سىزدەردىڭ نازارلارىڭىزعا ۇسىنىلىپ وتىرعان حالىقارالىق عىلىمي-تاجىريبەلىك كونفەرەنتسيا ماتەريالدارىنىڭ جيناعى كورنەكتى عالىم، اۋىل شارۋاشىلىعى عىلىمدارىنىڭ دوكتورى، اكادەميك، قازاقستانداعى جابايى جەمىس
ورماندارىن زەرتتەۋ عىلىمىنىڭ نەگىزىن قالاۋشىلاردىڭ ءبىرى ايماق جاڭعاليۇلى جاڭعاليەۆتىڭ تۋعانىنا 113 جىل تولۋىنا ارنالادى.

عالىمنىڭ عىلىمي مۇراسىنىڭ وزەگى – قازاقستاننىڭ بىرەگەي تابيعي بايلىعى سانالاتىن سيۆەرس الماسى (Malus sieversii (Ledeb.) M.Roem.) مەن جابايى جەمىس ورماندارىن زەرتتەۋ، ساقتاۋ جانە ءتيىمدى پايدالانۋ ماسەلەلەرى. اكادەميك ايماق جاڭعاليەۆ ءومىرىن قازاقستاننىڭ جابايى جەمىس وسىمدىكتەرىنىڭ گەنەتيكالىق قورىن ساقتاۋعا، ولاردىڭ شىعۋ تەگى مەن ەۆوليۋتسياسىن زەرتتەۋگە، سەلەكتسيالىق قۇندىلىعىن ايقىنداۋعا ارنادى. ونىڭ ىرگەلى عىلىمي ەڭبەكتەرى قازاقستان عىلىمىنىڭ عانا ەمەس، الەمدىك بوتانيكا، گەنەتيكا جانە جەمىس شارۋاشىلىعى عىلىمىنىڭ التىن قورىنا ەندى.
بۇگىندە جەتىسۋ وڭىرىندەگى سيۆەرس الماسى دۇنيەجۇزىلىك دەڭگەيدەگى تابيعي مۇرا رەتىندە تانىلىپ، ونىڭ گەنەتيكالىق قورى ازىق-تۇلىك قاۋىپسىزدىگىن قامتاماسىز ەتۋ، جاڭا، جوعارى ءونىمدى ءارى اۋرۋلارعا ءتوزىمدى الما سورتتارىن شىعارۋ ىسىندە ەرەكشە ماڭىزعا يە بولىپ وتىر. كليماتتىڭ وزگەرۋى مەن انتروپوگەندىك قىسىمنىڭ ارتۋى جاعدايىندا جابايى الما ورماندارىن ساقتاۋ، ولاردىڭ تابيعي پوپۋلياتسيالارىن قورعاۋ جانە عىلىمي نەگىزدەلگەن مونيتورينگ جۇرگىزۋ ماسەلەلەرى بۇرىنعىدان دا وزەكتى.

كونفەرەنتسيانىڭ «جەتىسۋ ءوڭىرى تاريحي-مادەني جانە تابيعي مۇراسى كونتەكستىندەگى سيۆەرس الماسى: الىپ بىرەگەي اعاشتىڭ تاريحي، بيولوگيالىق قۇندىلىعى جانە «عىلىمي تابيعي وبەكت – ۇلتتىق يگىلىك» مارتەبەسىن بەرۋدىڭ عىلىمي نەگىزدەرى» اتتى تاقىرىبى تابيعات پەن مادەنيەتتىڭ ءوزارا بايلانىسىن، ۇلتتىق تابيعي مۇرانى ساقتاۋدىڭ عىلىمي جانە قوعامدىق ماڭىزىن ايقىندايدى. جەتىسۋ جەرىندەگى سيۆەرس الماسى – تەك مادەني المانىڭ ارعى تەگى عانا ەمەس، حالقىمىزدىڭ تابيعاتپەن ەتەنە بايلانىسىن، تاريحي جادى مەن ەكولوگيالىق مادەنيەتىن ايعاقتايتىن بىرەگەي تابيعي قۇندىلىق.
