ەكولوگيالىق سانا – بۇل تەك سەنبىلىككە شىعۋ نەمەسە قوقىس جيناۋ ەمەس. بۇل – ءار ادامنىڭ تابيعاتقا، ءوز ورتاسىنا دەگەن قاتىناسىنىڭ ايناسى.
تالدىقورعان مەن كوكسۋ، اقسۋ، سارقان اۋداندارىندا مەكتەپتەر مەن جوو-لاردا «جاس ەكوبەلسەندى»، «تازا ورتا – مەنىڭ ورتام» اتتى كلۋبتار جۇمىس ىستەيدى. بۇل قوزعالىستار جاستاردىڭ تابيعاتتى قورعاۋعا، تۇرمىستىق قالدىقتى سۇرىپتاۋعا، سۋدى ۇنەمدەۋگە، قالانى تازا ۇستاۋعا باعىتتالعان.
كوپشىلىك كوزگە بايقامايتىن، ءبىراق كۇن سايىن تاڭمەن بىرگە قالانى تازالايتىن جاندار بار. ولار – كوممۋنالدىق قىزمەتتىڭ قىزمەتكەرلەرى. تالدىقورعان قالاسىنىڭ «تازالىق» مەكەمەسىندە ەڭبەك ەتەتىن قانات اعاي:
«ءبىزدىڭ جۇمىس – كوزگە كورىنبەسە دە، ەلدىڭ ءومىر ساپاسىنا تىكەلەي اسەر ەتەدى. قالا تازا بولسا، ادامنىڭ دا كوڭىلى تازا بولادى».
وسىنداي قاراپايىم، ءبىراق ەڭبەگى زور ادامداردىڭ ارقاسىندا قالانىڭ ءار بۇرىشى جارىق، تازا، كورىكتى بولىپ تۇر”، – دەپ اعىنان جارىلدى.
جەتىسۋدا سوڭعى ەكى جىلدا ەكولوگيالىق باعىتتاعى 40-تان استام سەنبىلىك، فلەشموب جانە ەكو-جوبالار وتكىزىلگەن.
«Jetisu Eco Team»، «Q-Andas ەرىكتىلەرى» جانە «جاسىل قادام» ۇيىمدارى تۇراقتى تۇردە تازالىق اكتسيالارىن ۇيىمداستىرىپ، ءوز پاراقشالارىندا اقپاراتتىق ءتۇسىندىرۋ جۇمىستارىن جۇرگىزىپ كەلەدى. مىسالى، «Q-Andas.kz» پلاتفورماسى Instagram-دا «قورشاعان ورتا» اتتى ايدار اشىپ، تازالىق پەن مادەنيەتكە ارنالعان ماتەريالدار جاريالاپ ءجۇر.
جەتىسۋ وبلىسىنىڭ ەكولوگيالىق مادەنيەتى – ءوڭىردىڭ ءيميدجىن ايقىندايتىن فاكتورلاردىڭ ءبىرى.
تۇرعىندار مەن بيلىك اراسىنداعى سەرىكتەستىك، جاستاردىڭ ەرىكتىلىك بەلسەندىلىگى جانە مەديا-پلاتفورمالاردىڭ اقپاراتتىق قولداۋى – ءبارى بىرىگىپ «تازا سانا» يدەياسىن شىنايى جۇزەگە اسىرىپ كەلەدى.
تازالىق — بۇل تەك كوممۋنالدىق قىزمەتتىڭ مىندەتى ەمەس. ول – ءاربىر ازاماتتىڭ ساناسىنان باستالاتىن مادەنيەت.
ەگەر ءار تۇرعىن ءوز اۋلاسىن، كوشەسىن، قالاسىن تازا ۇستاۋعا ۇلەس قوسسا، وندا «تازا سانا – تازا قالا» ۇرانى شىن مانىندە ءومىر شىندىعىنا اينالادى.
ارنايى “تازا سانا-تازا قازاقستان” بايقاۋى ءۇشىن!
قاجەت انداس،
“Q-andas.kz” سايت رەداكتسياسى
