ءتۇسىندىرىلدى.
ەكىنشى كۇنى ماتىننەن ۆيدەو گەنەراتسيالاۋ، AI قۇرالدارى ارقىلى جىلدام كونتەنت ازىرلەۋ جانە كرەاتيۆتى فورماتتار بويىنشا پراكتيكالىق جۇمىس جۇرگىزىلدى. قاتىسۋشىلار زاماناۋي جاساندى ينتەللەكت پلاتفورمالارىنىڭ مۇمكىندىكتەرىمەن تانىسىپ، ناقتى مىسالدار ارقىلى ۆيدەو جاساۋ پروتسەسىن تاجىريبەدە ورىندادى.
ينتەنسيۆ اياسىندا Qandas.kz ۆەب-سايتىنىڭ رەداكتورى ەرعالي ءالي ەكىنشى كۇنى سپيكەر رەتىندە قاتىسىپ، جاساندى ينتەللەكت ارقىلى ۆيدەو گەنەراتسيالاۋ بويىنشا پراكتيكالىق ساباق وتكىزدى. ساباق بارىسىندا AI گەنەراتسياسىنىڭ بازالىق ۇعىمدارى، ماتىننەن ۆيدەو جاساۋ الگوريتمدەرى، ءتيىمدى پرومپت قۇراستىرۋ قاعيدالارى جانە نەيروجەلىلەرمەن دۇرىس جۇمىس ىستەۋ تاسىلدەرى ءتۇسىندىرىلدى. تەوريالىق ءبولىم ناقتى مىسالدارمەن ۇشتاستىرىلىپ، قاتىسۋشىلار وزدەرى پرومپت جازىپ، AI قۇرالدارىنىڭ كومەگىمەن قىسقا ۆيدەولار ازىرلەدى. وسىلايشا، ەكىنشى كۇن پراكتيكالىق فورماتتا ءوتىپ، قاتىسۋشىلار جاساندى ينتەللەكتتى كونتەنت وندىرىسىندە قولدانۋدىڭ ناقتى داعدىلارىن مەڭگەردى.
ۇيىمداستىرۋشىلاردىڭ ايتۋىنشا، ينتەنسيۆ ناتيجەسىندە قاتىسۋشىلار ەكى كۇننىڭ ىشىندە كونتەنت جاساۋدىڭ زاماناۋي قۇرالدارىن مەڭگەرىپ، الەۋمەتتىك جەلىگە ارنالعان ۆيدەونى ساپالى ءتۇسىرۋ جانە AI ارقىلى كونتەنت دايىنداۋ داعدىلارىن دامىتتى. ءىس-شارا تالدىقورعان قالاسىنداعى جاستارعا قىزمەت كورسەتۋ ورتالىعىندا ءوتتى.
«Q-andas» اقپاراتتىق اگەنتتىگى.
