حالىقارالىق جاستار كۇنىنە وراي ۇيىمداستىرىلعان ءباسپاسوز ءماسليحاتىندا جاستاردىڭ قوعامدىق ومىرگە بەلسەنە ارالاسۋى جانە جۇمىسپەن قامتىلۋىنا باعىتتالعان شارالار تۋرالى ءسوز بولدى. سونىڭ ءبىرى جاستار ومىرىنە جاڭاشا باعدار بەرەتىن «تازا قازاقستان» اكتسياسى. ەكولوگيالىق باستاما اياسىندا جاستاردىڭ قاتىسۋىمەن تازالىق جۇمىستارى ۇيىمداستىرىلىپ، تۋعان ولكەنىڭ كوركەيۋىنە ۇلەس قوسۋعا مۇمكىندىك بەرىلەدى. بۇل تۋرالى «Jetisu Jastary» كمم ديرەكتورى ارناي راقىمبەردىۇلى ايتىپ ءوتتى. ونىڭ ايتۋىنشا، جاستاردىڭ بوس ۋاقىتىن ءتيىمدى پايدالانۋعا باعىتتالعان ءتۇرلى شارا مەن جوبالار وتكىزىلمەكشى. بۇل جاس بۋىننىڭ بەلسەندىلىگىن ارتتىرىپ، جاڭا باستامالارعا جول اشادى دەگەن ويدامىز.
مەكەمە جاستاردى جۇمىسپەن قامتۋ باعىتىندا بوس جۇمىس ورىندارى جارمەڭكەلەرىن ۇيىمداستىرىپ، جاستارعا جۇمىس بەرۋشىلەرمەن تىكەلەي بايلانىس ورناتىپ، وزىنە لايىقتى جۇمىس تابۋعا مۇمكىندىك ۇسىنادى. وسى تۇستا جاستاردىڭ كاسىبي بىلىكتىلىگىن ارتتىرۋعا «جاستار پراكتيكاسى» باعدارلاماسى دا سەپتىگىن تيگىزەدى. باعدارلاما ارقىلى جاس ماماندار ەڭبەك تاجىريبەسىن جيناقتاپ، ءوز سالاسى بويىنشا جۇمىس ىستەۋگە جاعداي جاسالادى.
ايسۇلۋ باۋىرجانقىزى
“Q-Andas” اقپارات اگەنتىگىنىڭ ءتىلشىسى
بەينەوپەراتور
ءامينا ساياحاتقىزى.











