Ekologiyalyq sana – búl tek senbilikke shyǵu nemese qoqys jinau emes. Búl – ár adamnyń tabiǵatqa, óz ortasyna degen qatynasynyń ainasy.
Taldyqorǵan men Kóksu, Aqsu, Sarqan audandarynda mektepter men JOO-larda «Jas ekobelsendi», «Taza orta – meniń ortam» atty klubtar júmys isteidi. Búl qozǵalystar jastardyń tabiǵatty qorǵauǵa, túrmystyq qaldyqty súryptauǵa, sudy únemdeuge, qalany taza ústauǵa baǵyttalǵan.
Kópshilik kózge baiqamaityn, biraq kún saiyn tańmen birge qalany tazalaityn jandar bar. Olar – kommunaldyq qyzmettiń qyzmetkerleri. Taldyqorǵan qalasynyń «Tazalyq» mekemesinde eńbek etetin Qanat aǵai:
«Bizdiń júmys – kózge kórinbese de, eldiń ómir sapasyna tikelei áser etedi. Qala taza bolsa, adamnyń da kóńili taza bolady».
Osyndai qarapaiym, biraq eńbegi zor adamdardyń arqasynda qalanyń ár búryshy jaryq, taza, kórikti bolyp túr”, – dep aǵynan jaryldy.
Jetisuda sońǵy eki jylda ekologiyalyq baǵyttaǵy 40-tan astam senbilik, fleshmob jáne eko-jobalar ótkizilgen.
«Jetisu Eco Team», «Q-Andas eriktileri» jáne «Jasyl qadam» úiymdary túraqty túrde tazalyq aktsiyalaryn úiymdastyryp, óz paraqshalarynda aqparattyq túsindiru júmystaryn júrgizip keledi. Mysaly, «Q-Andas.kz» platformasy Instagram-da «Qorshaǵan orta» atty aidar ashyp, tazalyq pen mádenietke arnalǵan materialdar jariyalap júr.
Jetisu oblysynyń ekologiyalyq mádenieti – óńirdiń imidjin aiqyndaityn faktorlardyń biri.
Túrǵyndar men bilik arasyndaǵy seriktestik, jastardyń eriktilik belsendiligi jáne media-platformalardyń aqparattyq qoldauy – bári birigip «taza sana» ideyasyn shynaiy júzege asyryp keledi.
Tazalyq — búl tek kommunaldyq qyzmettiń mindeti emes. Ol – árbir azamattyń sanasynan bastalatyn mádeniet.
Eger ár túrǵyn óz aulasyn, kóshesin, qalasyn taza ústauǵa úles qossa, onda «taza sana – taza qala» úrany shyn máninde ómir shyndyǵyna ainalady.
Arnaiy “Taza sana-taza qazaqstan” baiqauy úshin!
Qajet Andas,
“Q–andas.kz” sait redaktsiyasy
