ادامنىڭ ءومىر جولى ونىڭ اتقارعان قىزمەتىمەن عانا ەمەس، اينالاسىنا جاساعان جاقسىلىعىمەن، ۇستانعان قاعيدالارىمەن جانە كەيىنگى ۇرپاققا قالدىرعان ونەگەسىمەن دە باعالانادى. قاجەت انداس پەن بايان شايانباەۆانىڭ «پاراسات جولى» اتتى كىتابى – ءابدىماناپ بەكتۇرعانوۆتىڭ عۇمىرى ارقىلى پاراسات پەن ادامگەرشىلىك قۇندىلىقتارىن تانىتاتىن ەڭبەك.
2013 جىلى الماتى قالاسىندا جارىق كورگەن، 376 بەتتەن تۇراتىن كىتاپ ءابدىماناپ ەلىكبايۇلى بەكتۇرعانوۆتىڭ ءومىر جولىنا ارنالعان. ەڭبەكتە ونىڭ بالالىق شاعى، ءبىلىم العان جىلدارى، ەڭبەك جولى، وتباسى جانە اينالاسىنداعى ادامدارمەن قارىم-قاتىناسى تۋرالى دەرەكتەر قامتىلعان. وسى مالىمەتتەر مەن ەستەلىكتەر كەيىپكەردىڭ ومىرلىك ۇستانىمدارىن، ازاماتتىق بولمىسىن تانۋعا مۇمكىندىك بەرەدى.
Посмотреть эту публикацию в Instagram
كىتاپتى جازۋ بارىسىندا اۆتورلار تالدىقورعان – الماتى – تاراز – شىمكەنت – سارىاعاش اۋدانى باعىتىمەن ساپار شەككەن. بۇل ساپاردىڭ ماقساتى – كەيىپكەردىڭ ومىرىنە قاتىستى دەرەكتەردى جيناپ، ونى تانىعان ادامداردىڭ ەستەلىكتەرىن تىڭداۋ.
اۆتورلار ءابدىماناپ بەكتۇرعانوۆتىڭ ءبىلىم الۋى مەن قىزمەت جولىنا قاتىستى وقۋ ورىندارىنا، سونىڭ ىشىندە ءال-فارابي اتىنداعى قازاق ۇلتتىق ۋنيۆەرسيتەتىنە، م. ح. دۋلاتي اتىنداعى تاراز ۋنيۆەرسيتەتىنە جانە ءىلياس جانسۇگىروۆ اتىنداعى جەتىسۋ ۋنيۆەرسيتەتىنە بارعان. ۇستازدارىمەن، كۋرستاستارىمەن، جاس عالىمدارمەن كەزدەسىپ، ونىڭ تۇلعا رەتىندە قالىپتاسۋىنا ىقپال ەتكەن ورتانى زەرتتەگەن.
«پاراسات جولىنىڭ» مازمۇنىن تولىقتىرعان ماڭىزدى دەرەكتەردىڭ ءبىرى – تۋعان-تۋىستارىنىڭ، زامانداستارىنىڭ، بىرگە ەڭبەك ەتكەن ارىپتەستەرىنىڭ جانە ونى جاقىننان تانىعان جانداردىڭ ەستەلىكتەرى. ءار ادامنىڭ اڭگىمەسى كەيىپكەر بولمىسىنىڭ ءبىر قىرىن اشادى. سول ەستەلىكتەر ارقىلى وقىرمان ونىڭ ەڭبەككە كوزقاراسىن، ادامدارعا قارىم-قاتىناسىن جانە وتباسى قۇندىلىقتارىنا دەگەن ۇستانىمىن تاني الادى.
ەڭبەكتە ءابدىماناپ بەكتۇرعانوۆتىڭ مەرزىمدى باسىلىمدار مەن عىلىمي جيناقتاردا جاريالانعان ماقالالارىنىڭ تولىق نۇسقالارى دا جيناقتالعان. بۇل ماتەريالدار ونىڭ قازاقستانداعى زاڭ عىلىمىنىڭ دامۋىنا قوسقان ۇلەسىن تانىپ، عىلىمي وي-پىكىرلەرىمەن تانىسۋعا مۇمكىندىك بەرەدى. وسىلايشا، ومىرباياندىق دەرەكتەر مەن ەستەلىكتەر كەيىپكەردىڭ ءوز ەڭبەكتەرىمەن ساباقتاسىپ، تۇلعانىڭ جان-جاقتى بەينەسىن قالىپتاستىرادى.
كىتاپتىڭ قۇندىلىعى ءبىر ادامنىڭ عۇمىرىن بايانداۋمەن شەكتەلمەيدى. ونىڭ بەتتەرىنەن سول كەزەڭدەگى قوعامدىق ورتانىڭ تىنىسى، ءبىلىم مەن ەڭبەككە دەگەن كوزقاراس، وتباسىنداعى تاربيە جانە ادامدار اراسىنداعى سىيلاستىق كورىنەدى. جەكە ادامنىڭ ومىرىنە قاتىستى دەرەكتەر تۇتاس ءبىر ءداۋىردىڭ بولمىسىن تۇسىنۋگە دە جول اشادى.
«پاراسات جولى» – ەڭبەك پەن تاربيەنىڭ، وتباسى مەن قوعامنىڭ ادام تۇلعاسىن قالىپتاستىرۋداعى ورنىن كورسەتەتىن شىعارما. ءابدىماناپ بەكتۇرعانوۆتىڭ ءومىرى مەن ونى تانىعان جانداردىڭ ەستەلىكتەرىن توعىستىرعان بۇل ەڭبەك وقىرماندى ادامگەرشىلىك، جاۋاپكەرشىلىك جانە پاراسات تۋرالى ويلانۋعا جەتەلەيدى.
ايسۇلۋ تولەۋحان،
ولكەتانۋشى-جۋرناليست.
سۋرەتتەر مەن بەينەفيلمدى تۇسىرگەن
ءامينا اقىلبەك.
«Q-Andas» اقپارات اگەنتىگىنىڭ تىلشىلەرى.











