بۇگىندە كىتاپحانا ءىسى زامان تالابىنا ساي جاڭارىپ، باسقارۋ جۇيەسىنە جاڭا تەحنولوگيالار مەن ادىستەر ەنگىزىلدى. سونىڭ ناتيجەسىندە كىتاپ قورىن ساقتاۋ، وقىرمانعا قىزمەت كورسەتۋ ساپاسى جوعارى دەڭگەيگە كوتەرىلدى. رۋحاني جاڭعىرۋدى، ادامي قۇندىلىقتاردى دارىپتەيتىن جاڭا ەڭبەكتەر وقىرمانعا جول تارتىپ، كوپشىلىكتىڭ ىقىلاسىنا بولەنۋدە. ەلەكتروندى كىتاپ قورلارى مەن ۇلتتىق ەلەكتروندى كىتاپحانانىڭ دامۋى كىتاپقا قولجەتىمدىلىكتى ارتتىرىپ، ءبىلىمدى تەرەڭدەتۋگە، وقۋ مادەنيەتىن قالىپتاستىرۋعا جانە وقىرمان قىزىعۋشىلىعىن كۇشەيتۋگە ىقپال ەتۋدە.
وسى تۇرعىدان كەلگەندە وبلىستىق امبەباپ كىتاپحاناسى 2019 جىلدان بەرى مەملەكەتتىك تاپسىرىسپەن، سىيعا تارتىلعان جانە جەرگىلىكتى قارجى ەسەبىنەن الىنعان جاڭا ادەبيەتتەردى «WEB-RABIS» باعدارلاماسى ارقىلى ەلەكتروندى كاتالوگقا ەنگىزە باستادى. ال 2023 جىلدىڭ ناۋرىز ايىنان بەرى «سابيربيس» باعدارلاماسىنىڭ «كومپلەكتوۆانيا» مەن «كاتولوگيزاتور» مودۋلدەرى ىسكە قوسىلىپ، جۇيەلى تۇردە وقىرمانعا ۇسىنىلۋدا. بۇل تاجىريبە اۋداندىق كىتاپحانا قىزمەتكەرلەرىنە دە ۇيرەتىلىپ، تاجىريبە الماسۋ شارالارى ناتيجەسىندە بۇكىل وبلىس كولەمىندە كىتاپتار ەلەكتروندى بازاعا ەنگىزىلدى.
«تسيفرلى قازاقستان» باعدارلاماسى اياسىنداعى ىزدەنىستەر دە ءوز ناتيجەسىن بەرۋدە. باسىلىمدار مەن عىلىمي ەڭبەكتەردى، مادەني ماڭىزدى ولكەتانۋ قۇجاتتارى مەن سيرەك كەزدەسەتىن قولجازبالاردى ساندىق فورماتقا كوشىرۋ باعىتىندا بەلسەندى ءىس اتقارىلىپ كەلەدى. بۇل ءۇردىس ۇلتتىق مۇرانى جوعالتپاي ساقتاۋعا، قۇندىلىقتاردى بولاشاققا جەتكىزۋگە سەپتىگىن تيگىزەدى.
كىتاپحانالىق قىزمەتتىڭ جاڭا ءتۇرىنىڭ ءبىرى QR-كود جۇيەسى. كەز كەلگەن سمارتفون يەسى كامەرا ارقىلى قاجەتتى اقپاراتقا لەزدە قول جەتكىزە الادى. بۇل وقىرمان ءۇشىن ۋاقىتتى ۇنەمدەپ، دەرەككە تەز ءارى ناقتى جول تابۋدىڭ ءتيىمدى ءتاسىلى بولىپ وتىر. سوڭعى جىلدارى قر ۇلتتىق اكادەميالىق كىتاپحاناسى تاراپىنان ەلەكتروندى مەملەكەتتىك كىتاپحانا قورى جاساقتالىپ، اقپاراتتىق تەڭسىزدىكتى تومەندەتۋگە باعىتتالعان اۋقىمدى جۇمىستار قولعا الىنۋدا.
قازاقستاندىق ۇلتتىق ەلەكتروندى كىتاپحانا قورىنىڭ تولىقتىرىلۋى كىتاپحانا ءىسىنىڭ جاڭا سەرپىن الۋىنا ىقپال ەتتى. بۇگىندە وبلىس كىتاپحانالارى سيرەك ءارى قۇندى كىتاپتارمەن تولىقتىرىلىپ، كەز كەلگەن وقىرمان KazNEB پورتالى ارقىلى kazneb.kz سىلتەمەسىنە كىرىپ، ينتەرنەت ارقىلى ەلەكتروندى كاتالوگتاردى پايدالانا الادى، قۇجاتتاردىڭ كوشىرمەسىن تاپسىرىس بەرىپ نەمەسە تولىق ءماتىنىن وقۋعا مۇمكىندىك تابۋدا.
كىتاپحانا – ۇلتتىق رۋحتىڭ ايناسى. ول ۇرپاقتان-ۇرپاققا اماناتتالعان قۇندىلىقتاردى، تاريح پەن مادەنيەتتى، ادەبيەت پەن سالت-ءداستۇردى ساقتاپ، كەيىنگى بۋىنعا جەتكىزەتىن التىن قازىنا. سوندىقتان دا كىتاپحانانى جاڭعىرتۋ، ونى يننوۆاتسيالىق دەڭگەيدە دامىتۋ ۇلتتىق جاۋاپكەرشىلىك. الەمدىك كىتاپحانا ءىسىنىڭ ۇزدىك تاجىريبەسىن پايدالانىپ، زاماناۋي يننوۆاتسيالىق جوبالاردى ەنگىزۋ ارقىلى عانا قازاقستان كىتاپحانالارى حالىقارالىق دەڭگەيدە مويىندالعان مادەني-اعارتۋشىلىق ورتالىققا اينالا الادى.
ۋاقىت وتكەن سايىن كىتاپحانا ءىسىنىڭ ءمانى ارتىپ، جاڭا تەحنولوگيالار ارقىلى ونىڭ ماڭىزى ەسەلەنە تۇسۋدە. مۇنداي جۇيەلى جۇمىس الداعى ۋاقىتتا دا جالعاسىپ، بولاشاق ۇرپاقتىڭ رۋحاني شامشىراعى بولىپ قالا بەرمەك.
ماقپال انداس،
الماتى وبلىسى ورتالىق امبەبەپ كىتاپحاناسىنىڭ كىتاپحاناشىسى