جيناققا قازاقستان جانە شەتەلدىك عىلىمي ۇيىمداردىڭ، جوعارى وقۋ ورىندارىنىڭ، ەرەكشە قورعالاتىن تابيعي اۋماقتاردىڭ، مۋزەيلەردىڭ، ارحيۆتەردىڭ، قوعامدىق ۇيىمداردىڭ جانە تاۋەلسىز زەرتتەۋشىلەردىڭ عىلىمي ماقالالارى ەنگىزىلدى. ۇسىنىلعان ەڭبەكتەردە سيۆەرس الماسىنىڭ بيولوگيالىق ەرەكشەلىكتەرى، تارالۋ ايماعى، پوپۋلياتسيالىق جاعدايى، گەنەتيكالىق ارتۇرلىلىگى، تابيعاتتى قورعاۋ ماسەلەلەرى، سونداي-اق جەتىسۋ ءوڭىرىنىڭ تاريحي-مادەني مۇراسى، ارحەولوگياسى، ەتنوگرافياسى جانە ەكولوگيالىق ءتۋريزمدى دامىتۋ باعىتتارى جان-جاقتى قاراستىرىلعان.
بۇل كونفەرەنتسيا اكادەميك ايماق جاڭعاليۇلى جاڭعاليەۆتىڭ عىلىمي مۇراسىن دارىپتەۋگە، ونىڭ يدەيالارىن قازىرگى عىلىم تۇرعىسىنان جالعاستىرۋعا، حالىقارالىق عىلىمي ىنتىماقتاستىقتى نىعايتۋعا جانە سيۆەرس الماسى مەن جەتىسۋ ءوڭىرىنىڭ تابيعي مۇراسىن ساقتاۋ جونىندەگى عىلىمي باستامالاردى دامىتۋعا ماڭىزدى ۇلەس قوسادى دەپ سەنەمىز.
Посмотреть эту публикацию в Instagram
جيناققا ەنگەن عىلىمي ماقالالار بوتانيكا، ەكولوگيا، ورمان شارۋاشىلىعى، گەنەتيكا، تابيعاتتى قورعاۋ، ارحەولوگيا، تاريح جانە مادەني مۇرا سالالارىنداعى زەرتتەۋشىلەرگە، جوعارى وقۋ ورىندارىنىڭ وقىتۋشىلارى مەن ءبىلىم الۋشىلارىنا، ەرەكشە قورعالاتىن تابيعي اۋماقتاردىڭ ماماندارىنا جانە تابيعات جاناشىرى – وقىرمان قاۋىمعا پايدالى بولادى دەپ ۇمىتتەنەمىز.
كونفەرەنتسيا جۇمىسىنا قاتىسىپ، ءوز عىلىمي ىزدەنىستەرىنىڭ ناتيجەسىمەن بولىسكەن بارلىق اۆتورلارعا، ۇيىمداستىرۋشىلارعا جانە سەرىكتەستەرگە شىنايى العىسىمىزدى بىلدىرەمىز. بۇل جيناق قازاقستاننىڭ تابيعي جانە تاريحي-مادەني مۇراسىن زەرتتەۋ مەن ساقتاۋعا باعىتتالعان عىلىمي قاۋىمداستىقتىڭ بىرلەسكەن ەڭبەگىنىڭ ناتيجەسى بولىپ تابىلادى.
بارشاڭىزعا جەمىستى عىلىمي ىزدەنىستەر، جاڭا شىعارماشىلىق جەتىستىكتەر جانە حالىقارالىق عىلىمي ىنتىماقتاستىقتىڭ ودان
مارات قابيەۆ، «جوڭعار الاتاۋى مەملەكەتتىك ۇلتتىق تابيعي پاركى» رمم باس ديرەكتورى












